36. यीशु मसीह कि रुप लेख्‍फि करिबा

एक झा, यीशु अपें त्राई च़ेल्‍ले, पतरस, याकूब, होरेक युहन्‍नेर अपीं सा लेई गिया। (इ युहन्‍ना नाऊंआकि च़ेल्‍ला से-हे मऊं नूंऊं ज़ेनी यीशुर बपतिस्‍मा दिति।) तेने प्रार्थना करिबे ओनि एक उथे घउआ पुटि गे।

ज़ेखेईं यीशु प्रार्थना करला थिया त यीशुकि मुंह धुपा ठो च़ल्‍कि गिया। तेसी डबूं प्रागे ठो शुके भुई गे, ज़ेरा कि पृथ्वी पुटि केनिया शुका करि बटोरा नुअल तेतेक शुका।

च़े मूसा ओ एलिय्‍याह परमेश्‍वरा तरफे बोलना प्रगट भुआ। इने मुषुड्ले पृथ्वी पुटि इस मुकेंञ केतिबा शऊ बरिउंञ अगरंञ बेशने थिये। तेने यीशु सा तेसी मरिबे बारेन गप्‍पा किया, किसबोलि यीशु यरुशलेमन युहरनाए मरि गईब थिया।

ज़ेखेंईं मूसा-ओ एलिय्‍याह यीशु सा गप्‍पा करला थिये तेखेंई पतरसे यीशुर लाई, “हईंया ओनि इटि भुइबा रुठ भो। अस्‍पीं त्राई मंडपोर बणंउले, एक तेपां ओनि, एक मूसे ओनि, होरेक एक एलिय्‍याह कि ओनि।” पर पतरस न ज़ाण्‍णां थिया कि से खि बोलना।

ज़ेखेंई पतरस गप्‍पा करला थिया, च़े एक च़ल्‍कोरा बदड़ बुलिर ओसी तेनो पुटि फैलि गिया। च़े तेने बदड़ंञ एक शा अइब शुईंया। तेनी बोलिया, “इ मेरा कोआ भो ज़ेस सा हऊं दा करनूं। हऊं इस सा खुश असु। इसी शुंणों।” तेने त्रईयो च़ेल्‍ले डरि गे होरेक धर्त्रि पुटि लेटि गे।

तेखेंईं यीशुई तेनोर हथ थेई बोलिया, “डरो माओ। उठि बिज़ो।” ज़ेखेईं तेने च़ोउरो फेरेआर हेरिया त, ज़े भि तेटि थिया से सिर्फ यीशु थिया।

यीशु होरेक तेने त्राई च़ेल्‍ले घउआ पुटिंञ पलाटुई बुल्‍लिर ओसि आये। च़े यीशुई तेनोर लाई, “एबेंई ज़े इटि भुआ तेसी चर्चा केसोआ सा मकरो। हऊं युहरनाए मरिब तियार असू च़े फिरि ज़ीनुई गऊं। तेस पिच़ंञ, तुसे मऊंओर बोलि बटोले।”