38. यीशुर प्रवइबा

बर्षोत, यहूदी मऊं फसह कि त्‍योहार मनाने थिये। इ त्‍योहार इस बारेन थिया कि केतेबा शऊ बरीउ अगरंञ परमेश्‍वरे तेनो पूर्वजोर मिस्रा कि चंगुलंञ छुड़ायाति। लगभग त्राई वर्षा पिचंञ यीशुई बत्‍तेओ बिच़ा प्रचार करिबा होरेक शिक्षा दीबा च़ुख्‍फी किया। यीशुई अपें च़ेल्‍लेओर बताया कि यीशु अपीं तेनो सा यरुशलेमन फसह कि त्‍योहार मनइबा चाहना, होरेक इ भि कि तेने तेसर तेटि मारि बिज़ले।

यीशु च़ेल्‍लेओ बिच़ा एक यहूदा नाऊंआ मऊं थिया। यहूदा प्रेरितो कि ढबूओ कि थैली थेण्‍णा थिया, पर कई फेरा से तेस थैलिंञ ढबूआ खनि बिज़ना थिया। यीशु कि च़ेल्‍लेओ कि यरुशलेमन अपरि पिच़ंञ यहूदा यहूदी परधानों कच़ा गिया। तेनी ढबूए ठारी यीशुर तेनो हथे प्रवइबे प्रस्‍ताव थैइया। से ज़ाण्‍णाति कि यहूदी परधानों स्‍वीकार करने नोथे कि यीशु-ए मसीह थिया। से ज़ाण्‍णा थिया कि तेने यीशुर मारिबा चाहने थिये।

मोड़े पुजारी कि बोलिबे पुटि यहूदी परधाने-ए यीशुर प्रवइबे ओनि यहूदेर बीओ दश रोपे कि सिक्‍के दिते। इ तेरी भुआ ज़ेरा कि परमेश्‍वरा तरफे बोलने तेनी बोलियाति कि भोल। यहूदा मनि गिया होरेक ढबूआ लेई उठि गिया। से यीशुर प्रवइबे ओनि तेनोर मदद करिबे ओनि मौका लोइब ठारुआ।

यरुशलेमन, यीशुई अपें च़ेल्‍लेओ सा फसह कि त्‍योहार मनाया। त्‍योहारा बगता मुके, यीशुई रोटि लेई खण्‍णीं किया। तेनी लाई, “इसर लेओ होरेक खाओ। इ मेरा फुक भो ज़े हऊं तुईंयां ओनि देनूं। इसर मेरे हीतन करो।” एरा करि, यीशुई बोलिया कि से तेनो ओनि मरि गाल, मतलब कि तेनो ओनि से अपें फुकर बलि दी बिज़ल।

च़े यीशुई एक दाखा रसा प्‍याला लेइया होरेक बोलिया, “इसर पिओ। इ खर्का वाचे कि मेरा रत भो ज़े हऊं उण्‍डेलू ताकि परमेश्‍वर तुईंया पापोर माफ करल। हर फेरे इस पीबे मुके मूर हीत करो ज़े हऊं एबेंईं करला असु।”

च़े यीशुई अपें च़ेल्‍लेओर बोलिया, “तुसो बिच़ंञ एक मऊं मूर प्रवाल।” च़ेल्‍ले ठट्ट भुई गे, होरेक पुछ़िया कऊं एरा कम करल। यीशुई लाई, “मूर प्रवाना मऊं से भो ज़ेसर हऊं इ रोटी खण्‍णीं देनूं।” च़े यीशुई से रोटी यहूदेर दिता।

तेस रोटीर लेई पिच़ंञ, यहूदेन शैतान उठि गिया। यहूदा निसि कर यीशुर प्रवइबे ओनि यहूदी परधानों कि मदद करिबे ओनि उठि गिया। इ राति मुके थिया।

बगत खई पिच़ंञ, यीशु ओ यीशु च़ेल्‍ले जैतून घउआरि उठि गे। यीशुई लाई, “तुसे बदे ज़ेंञ अज़ राति मूर छोड़ि बिज़ोले। इ लिखोरा असे, ‘हऊं पउआलर मारु होरेक बदे पेरु तितर-बितर भुई गाले।’”

पतरसे जुवाब दिता, “बड़गे बाकी बदे ज़ेंञ तपींर छोड़ि बिज़ेले, पर हऊं न छोड़ू।” तेखेंईं यीशुई पतरसर लाई, “शैतान तुसो बदेओर लेई लेइबा चाहना, पर हे पतरस, मैंईं तेरा ओनि प्रार्थना किया कि तु विश्‍वासंञ न हटोरा लोई। फिरि भि, अज़क्‍वां राति, कुक्‍कुड़ा कि बांग दीबे अगरंञ तु त्राई फेरा मेरा इंकार करल कि तु मूर न प्रयांईं।”

पतरसे तेखेंई यीशुर लाई, “बड़गे हऊं मरि भि गऊं, हऊं कदी भि तेपां इंकार न करु!” बाकि कि च़ेल्‍ले भि ई-ए लाई।

च़े यीशु अपें च़ेल्‍लेओ सा गतसमनी नाऊंआ ठारि गिया। यीशुर अपें च़ेल्‍लेओर प्रार्थना करिबे ओनि बोलिया ताकि शैताने तेनो परीक्षा किउरा न लोई। च़े यीशु अपीं प्रार्थना करिबे ओनि उठि गिया।

यीशुई त्राई फेरा प्रार्थना किया, “हे मेरा बा, अगर भुई बटिबे असे त इ दुखा प्‍याला मूर पीबे ओनि म दे। पर मऊंआ पाप माफ करिबे ओनि अयक बत नाई त, च़े तेपां-ए इच्‍छा पूरा भूरा लोई।” यीशु डरोंआ बेचैन थिया होरेक प्रसेत रता घाटे थिया। यीशुर सामर्थ दीबे ओनि परमेश्‍वरे एक स्‍वर्गदूतर बिदा।

हर बार प्रार्थनई पिच़ंञ, यीशु अपें च़ेल्‍लेओ कच़ा पलाटुई आया, पर तेने ढेश करि बिदोरे थिये। ज़ेखेईं यीशु तीसरा फेरेर पलाटुआ त यीशुई लाई, “च़ेयो-ओ! मूर प्रवाना इट्ठीं असे।”

यहूदी परधाने-ए सैनिको, होरेक एक मोड्डा भीड़ा सा यहूदा आया। तेनोंञ तलवार-ओ लठि थिये। यहूदे यीशु कच़ा अई बोलिया, “हे गुरु, नमस्‍ते,” होरेक तेसर पा किया। तेनी प्राने मऊंर यहूदी परधानोर हेरालिबे ओनि एरा कियाति। च़े यीशुई बोलिया, “हे यहूदा, खि तु एक पा करि मूर प्रवाना-आ?”

ज़ेखेईं तेने सैनिक यीशुर प्रानेति, त पतरसे अपां तलवार खनि होरक यहूदी मोड़े पुजारी कि एक सेवका कन कटि बिदा। यीशुई लाई, “तलवारर दूरा थे! हऊं मेपां बचाव करिबे ओनि स्‍वर्गदूतो कि एक सेने ओनि विनती करि बटू। पर मूर मेपें बा कि गप्‍पा मनिबा असे।” च़े यीशुई तेस मऊं कि कनर अईन करि बिदा। च़े बदे च़ेल्‍ले नशि गे।