34. यीशु होरेक कथाओ कि शिक्षा देना असे

यीशुई परमेश्‍वरा राज्‍य कि बारेन होरेक मस्‍स कथा शुणांया। उदाहरणा ओनि, यीशुई बोलिया, “परमेश्‍वरा राज्‍य एक शई बेजे बराबर भो ज़ेसर केनिया अपें बगि बइ बिदा। तुसे ज़ाऊं कि शई बेजा बदे बेजेओंञ मठा भुइबा।”

“पर ज़ेखेंई शई बेजा मोड़ुई गाना असे से बाग बदेओंञ मोड़ा भुई गाना असे, एतेक मोड़ा कि च़ई-च़करुओ अई तेसि डई पुटि नहच़ि करनेन।”

यीशुई एक अयक कथा शुणांया, “परमेश्‍वरा राज्‍य खमीरा बराबर भो ज़ेसर एक ज़लऊं बगज़नन मिंयई बिज़नी असे च़े से खमीर बणिं गाना असे।”

“स्‍वर्गा राज्‍य तेस खज़ाने बराबर भो ज़ेसर केनिया बगि युंकई बिदा। केसोआरा होरेक मऊंर से खज़ाना हतुई गिया होरेक तेनी तेसर अपें थेइबे इच्‍छा किया। तेरे तेनी फिरि पथि बिदा। से एरा घाटे तुठोरा थिया कि तेनी गई कर अपां बदे-दिर बिक्रीं बिदा ताकि तेनी तेस बगिर लेई बटोरा लोई ज़ेटि से खज़ाना थिया।”

“स्‍वर्गा राज्‍य एक डरोंआ किमती शुद्ध मुतिका बराबर भि भो। ज़ेखेंई कऊंआ मुतिको व्‍यापारी तेसर हासिल करि बिज़ना त से तेसर लेईबे ओनि अपां बदे-दिर बिक्रीं बिज़ना असे।”

तेटि मिन ज़ेञ मऊं थिये ज़ेने सोचनेति कि परमेश्‍वर तेनोर तेरे स्‍वीकार करल किसबोलि तेने भला कम करनेन। इने मऊं एरा घाटे मऊंओर खीं मेतेंई च़ेण्‍णे थिये ज़ेने भलाई कि कमोर न करने थिये। तेरे यीशुई तेनोर इ कथा शुणांया, “दुई मुषुल्‍ले थिये होरेक दुइयो ज़ेञ प्रार्थना करिबे ओनि मंदरा गे। तेनो बिच़ंञ एक कर लेना थिया, होरेक अइक ज़ेंञ से एक यहूदी धार्मिक परधान थिया।”

“तेनी धार्मिक परधाने एरा बोलि प्रार्थना किया, ‘हे परमेश्‍वर, तेपां धन्‍यवाद कि हऊं होरेक मऊंओ घाटे-ज़ेरा डाकू, अन्‍यायी मऊं, झ़केउआं कम करना या इटि च़ेक कि तेस कर लेना मऊं घाटे एक पापी नूं।’”

“उदाहरणा ओनि, हऊं हर हफ्‍ते दूई फेरा व्रत थेण्‍णूं, होरेक हऊं मूर हतेओने ढबूएंञ होरेक समानाकि दसवां हिस्‍सा तपींर देनूं।”

“पर कर लेना से मऊं तेस यहूदी धार्मिक परधानंञ एस्‍सी दूरा खा भुइ गिया। तेनी खइलिर टीरा च़ेक न उछ़ूया। इसी बजाए, तेनी अपां हते अपां याहका कुटिया होरेक प्रार्थना किया, ‘हे परमेश्‍वरा, शबस करि मूं पुटि दया कर किसबोलि हऊं एक पापी भोऊं।’”

च़े यीशुई बोलिया, “हऊं तुसोर छ़ेच्‍च़ेंईं बोलनूं, परमेश्‍वरे तेस कर लेने कि प्रार्थनइर शुईंया होरेक तेसर धर्मी घोषित किया। पर तेनी तेस यहूदी धार्मिक परधाना कि प्रार्थनइर न शुईंया। परमेश्‍वर हर एक घमण्‍डी मऊं कि कपार बुल्‍लिर करल, पर परमेश्वर हर एक तेस मऊंर आदर देल ज़े अपींर नम्र करना।”