35. दयालु बा कि कथा

एक झा, यीशु तेनो केतेक्‍बा मऊंओर शिक्षा देनाति ज़ेने यीशु कि शुंईंबेर ठोक्‍कन भुएति। इने मऊं कर लेने ओ होरेक मऊं भि थिये ज़ेने मूसे कि कानूनाकि भाषे करिबे कोशिश न कियाति।

मिन यहूदी धार्मिक परधाने-ए कइया कि यीशु इनो मऊंओंञ एक साति ठो गप्‍पा करना थिया। तेरे तेने एम्‍फ्‍यो बिच़ा इ बोलिबा च़ुख्‍फी करि बिदा कि से गलत करना थिया। यीशुई तेनोर गप्‍पा करिब शुंईंया, तेरे तेनी तेनोर इ कथा शुणांया।

“एक मऊं थिया ज़ेसी दुई कोए थिये। मठा कोए अपें बा सा बोलिया, ‘हे बा, मूर एब्‍बेंई मेरा हिस्‍सा लोई!’ च़े बाए अपें दुइयो कोओ बिच़ा अपां जायजाद बण्‍णिं बिदा।”

“युहरनाए मठा कोआ अपां बदे-दिर ठोक्‍कन करि दूरे देशारि उठि गिया होरेक पापा जीवन ज़ीबेर अपां बदे धन-दौलत बर्बाद करि बिदा।”

“इस पिच़ंञ, ज़ेटि मठा कोआ थिया तेस देशन डरोंआ मोड़ा अकाल पड़िया, होरेक तेसिंञ बगत लेई खइबेर च़ेक ढबुआ नोथा। तेरे तेसर ज़े कम हतुआ से सुअरो च़ारिबा थिया। से एतेक दुखी ओ भुक्‍राच़ेओरा थिया कि से सुअरो कि बगत खइबा चाहना थिया।”

“पिछ़ों मुख्‍खा, तेनी मठा कोए अपीं सा बोलिया, “हऊं खि करला असु? मेरे बा-कि बदे परगरोंञ खइबे ओनि मस्‍स बगत असे, फिरि भि हऊं इटि भुखरे मरनूं। हऊं मेपें बा कच़ा पलाटेऊं होरेक मेपें बा-कि परगर बणिंबे ओनि विनती करु।’”

“च़े तेनी मठा कोए पलाटुई अपें बा-कि घरेआर गइबा च़ुख्‍फी किया। एबेंई से दूरा ए थिया, तेसी बाए तेसर कइया होरेक तेस पुटि तरस खाया। से द्रो दी अपें कोए कच़ा गिया होरेक तेस कला दिता ओ पा किया।”

“तेनी कोए बोलिया, ‘हे बा, मेंई परमेश्‍वरा होरेक तेपें खिलाफन पाप किया। हऊं तेपां कोआ बोलिबे ज़ोगा भि नूऊं।’”

“पर बाए अपें एक परगरर लाई, ‘युहरना गइ बदेओंञ रुठू डबूं लेई अयो होरेक मेरे कोएर लवाओ! तेसी अउंलीन अउंठी होरेक तेसी खुरोन बुटो लवाओ। च़े बदेओंञ मोड़ा पेरु मारी च़े अस्‍पीं खई योन्‍द्रा करले, किसबोलि मेरा कोआ मरि गियाति, पर हेबे ज़ीना असे! से हरुई गियाति, पर हेबे से हतुई गिया!’”

“च़े मऊंई योन्‍द्रा किया। अदा च़ोखि, मोड़ा कोआ बगि कम करि घरेआर आया। तेनी घीत ओ नच़िबे च़ाला शुईंया से हैरान भुई गिया च़ेता इ खि भोना।”

“ज़ेखेंईं मोड़ा कोएर पता लगिया कि तेने तेरे योन्‍द्रा करनेति तेसी भाई घरेआर अइ गियाति, च़े से डरोंआ रोषुआ होरेक घरे अण्‍डीं नाया। तेसी बाए भइरों अई तेसर साथे योन्‍द्रा करिबे ओनि बोलिया, पर तेनी मना करि बिदा।”

“तेनी मोड़ा कोए अपें बा-रि लाई, ‘एतेक बदे बरी मेईं तेपां ओनि एतेक मेहनता सा कम किया! कदी -भि तेपें गप्‍पेर न टालिया, पर तेपें मूर कदी भि एक मठी बकरि च़ेक न दिति ताकि मेंईं मेपें सातियो सा खई बटू। पर तेपां इनी कोए तेपां धन-दौलत पापी कमो करिबेर बर्बाद करि बिदोरा असे। होरेक एबेंईं ज़ेखेंईं आया त तेपें बदेओंञ मोड़ा पेरु कटि योन्‍दरा किया!”

“बा-ई जुवाब दिता, ‘हे मेरा कोआ, तु हमेशा मूं सा असे, होरेक ज़े भि मेरा असे से बदे तेरा भो। पर हईंपा ओनि योन्‍द्रा करिबा ठीक भो किसबोलि तेरा भाई मरि गियाति, पर हेबे ज़ीना असे। से हरुई गियाति, पर हेबे हतुई गिया!’”