42. यीशु स्‍वर्गारी पलाटुई गाना असे

ज़ेस दिया परमेश्‍वरे यीशुर ज़ीना कियाति, यीशु कि दूई च़ेल्‍ले कच़ा कि नगरिन गानेति। हण्‍णें ज़ेंञ तेने यीशु सा ज़े भुआति। तेस बारेन गप्‍पे करनेति, तेनोर आस थिया कि से मसीह थिया, पर तेखैंई बी यीशुर मारी बिदोरा थिया। हेबे तेने ज़लऊं बोलनेन कि यीशु फिरी ज़ीनुई गिउरा असे। तेने ज़ाण्‍णे नोथे कि केस गप्‍पे पुटि विश्‍वास करीबा असे।

यीशुई तेनो कच़ा अईकर तेनो सा हणिंबा च़ुख्‍सि किया, पर तेने यीशुर प्रियांयी नोटे। यीशुई पुछ़िया कि तेने केस बारेन गप्‍पा करनेति। तेने यीशुर फरकुंए धियाड़ेन यीशु सा भुरा बदे मामले बारेन बताया। तेने च़ेता कि तेने कउंआ परदेशी सा गप्‍पे करने थिये ज़े न ज़ाण्‍णेति कि यरुशलेमन खि भुआति।

च़ा यीशुई तेनोर समझाया कि परमेश्‍वरा वचन मसीह बारेन खि बोलना असे। मस्‍स अघरंञ, परमेश्‍वरा तरफे बोलने-ए लाईति कि मदम मऊं मसीहर दु:ख देले होरेक मारी बिज़ेले। पर परमेश्वरा तरफे बोलने-ए इ बी लाईति कि से त्राई दिये ज़िनुई गाल।

ज़ेखैईं तेने तेस नगरीन अपरे ज़ेटी तेने दूई मऊं बेशिबा चाहनेति, तेखैईं च़ेक लगभग सनुई गिउरा थिया। तेने यीशुर तेनौ सा बेशिबोनी बुलाया, तेरे करि से तेनो सा एक घरे आया। ब्‍याली खइबोनी तेने बेशी गे। यीशुई एक रोटीर लेईकर बगताओनी परमेश्‍वरर शबस किया, च़ा तेसर त्रोया। अचानके, तेने ज़ाईं बिदा कि से यीशु थिया। पर तेस्‍से मुके, यीशु तेनो सामटेंञ हरुई गिया।

तेने दूई मऊंवीं एम्‍फेयों बिच़ा लाई, “से यीशु थिया! इनीकरी ज़ेखैंई तेनी अप्‍सेयोंर परमेश्‍वरा वचनर समझायाति त अप्‍सीं मस्स तुठोरे थिये!” तेखैईंए, तेने निसीकर पलाटुई यरुशलेमारी गे। ज़ेखैंई तेने अपरे त तेने च़ेल्‍लेयोर बताया, “यीशु ज़ीना असे! असे यीशुर कइया।”

ज़ेखैंईं च़ेल्‍ले गप्‍पा करनेति, यीशु अचानके तेस पूरीन तेनो सा प्रगट भुआ। तेनो सा लाई, “तुप्‍सेयोंर शान्‍ति हतेओरा लोई!” च़ेल्‍ले च़ेता कि से कऊंआ शैतान थिया, पर यीशुई लाई, “तुसे किस डरनूं ? तुसे इ किस न च़ेण्‍नूं कि इ छ़ेछ़ैईं हऊं, यीशु भोऊं? मेरे हथो खुरोर हेरो। शैतानंञ एरा फूक नूईबा ज़ेरा मूकींञ असे।” इ हैरालिब ओनि कि यीशु कऊंआ शैतान नोथा, तेनी खईबोनी खींया गेठा। तेने तेसर मछ़ोकि एक खण्‍नी दिता, होरक यीशुई तेस खई बिदा।

यीशुई लाई, “मू बारेन परमेश्‍वरा वचन ज़े खीं बी बोलना असे से भूई गाल। मेईं तुसोर बतई बिदाति कि इसी भूईबा ज़रुरी असे।” च़ा यीशुई तेनोर परमेश्‍वरा वचन रुठू करि समझ़ाया। यीशुई लाई, “मस्‍स अगरंञ परमेश्‍वरा तरफे बोलने तेने लिखियाति कि मूर, मसीहर दु:ख उछ़ुईबेर भोल, मरिबे भोल होरक फिरी त्राई दिये मूर मूरेओंञ ज़िनुईबा भोल।”

“तेने परमेश्‍वरा तरफे बोलने-ए इ बी लिखियाति कि मेरे च़ेल्‍ले परमेश्‍वरा वचना घोषणा करेले। तेने हर एकीर पश्‍चाताप करिबोनी बताले। अगर तेने एरा करले त परमेश्‍वर तेनो पापर माफ करल। मेरे च़ेल्‍ले इस उज़ाबा प्रचार करिबा यरुशलेमंञ च़ुख्‍सी करेले। च़ा तेने बदे ठारी, बदे ज़ातियोन गाले। तुप्‍सीं मेरी हर एक गप्‍पेओ होरेक कमा गवाही भोऊ ज़े मैंईं लाई ओर किया, होरक तेस बदेओ की बी ज़े मू सा भोल।”

अगरीं दूई बी धियाड़े दौरान, यीशु अपें च़ेल्‍लेयोर केतिया फेरा प्रगट भुआ। एक फेरा त यीशु एकी मुके पन शऊंअञ मस्‍स मऊंओर कउआ! तेनी अपें च़ेल्‍लेयो पुटि केई तरीको सा साबित किया कि यीशु ज़ीना थिया, होरक यीशुई तेनोर परमेश्‍वरा की राज्‍य बारेन शिक्षा दिता।

यीशुई अपें च़ेल्‍लेयो सा लाई, “परमेश्‍वरे मूर स्‍वर्गा धरता की हर एक मऊं पुटि शासन करिबे अधिकार दितोरा असे। इकरी हेबे हऊं तुप्‍सेयों सा बोलनूं: गईकर बदे जातियो की मऊंओर च़ेल्‍ला बणाओ। एरा करिबेओनि, तुप्‍सेयोंर तेनोर बा, कोआ ओ पवित्र आत्मे नावां सा बपतिस्‍मा दिबा असे। ज़े खीं बी मैंई तुप्‍सेयोंर हुकुम दितोरा असे तेने बदे गप्‍पेयोर मनीबा बी तुप्‍सेयोंर तेनोर शिखरईबा असे। हित थेओ, हऊं हमेशा तुप्‍सेयों सा बेशू।”

यीशु मूरेंञ ज़िनुई गईबे दूई बी धियाड़ेओ पिच़ंञ, यीशुई अपें च़ेल्‍लेओ सा लाई, “ज़ेखैंई च़ेक मेरा बा तुप्‍सेयोंर तागत दी न बिज़ल तेखैंईं च़ेक यरुशलेमन च़ोखि बेशो। बा तुप्‍सेयों पुटि पवित्र आत्‍मा बिज़िबेर एरा करल।” च़ा यीशु स्‍वर्गन उठि गिया, होरक बदड़े यीशुर तेनो टिरेओंञ युंकईं बिदा। स्‍वर्गन यीशु बदे चीजा पुटि शासन करिबेर परमेश्‍वरा सुचंञारिंञ बेशी गिया।