41. परमेश्‍वर यीशुर मूरेओ बिच़ंञ ज़िनेरना असे

सैनिके यीशुर क्रूसा पुटि च़ढ़ई बिज़िबे पिच़ंञ, यहूदी परधाने पिलातुसा सा लाई, “तेनी हफ्‍साठू, यीशुई लाईति कि से त्राई दियो पिच़ंञ मरी कर ज़ीनुई गाल। केसोआरा इ पक्‍का करीबोनी कब्रा निगरानी करिब पड़ल ताकि यीशु च़ेल्‍ले यीशु फुकर च़ोरी कर लेई गिउरे न लोई। अगर तेने एरा करले त तेने बोलेले कि से मरी कर बी ज़ीनुई गिया।”

पिलातुसे लाई, “मिन सैनिकोर लेई गाओ, होरक ज़ेरा तुप्‍सीं करि बटो तेरी कब्रा निगरानी करो।” तेरे तेने तेस कब्रन अण्‍डुइबे द्वारा कि रुणा पुटि एक मोहर लवई बिदा। तेने इ पक्‍का करिबोनी तेटी सैनिकोर बी बिठई बिदा कि केन्‍नी बी यिशु फुकर च़ोरी बटोरा न लोई।

यीशु मरिबे होर्दी नह्च़ि करिबे धियाड़ा थिया। कन्‍नुई बी नह्च़ि करिबे धियाड़े कम करि नोटनाति, तेरे यीशु की कऊं बी साति कब्रन नायाति। पर नह्च़ि करिबे धियाड़े अघरीं दी, दोतैंई राती, मिन ज़लऊं ठो यीशु कब्रन गईबोनी छक्‍कन भूए। तेने यीशु फुका पुटि होरक बी मसालेर लवईबा चाहन्‍नेति।

तेनो ज़लऊवों कि अपरिबे अगरंञे, कब्रा पुटि एक मोड़ा भूंयोल आया। स्‍वर्गंञ एक स्‍वर्गदूते अईकर तेस रुणर घिरई बिदा ज़े कब्रा कि अण्‍डुईबे द्वारन घटोरा थिया होरक तेस पुटि बेशी गिया। इ स्‍वर्गदूत प्रागेठो च़ल्‍कनाति। कब्रा पुटि ज़े सैनिको थिये तेने स्‍वर्गदूतोर कया। तेने एतोक डरि गेति कि मूरेओ ठो धरत्री पुटि झ़ई गे।

ज़ेखैंई तेने ज़लऊं कब्रन अपरी त तेनी स्‍वर्गदूते तेनोसा लाई, “म डरो। यीशु इटि नाई। से मरि कर बी ज़िनुई गिउरा असे, ज़ेरा तेनी लाईति कि से ज़िनुई गाल! कब्रन लोओ होरेक इसो-ओसो हेरो।” तेने ज़लऊंवीं कब्रा अंदर ओर ज़ेटि यीशु कि फुक थैओर थिया तेटि लोया होरक हैरिया कि तेसी फुक तेटी नोथा!

च़ा तेनी स्‍वर्गदूते तेनो ज़लऊंवों सा लाई, “गईकर तेसी च़ेल्‍लेओर बताओ, ‘यीशु मरि कर बी ज़िनुई गिउरा असे होरक से तुप्‍सेयों अघरीं-अघरीं गलीलारी गाल।’”

तेने ज़लऊं ठट्ट भुए होरक मस्‍स तुषि गे। तेने च़ेल्‍लेओर इ रुठू खबर शुंड़ईबोनी द्रो दी गे।

ज़ेखैई तेने ज़लऊं च़ेल्‍लेओर इ रुठू खबर बतईबोनी बत्ताए थिये, त यीशु प्रगट भूई गिया। तेने यीशु खुरोन झ़ई गे। च़ा यीशुई लाई, “म डरो। गईकर मेरे च़ेल्‍लेयो सा गलील गईबेर बोलो। तेने तेटी मूर हैरले।”