30. यीशु पन हजार मऊंओर बगत देना असे

यीशुई अपें प्रेरितोर प्रचार करिबे ओ मऊंओर शिक्षा दिबोनि मस्स ज़ेञ पाटि-पाटि नगरियोन बिदा। ज़ेखेए तेने तेटी पलाटुए ज़ेटि यीशु थिया त तेने तेसर बताया कि तेने खि कियाति। च़ा यीशुई तेनोर झीला अईक्‍यारिंञ तेस्‍सा एक शान्‍त ठारि पुटि गईकर मिन झा नह्च़ि करिबोनि बुलाया। तेरे तेने एक कश्‍ती पुटि चढ़ी गे होरक झीला अईकारच़ी उठि गे।

पर तेटि मस्स ज़ेञ एरा मऊं थिए ज़ेने यीशुओर च़ेल्‍लेओर कश्‍तीन गईबेंञ कयाति। इने मऊं तेनोंञ अगरीं झीला अईकारच़ी गईबोनि झीला मुखीं-मुखीं ज़रका देनेति। तेरे ज़ेखेए यीशुओर च़ेल्‍ले अपरे त मऊंओं कि एक मस्स छुंड तेनोर च़ोखि तेटि अगरंञे थिए।

तेस भीड़न ज़लऊंओं होरक मठेओर न गणीं पन हजारंञ भि मस्स मुशुड्ले थिए। यीशुई तेनो मऊंओं पुटि मस्स दया किया। यीशुओनि तेने मऊं पउआला मेतेंईं पेरुओठो थिए। तेरे यीशुई तेनोर शिक्षा दिता होरक तेनो बिच़ा ज़ेने मऊं दुखोरे थिए तेनोर अईन किया।

पसतेला ज़ेञ, च़ेल्‍ले यीशु सा लाई, “हेबे झा भूई गियाओर इसो-ओसो दूरे च़ेक नगरी भि नाईं। इनो मऊंओर बिदा कर ताकि इने गईकर खईबोनि खींया लेले।”

पर यीशुई च़ेल्‍लेयो सा लाई, “तुसे इनोर खईबोनि खींया देओ!” तेने जुवाब दिता, “अप्‍से एरा केरा करि बटले? अप्‍सेयों कच़ा सिर्फ पन रोटि ओ दूई मठी मछ़ो असुन।”

यीशुई अपें च़ेल्‍लेयोर लाई कि तेने भीड़ा मऊंओर घा पुटि दूई-बी-दश दूई-बी-दशा छुंडन बेशिबोनि बोलो।

च़ा यीशुई पन रोटि दूई मछ़ोर लेईकर स्‍वर्गारी हेरिया, होरक तेस बगताओनि परमेश्‍वरा शबस किया।

च़ते यीशुई रोटि ओ मछ़ोर खण्‍णि किया। यीशुई मऊंओर दीबोनि अपें च़ेल्‍लेयोर तेने खण्‍णि दी बिदे। च़ेल्‍ले तेस बगतर बण्‍णिला किया, होरक से कांई-भि न छ़ोवा! तेने बदे मऊं खई रज़ि गे।

तेस पिच़ंञ, च़ेल्‍ले तेस बगतर ठोक्‍कन किया ज़ेस खाओरा नोथा होरक से बारा बल्‍लियोर भरिबोनि झोभी थिया! से बदे बगत तेने पन रोटि ओ दूई मछ़ोञ आयाति।