40. यीशुर क्रूसा पुटि चढ़इबा

यीशु कि ठट्टा करि पिच़ंञ, सैनिक यीशुर क्रूसा पुटि चढ़इब लेई गे। तेने तेस क्रूसर तेसिंञे उछ़ूइब किवाया ज़ेस पुटि यीशु मरल।

तेने सैनिको यीशुर तेस ठारि लेइकर आये ज़े “खोपड़ी” गणेओना असे होरेक तेसी हथर ओ खुरोर क्रूसा पुटि टख्‍फी करि बिदा। पर यीशुई बोलिया, “हे बा, इनोर माफ कर, किसबोलि इने न ज़ाण्‍णेन कि इने खि करनेन।” तेने एक तख्‍तिर भि तेसी कपा पुटि टोमि करि बिदा। तेस पुटि लिखोरा थिया, “यहूदिउ कि रज्‍ज़ा।” पिलातुसे तेनोर इ लिखिबे ओनि बोलोरा थिया।

च़े सैनिके यीशु डबुंआ ओनि डाक छ़इया। ज़ेखेंई तेने एरा किया त तेने भविष्‍यवाणिर पूरेरिया ज़े बोलनिति, “तेने मेरे डबुंओर बण्‍णिं बिदा, होरेक मेरे डबुंओं ओनि डाक छ़इया।”

“तेटि दुई डाकू भि थिये, ज़ेनोर सैनिके तेस्‍से मुके क्रूसा पुटि चढ़ायाति। तेन दुयोर यीशु कि दुइयो आरच़ी थेओरा थिया। तेन दूयो बिच़ंञ एक डाकुई यीशु कि मज़ाक उड़ाया, पर अइकी लाई, “खि तुर डर नइना-आ कि परमेश्‍वर तुर सज़ा देल? अस्‍पीं मस्‍स मदम कमों करिबे ओनि दोषी असु, पर इ मऊं निर्दोष भो।” च़े तेनी यीशुर बोलिया, “ज़ेखेंई तपीं तेपें राज्‍यन गाल त मूर हीत थेओ।” “यीशुई जुवाब दिता, “अज्‍ज़े तु मूं सा स्वर्गा राज्‍यन भोल।”

यहूदा परधाने ओ भीड़ा मऊंवीं यीशु कि मज़ाक उड़ाया। तेने तेस सा लाई, “अगर तपीं परमेश्‍वरा कोआ भोई त, क्रूसंञ ओसि बिज़ होरेक तपींर बच़ई बिज़! च़े असे तु पुटि विश्‍वास करले।”

च़े तेस देशाकि पूरा सर्ग क्रिठुई गिया, से दिया कि मुके थिया। इ दिया मुके क्रिठुआति होरेक त्राई घण्‍टे च़ेक होरी छ़ुटाति।

च़े यीशुई ज़ोरे हक खनि बोलिया, “पूरुआ! हे बा, हऊं मेपां आत्‍मा तेपें हथा सौंपनू।” च़े यीशुई अपां कपा झुकई प्राण त्‍यागि बिदा। ज़ेखेंई यीशु मरिया त एक भुंयोल आया। से मोड़ा पर्दा ज़े मऊंओर परमेश्‍वरंञ दूरा करना थिया बेयंञ बुल्‍लिर ठो च़ीरुई कर दुई खण्‍नी भुई गिया।

अपां मरिबे द्वारे, यीशुई मऊंआ ओनि परमेश्‍वरा कच़ा अइबे ओनि बत खोई बिदा। ज़ेखेंई यीशु कि निगरानी करना एक सैनिके ज़े बी भुआति इ बदे कइया त तेनी बोलिया, “छ़ेछ़ेईं, इ मऊं निर्दोष थिया। इ परमेश्‍वरा कोआ भो।”

च़े यूसुफ-ओ नीकुदेमुस नाऊंआ कि दुई यहूदी अगुवे आये। तेने विश्‍वास करने थिये कि यीशु-ए मसीह थिया। तेने पिलातुसंञ यीशु कि फुकर गेठा। तेने तेसी फुकर डबूंअन जिलबी किया। च़े तेने तेसर एक टिकरिंञ कटि कर बणांओरा कब्रन लेई गे होरेक तेसी अण्‍डीं छ़ई छ़ईया। च़े तेने तेस कब्रा द्वारर बंद करिबे ओनि एक मोड्डा रुण रुढ़ई बिदा।