37. यीशु लाज़रर मरि गिउरिओंञ ज़ीनेरना असे

लाज़र नाऊंआ कि एक मऊं थिया। तेसी दुई भेंई थिये ज़ेनो नाऊं मरियमो मार्था थिया। तेने बदे यीशु कि जिगरी साहथि थिये। एक झा, केनिया यीशुर बताया कि लाज़र डरोंआ दुखोरा थिया। ज़ेखेंई यीशुई इ शुईंया त बोलिया, “इ रोग लाज़रा कि मरिबे सा न छ़ोयोल। इसी बजाए, इ मऊंओर परमेश्‍वरा कि आदर करिबे ओनि उत्‍साहित करिली।”

यीशु अपें सातिउर दा करना थिया, पर ज़ेटि से थिया तेटि यीशु दुई दी च़ेक च़ोखिया। दुई दियो पिच़ंञ, यीशुई अपें च़ेल्‍लेओर बोलिया, “अयो, पलाटुई यहूदियारि गऊंले।” च़ेल्‍ले जुवाब दिता, “पर हे गुरु, अज़ी मिन ध्‍याड़ा अगरंञ तेठा मऊं तपींर मारि बिज़िबा चाहने थिये!” यीशुई लाई, “हईंपा साति लाज़र निन्‍दरा असे, होरेक मूर तेसर च़ेवइबा असे।”

यीशु कि च़ेल्‍ले जुवाब दिता, “हे प्रभु, अगर लाज़र ढेश किउरा असे, त से ठीक भुइ गाल।” च़े यीशुई तेनोर साफ रुपन बोलि बिदा कि, “लाज़र मरि गिउरा असे। हऊं आनन्‍दित असु कि हऊं तेटि नोथा, ताकि तुसे मूं पुटि विश्‍वास करि बटो।”

ज़ेखेंई यीशु लाज़रा नगरी अपरिया त लाज़रर मरि च़ोउर दी भुई मुकोरा थिया। मार्था यीशु सा हतुइब भइरों आई होरेक बोलिया, “हे प्रभु, अगर तपीं इटि भुयंञ त मेरा भाई मरिबे नोथा। पर हऊं विश्‍वास करनूं कि ज़े भि तू परमेश्‍वरंञ गेशल से तपींर देल।”

यीशुई जुवाब दिता, “फिरि उठिबा ओ जीवन हऊं भोऊं। ज़ऊं भि मूं पुटि विश्‍वास करल अगर से मरि भि गाल च़े भि से ज़ियल। ज़ऊं भि मूं पुटि विश्‍वास करना से कदी न मरल। खि तु इस पुटि विश्‍वास करनिया?” मार्थे जुवाब दिता, “हे प्रभु, हऊं विश्‍वास करनूं कि तपीं परमेश्‍वरा कोआ मसीह भोई।”

च़े मरियम आई। तेनी यीशु खुरोंञ झ़इकर बोलिया, “हे प्रभु, अगर तपीं इटि भुयंञ त मेरा भाई मरिबे नोथा।” यीशुई तेसर पुछ़िया, “तुसे लाज़रर कोटि थेओरा असे?” तेने यीशुर बताया, “कब्रन। अई कर हेर।” च़े यीशु रोलिब ठारुआ।

से कब्र एक कू थिया ज़ेसी द्‍वारा एक रुण छ़ाओरा थिया। ज़ेखेंईं यीशु कब्रन अपरिया त तेनी बोलिया, “रुणर घिरई बिज़ो।” पर मार्थे बोलिया, “तेसर मरि कर च़ोउर दी भुई मुकोरा असे। तेसिंञ बास अइना भोल।”

यीशुई जुवाब दिता, “खि मेंई तुसोर नोलियातिआ कि अगर तुसे मूं पुटि विश्‍वास करोले त परमेश्‍वरा सामर्थ हेरोले?” तेरे तेने रुणंर घिरई बिदा।

च़े यीशुई खइलिर स्वर्गारि हेरिकर बोलिया, “हे बा, मेरा शुईंबे ओनि हऊं तेपां शबस करनूं। हऊं ज़ाऊं कि तपीं हमेशा मेरा शुण्‍णा, पर मेंईं इ इटि खा इनो बदे मऊंओर मदद करिबे ओनि बोलिया ताकि इने विश्‍वास किउरा लोई कि मूर तेपें बिदोरा भो।” च़े यीशुई हक दिता, “हे लाज़रा, भइलि निसि अइ!”

च़े लाज़र भईरीं निसि आया! से एबेईं भि कफना बिच़ा जिलबी किउरा थिया। यीशुई तेसर लाई, “इस डबुंअर खनिबेर एसी मदद करो होरेक एसर आज़ाद करो।” इस चमत्‍कारा बजहे केतेक्‍बा यहूदिये यीशु पुटि विश्‍वास किया।

पर यहूदियो कि धार्मिक परधानों ठो यीशु सा जेगदंञ करिब ठारुए, तेरे तेने योजना बणंइबे ओनि ठोक्‍कन भुए कि केरा यीशु ओ लाज़रर मारि बिज़ले।