44. पतरस ओ यूहन्‍ना एक भिखारीर अईन करने असुन

एक झा, पतरस ओ यूहन्‍ना मंदरन गे। एक लट्टा मऊं भीख मंञीबोनी बैठोरा थिया।

पतरसे तेस लट्टे मऊंआरी हैरियाओर लाई, “मूं कच़ा तपींर दीबोनी ढबुआ त नाईं। पर ज़े मूं कच़ा असे से हऊं तपींर देनूं। यीशु नाउवें, उठोर हण!”

तेखैईं, परमेश्‍वरे तेस लट्टे मऊंर अईन करि बिदा। तेनी इसो-ओसो हणिबा ओ छवा दीबा, होरक परमेश्‍वरा स्‍तुति करिबा चुख्‍फी करि बिदा। मंदरा अंञान आओरे मऊं ठट्ट थिये।

यूरनाए मस्‍स मऊं तेस मऊंर हैरिबोनी आये, ज़े अईन भुआति। पतरसे तेनोसा लाई, “इ मऊं अईन असे, पर इस गप्‍पे पुटि ठट्ट म भोओ असे इसर तागतासा अईन न किया, या तेरे न कि अप्‍सीं परमेश्‍वरा आदर करने असु। पर, से यीशु भो ज़ेनी इस मऊंर अपें तागता सा अईन किया, किसबोली असे यीशु पुटि भरोसा करने असु।”

“से तुस्‍पीएं भोउ ज़ेने यीशुर रोमी राज्‍यपालर यीशुर मारि बिज़िबेर लाइति। तुसे तेस मारि बिदा ज़े बदेओर जीवन देना असे। पर परमेश्‍वरे यीशुर मूरेओंञ ज़ीना किया। तुप्‍सें न समझ़िया कि तुप्‍सीं खी करनेति, पर ज़ेखैंईं तुप्‍सीं तेनो कमोर करिब लगोरे थिये, च़ा ज़े भविष्‍यहैरालने लाईति से पूरुआ। तेने लाइति कि मसीह दु:ख उठाल होरक मरी गाल। परमेश्‍वरे इसर इस तरीके सा भूईब दिता। तेरे हेबे, पश्‍चाताप करो होरक परमेश्‍वरारी पलाटेओ, ताकि यीशुई तुईंफा पापोर धोई बिदोरा लोई।”

ज़ेखैंईं मंदरा परधाने पतरसो यूहन्‍नेर शुंया, त तेने मस्‍स डरि गे। तेरे तेने तेसर प्रई कर कैदखानेन छई बिदा। पर ज़े पतरसे लाईति तेस पुटि मस्‍स ज़ेञ मऊंए विश्‍वास किया। यीशु पुटि विश्‍वास करने तेने बढ़िकर लगभग पन हजार भूई गे।

होर्दी, तेने यहूदी परधाने पतरसो यूहन्‍नेर मोड़े यहूदी पुजारिओर होरक परधानों सामटे लेई आए। तेने तेस मऊंर बी लेई आये ज़े लट्टा थिया। तेने पतरसो यूहन्‍नेर पुछ़िया, “केस अधिकारा सा तुसे तेस लट्टे मऊंर अईन किया?”

पतरसे जुवाब दिता, “इ मऊं ज़े तुप्‍सेयों सामटे खा असे तेसर यीशु मसीह कि तागते लेई अईन किउरा भो। तुप्सें यीशुर क्रूसा पुटि चढ़ईँ बिदा, पर परमेश्‍वरे यीशुर फिरी ज़ीना करि बिदा! तुप्‍सें तेसर न धिजिया, पर यीशु की सामर्थंञ इलावा मुक्‍ति हथेरिबे कि कोई अईक बत नाईं!”

तेने यहूदी परधानो ठट्ट थिये कि पतरसोर यूहन्‍ने मस्‍स याउआसा गप्‍पा कियाति। तेने कईया कि इने सीद्दे ओ अनपढ़ मुशुड्ले थिये। पर फिरी तेनोर हीत आया कि इने मुशुल्‍ले यीशु सा बैठेति। तेरे तेने तेनोसा लाई, “असे तुसोर मस्‍स सज़ा देऊंले अगर तुसे यीशु बारेन मऊंओर खींया होरेक उज़ाब देले त।” एरा मस्‍स ज़ेञ गप्‍पे बोलिबे पिच़ंञ, तेने पतरसो यूहन्‍नेर गईब दिता।