39. यीशु पुटि मुकद्मा च़लना असे

हेबे इ आद रात थिया। तेने सैनिको यीशुर यहूदी मोड़े पुजारी घरे लेई आये, किसबोलि तेने यीशुर पुछ़िबा चाहने थिये। पतरस दूरेंञ तेनो पिछा करना थिया। ज़ेखेंईं सैनिक यीशुर घरे लेई गे, च़े पतरस भइरों च़ोखि कर अपींर अगि सा तच़इब ठारुआ।

घरे अण्‍डीं, यहूदी परधाने-ए यीशु पुटि मुकद्मा च़लाया। तेने यीशु विरोधन हफ्‍सी गप्‍पे बोलिबे ओनि मस्‍स ज़ेंञ हफ्‍सी गवाहोर लेई आये। हालांकि, तेनो गप्‍पे एम्‍फ्‍यो सा न मिलनेति, तेरे यहूदी परधाने-ए इ साबित करि नोटिया कि यीशु खीं गप्‍पेयोन दोषी थिया। यीशुई खीं नोलिया।

पिछ़ो मुख्‍खा, यहूदी मोड़ा पुजारीए सीद्दा यीशुर हेरिकर पुछ़िया, “असोर बता कि तपीं ज़ीना परमेश्वरा कोआ मसीह भोइया?”

यीशुई लाई, “हऊं भोऊं, होरेक तुसे मूर परमेश्‍वरा सा बेठोरा स्‍वर्गंञ अइब भि काओले।” यहूदी मोड़ा पुजारी अपां डबूं च़ीरि बिदा किसबोलि ज़े यीशुई बोलियाति तेस गप्‍पे पुटि से डरोंआ रोषुआ। से होरेक परधानों पुटि हउशुआ, “असोर इ बतइबे ओनि केसोआ होरेक गवाह कि ज़रुरत नाईं कि इनी मऊंवी खि किउरा असे! तुसे एम्‍फें-ए इ बोलिब शुंईं बिदोरा असे कि यीशु परमेश्वरा कोआ भो। तेसी बारेन तुईंया खि फैसला असे?”

“बदे यहूदी परधाने-ए यहूदी मोड़े पुजारीर जुवाब दिता, “से मारिब ज़ोगा भो!” च़े तेने यीशु कि टीरे पुटि पट्टी लवाया, तेस पुटि थुकिया, तेसर कुटिया, होरेक तेसी मज़ाक उड़ाया।

होरेक पतरस, ज़ेखेंईं घरे भइरीं च़ोखी थिया। च़े एक परगर मठी तेसर कइया। तेनी तेसर लाई, “तु भि यीशु सा थिया-आ!” पतरसे मना करि बिदा। पिच़ंञ, अयक मठी भि होरी पुछ़िया, होरेक पतरसे फिरि मना करि बिदा। पिछ़ो मुख्‍खा, कोई मऊंवी लाई, “असे ज़ाऊं कि तु यीशु सा थिया किसबोलि तुसे दुइयो ज़ेंञ गलील किंञ भोऊ।”

तेखेंईं पतरसे लाई, “अगर हऊं इस मऊंर प्रयाऊं त परमेश्‍वर मूर श्राप दे!” तेखैंईं तेसी पतरसा कि एरा सौगंद करि पिच़ंञ, एक कुक्‍कुड़े बांग दिता। यीशुई पिछ़लि फिरि पतरसर हेरिया।

पतरस तेटिंञ उठि गिया होरेक फुटि-फुटि कर रोलिया। तेस्‍से मुके, यीशुर प्रवाने यहूदे कइया कि यहूदी परधाने यीशुर मारि बिज़िबे सज़ा दिता। यहूदा डरोंआ दुखी भुआ होरेक गई कर अपींर मारि बिदा।

हेबे तेस देशाकि राज्‍यपाल पिलातुस थिया। से रोम कि ओनि कम करना थिया। यहूदी परधाने यीशुर तेस कच़ा लेई आये। तेने चाहनेति कि पिलातुसे यीशुर मारि बिज़िबे सज़ा दितोरा लोई। च़े पिलातुसे यीशुर पुछ़िया, “खि तु यहूदियो कि रज्‍ज़ा भोइया?”

यीशुई जुवाब दिता, “तैईं छ़ेछ़ैईं बोलिया। पर मेरा राज्‍य पृथ्वी कि नूंऊं। अगर भुयंञ त मेरे दासे मेरा ओनि लड़ाई करिबे थिया। हऊं पृथ्वी पुटि परमेश्‍वरा बारेन सच बतइब आओरा भोऊं। हर एक मऊं ज़े सच्‍चाई सा दा करना से मेरा शुण्‍णां भो।” पिलातुसे लाई, “च़े सच़ खी भो?”

यीशु सा गप्‍पा करि पिच़ंञ, पिलातुसे भइरीं भीड़ा कच़ा गइकर बोलिया, “मूर एरा घाटे कोई कारण नाथुआ कि इ मऊं मारि बिज़िब ज़ोगा असे।” पर यहूदी परधाने ओ भीड़न मऊंई ज़ोरे हउशुइला बोलिया, “तेसर क्रुसा पुटि चढ़ई बिज़ो!” पिलातुसे जुवाब दिता, “से खीं गलत करिबे दोषी नूऊं।” पर तेने होरेक भि ज़ोरे हऊशुइब ठारुए। च़े पिलातुसे तीसरा फेरा बोलिया, “से दोषी नूंऊं!”

पिलातुस डरि गिया कि तेने दंगा न लोई च़ुख्‍फी किउरा, तेरे से अपें सैनिको द्वारे यीशुर क्रूसापुटि चढ़इबे ओनि मनि गिया। रोमी सैनिके यीशुर कोड़े लवाये, होरेक तेसर रज्‍ज़ेओ डबूं लवाया, होरेक यीशु कपा पुटि कण्‍णेओ कि ताज लवाया। च़े तेने इ बोलिकर यीशु कि मज़ाक उड़इब ठारुए, “हेरो, यहूदिउ कि रज्‍ज़ा!”