50. यीशु पलाटेओना असे

लगभग दुई हजार बरिउंञ दी, संसारन हर ठारि मस्‍स मऊं यीशु बारेन रुठ खबरर शुण्‍णेन। कलीसिया अगलिर बढ़ना। यीशुई बाईदा किउरा असे कि अंता मुके यीशु फिरि अयल। पर एबेंईं यीशु नये, तां बी प्रभु अपां वाईदेर पूरेरल।

जब कि अस्‍पीं यीशु कि अइबे ध्‍याड़ेर च़ोखि असू, परमेश्‍वर अस्‍प्‍योंर एरा घाटे जीवन ज़िवे इच्‍छा थेण्‍णां ज़े पवित्र भो ज़े तेसी आदर करना। ज़ेखेंईं यीशु पृथ्वी पुटि बेशनाति तेखेंईं तेनी बोलिया, “मेरे च़ेल्‍ले संसारा हर ठारि मऊंओर परमेश्‍वरा राज्‍य बारेन रुठू खबराकि प्रचार करले, च़े तेखेंईं अंत अइ गाल।”

केतेक्‍बा जाति मऊंवीं एबेंईं च़ेक यीशु बारेन न शुंइया। स्‍वर्गारी गईबेंञ अगरंञ, यीशुई मसीह मऊंओर रुठू खबर शुणंइबे ओनी बोलोरा असे ज़ेने कायां शुंरा नाईं। तेनी बोलिया, “गाओ होरेक बदे ज़ातिउ मऊंओर च़ेल्‍ला बणांओ!” होरेक “लुंईबे ओनी बगि फसल तियार असे!”

यीशुई इ बी बोलिया, “कऊं बी मऊं कि सेवक अपें मालिकंञ मोड़ा नुइबा। इस संसारा कि खास मऊंवीं मूर नफरत किया, होरेक मेरा बजहे तेने तुसोर बी सताले होरेक मारि बिज़ेले। इस संसारन तुसोर बर्दो भोल, पर ढक्‍कन बेशो, किसबोली मेंई शैतानर यह्र्बि करि बिदोरा असे ज़े इस संसारा पुटि शासन करना। अगर अंता च़ेक तुसे विश्‍वासा ज़ोगे बणिं बेशोले त, परमेश्‍वर तुसोर बच़ाल!”

यीशुई अपें च़ेल्‍लेओर इ समझ़ईबे ओनी एक कथा शुणांया कि ज़ेखेंई संसारा अंत भोल त मऊंओं सा खि भोल। तेनी लाई, “केनिआ मऊंवीं अपें बगि एक रुठू बेजा बाया। ज़ेखेंईं से निन्‍दरा थिया तेखेईं तेसी बइरि आया होरेक गेऊं कि बेजे बिच़ा जंगली बेजेओर बई बिदा, च़े से उठि गिया।”

“ज़ेखेईं ओईरी उब्‍दे त सेवके तेस मऊं सा लाई, ‘हे मालिका, तेपें त अपें बगिन रुठ बेजा बायाति। त च़ते इतन जंगली पौधे किस असुन?’ तेनी मऊंईं जुवाब दिता, ‘सिर्फ मेरे बईरि ए तेनोर बईबा चाहले। इ मेरे कऊंआ बईरि भो ज़ेनी एरा किउरा असे।”

“तेने सेवके एम्‍फ्‍यों मालिकर जुवाब दिता, ‘खि असोर जंगली ओइरिउर उपटि बिज़िब लोईना भोआ?’ तेनी मालिके बोलिया, ‘न। अगर तुसे एरा करोले त गेऊंर बी उपटि बिज़ोले। लुंइंबे मुके च़ेक च़ोखि बेशो। च़े जंगली घा कि पुल्‍टु ठोक्‍कन करि बिज़ो ताकि तुसे तेनोर त्राई बटोरा लोई। पर गेहूंर मेरे डाठेन लेई अयो।”’

च़ेल्‍ले इस कथई कि मतलब शुंञमि न किया, तेरे तेने यीशुर इसी मतलब शुंञमि करईबेर बोलिया। यीशुई लाई, “रुठू बेजा बाना प्रभु यीशु मसीहर हेरालना। बग संसारर हेरालना। रुठू बेजा परमेश्‍वरा कि राज्‍य कि मऊओर हेरालना।”

“जंगली ओईरि तेस मदम शैताना मऊंओर हेरालने असुन। तेस मऊं कि बईरि शैतानर हेरालना, ज़ेनी जंगली बेजेर बई बिदाति। लुंईबा इस संसार कि अंता ध्‍याड़ा हेरालना, होरेक लुंण्‍ने तेने परमेश्‍वरा कि स्‍वर्गदूतोर हेरालनेन।”

“ज़ेखेंई संसारा कि अंत भोल तेखेंई स्‍वर्गदूत तेनो बदे मऊंओर साथे ठोक्‍कन करेले ज़ेने शैताना भोन। तेने स्‍वर्गदूतो तेनोर डरोंआ गिठा अगिन फटई बिज़ेले। तेठा मऊं डरोंआ बर्दो सा रोलेले होरेक एम्‍फा दन च़िकेले। पर ज़ेने मऊं धर्मी भोले, ज़ेने यीशु गप्‍पे मनेले, तेने एम्‍फां परमेश्‍वर बा कि राज्‍य धुपा घाटे च़ल्‍केले।”

यीशुई इ बी बोलिया कि से संसारा अंत भुइबेंञ अगरंञ पृथ्वी पुटि अयल। से तेरी ठो अयल ज़ेरा से गियाति। मतलब, तेसिंञ रत मांसई फुक भोल, होरेक से सर्गा बदड़ा पुटि सवार भुई अयल। ज़ेखेंई यीशु पलाटेओल, च़े हर एक मसीह मऊं ज़ेने मरि गिउरे असुन ज़ीनुई गाले होरेक यीशु सा स्वर्गा हतेओले।

च़े ज़ऊं मसीही एबेंईं बी ज़ीने असुन तेनोर सर्गारि उछ़ुई बिज़ेले च़े होरेक मसिही मऊंओ सा शामिल भुई गाले ज़ेने मरि गिउरेओंञ ज़ीनेओरे भोले। तेने बदे ज़ेञ तेटि यीशु सा भोले। तेस पिच़ंञ, यीशु अपें मऊंओं सा बेशल। ज़ेखेंईं तेने साथे बेशेले त तेनो कच़ा हमेशे ओनी शान्‍ति भोल।

यीशुई तेस पुटि विश्‍वास करने तेनोर एक मुकुट दिबे वाईदा किउरा असे। तेने हमेशा कि ओनी परमेश्‍वरा साथे हर एक चीज़ा पुटि शासन करेले। तेनो कच़ा हमेशा शान्‍ति भोल।

पर परमेश्‍वर तेनो बदेओ कि न्‍याय करल ज़ेने यीशु पुटि विश्‍वास न करनेन। से तेनोर नर्कन छ़ई बिज़ल। तेटि तेने रोलेले होरेक दन पींह्ले, होरेक तेने हमेशा बर्दोन बेशेले। कद्‍दी न हिशेओना अग हमेशा तेनोर त्राइला थेल, होरेक जीवो तेनोर हमेशा खईला करेले।

ज़ेखेंईं यीशु अयल, च़े से पूरा रीति सा शैतान ओ तेसी राज्‍यर नाश करि बिज़ल। यीशु शैतानर नर्कन छ़ई बिज़ल तेटि शैतान हमेशा कि ओनी त्रइला छ़ुटल, तेनो बदेओर ज़ेने परमेश्‍वरा गप्‍पयोर मनिबे थुस शैताना पिच्‍छ़ीं हणिंबे चुनाव कियाति।

किसबोली आदम ओ हव्‍वे परमेश्‍वरा कि गप्‍पा न मनियाति होरेक पापर इस संसारन लेइकर आयेति, परमेश्‍वरे तेसर श्राप दिता होरेक नाश करिबे कि ठानिया। पर एक झा परमेश्‍वर एक खर्का स्‍वर्गो खर्का पृथ्वी बणांल ज़े सिद्ध भोल।

यीशु ओ तेसी मऊं तेस खर्के पृथ्वीन बेशेले, होरेक तेने हमेशा कि ओनी बदे चीज़ो पुटि शासन करेले। यीशु मऊंओं कि टीरेंञ हर आंखु दूशि बिज़ल। हेबे कऊं भि बर्दोन नुअल। तेने न रोलेले। तेने न दुखेले होरेक मरेले बी न। होरेक तेटि खीं बुराइ नुअल। यीशु अपें राज्‍य पुटि न्‍याया सा, होरेक शान्‍ति सा शासन करल। से हमेशा कि ओनी अपें मऊंओं सा बेशल।