43. कलीसिए कि शुरुआत भोना असे
यीशु स्वर्गारी पलाटुई गई पिच़ंञ, च़ेल्ले यरुशलेमनए च़ोखे ज़ेरा कि यीशुई तेनोर करीबे हुकुम दिताति। तेठा विश्वासी मऊं लगातार एक साथे प्रार्थना करिबोनी कठ्ठ भूईला करने थिये।
हर वर्षा, फसह की त्यौहारा की दूई बीओ दश धियाड़ेओ पिच़ंञ, यहूदी मऊं पिन्तेकुस्त नावां की एक खास दीयर मनईला करने थिये। पिन्तेकुस्त से धियाड़ा थिया ज़ेखैंई यहूदी मऊं गेहूं लुईंबे धियाड़ा मनईला करने थिये। बदे संसारंञ यहूदी मऊं पिन्तेकुस्ता धियाड़ेर एक साथे मनईबोनी यरुशलेमन आओरे थिये। इस वर्षा, पिन्तेकुस्त मनईबे धियाड़ा यीशु की स्वर्गारी उठी गईबे की लगभग एक हफ्ते पिच़ंञ आओरा थिया।
ज़ेस मुके बदे विश्वासी मऊं एक साथे कठ्ठ थिये, त ज़ेस घरे तेने थिये अचानके से घर मस्स बालुईं च़ाले सा भरुई गिया। च़ा अगी लारनि घाटे कईना बदे विश्वासियो कि कपा पुटि प्रगट भुआ। तेने बदे पवित्र आत्मेंञ भरुई गे होरक तेने अयक भाषेन परमेश्वरा स्तुति किया। इ तेने भाषाओ थिए ज़ेसर तेनोर पवित्र आत्मे बोलिब ज़ोगा कियाति।
ज़ेखैंईं यरुशलेमन बेश्ने मऊंवी तेस हल्लेर शुंया, त तेने भीड़न इ हैरिबोनी कठ्ठ आए कि खी भोइब लगोरा थिया। तेने विश्वासियोर परमेश्वरे किउरा मोड़े-मोड़े कमो की एलान करने ज़ेञ शुंया। तेने ठट्ट थिये किसबोली तेने तेस कमोर अपांए भाषेन शुन्नेति।
एनो बिच़ंञ कऊंआ मऊंवीं लाई कि तेने च़ेल्ले मतोरे थिये। पर पतरस खा भुआ होरक तेनोसा लाई, “मेरा गप्पा शुंणो! इने मऊं मतोरे नाईं! इसी बजाए, ज़े तुप्सीं हैरनू से सेए भो ज़े योएल परमेश्वरा तरफे बोलने तेनी लाईति कि भोल: परमेश्वरे लाई, ‘अंता मुके, हऊं मेपां आत्मा तुसो पुटि उंडेलू।’”
“हे इस्राएली मुशुल्लेओ, यीशु एक एरा मऊं थिया ज़ेनी इ हैरालिबोनी कि से कऊं थिया मस्स अनोखे कमो किएति। तेनी परमेश्वरा सामर्था सा केतेक्बा अनोखे कमोर किएति। तुप्सीं इ ज़ान्ने भोऊ, किसबोली तुप्सें इने कमोर हैरोरा भो। पर तुप्सें यीशुर क्रूसा पुटि चढ़ई बिदा!”
“यीशु मरि गिया पर परमेश्वरे यीशुर मूरेओ बिच़ंञ ज़िनेरी बिदा। इनी तेस गप्पेर पूरेरि बिदा ज़ेसर एक परमश्वरा तरफे बोलने लिखियाति: ‘तपीं अपें पवित्र मऊंर कब्रन त्रकिब न देल।’ अप्सीं गवाह भोऊं कि परमेश्वरे यीशुर फिरि ज़िनेरी बिदा।”
“परमेश्वर बाए हेबे यीशुर अपां सुचंञारिंञ बिठईकर यीशुर आदर दितोरा असे। होरक यीशुई अप्सेयोंओनी पवित्र आत्मा बिदोरा असे ज़ेरा कि तेनी वाईदा कियाति कि से बिज़ल। पवित्र आत्मा तेने कमोर भुईब देना ज़ेनोर तुप्सीं हैरनुनहोर शुंन्नू।”
“तुप्से तेस मऊं, यीशुर क्रूसा पुटी चढ़ई बिदा। पर पक्का ठो ज़ांई बिज़ो कि परमेश्वरे यीशुर बदे चीजो पुटि प्रभुहोर मसीह दूइयो ठहराओरा असे!”
पतरसा की शुण्णेतेने मऊं पतरसे बोलोरे गप्पेओ सा अंदर च़ेक लुकी गिउरै थिये। इनीकरी तेने पतरसो तेने च़ेल्लेओ सा पूछ़िया, “हे भाइयों, अप्सेयोर खि करिबा लोई?”
पतरसे तेनोर जुवाब दिता, ”तुसो बिच़ंञ हर एक मऊं मेपें पापोओनी पश्चाताप करो ताकि परमेश्वरे तुसो कि पापोर माफ किउरा लोई, होरक तुसे यीशु मसीह नाउवें बपतिस्मा लेउरा लोई। च़ा से तुसोर आशीषा रूपन पवित्र आत्मा बी देल।”
पतरसे ज़े बोलिया तेस पुटी लगभग त्राई हजार मऊंवें विश्वास किया होरक यीशु च़ेल्ले बणी गे। तेने बपतिस्मा लैया होरक यरुशलेमा की कलीसिए हिस्सा बणीं गे।
ज़ेखैंईं प्रेरिते तेनोर शिक्षा दिता त विश्वासिए लगातार शुंयां। तेने लगातार हतुईला करनेति होरक एके साथे बगत खईला करनेति, होरक तेने मस्स करि एन्फेयोओनी प्रार्थना किया। तेने मिलिकर परमेश्वरा की स्तुति किया होरक ज़े खिं बी तेनो कच़ा थिया तेने एन्फेयो बीच़ा बण्निया। नगरी हर एक मऊं तेनोओनी रुठू विचार थैण्णे थिये। रोज-रोज, केतोक्बा मस्स मऊं विश्वासी बण्ला गिए।
प्रेरितो की कम 2 अंञ एक बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।