49. परमेश्‍वरा खर्का वाचा

एक स्‍वर्गदूते एक छ़ोकरी मठी मरियम सा बोलिया कि तु परमेश्‍वरा कोएर जनम देली। से एबेंईं कुंवारी थी, पर पवित्रात्‍मा तेस कच़ा आया च़े से पेटाली भुई। तेनी एक कोएर जनम दिता ज़ेसी नाऊ यीशु थेइया। तेरे, यीशु परमेश्‍वर ओ मऊं दुइयो भो।

यीशुई केतेक्‍बा चमत्‍कारो किये ज़ेने हेरालनेन कि से परमेश्‍वर भो। से पांई पुटि हणिंया होरेक अंधड़ ब्‍यानेर धिप्‍पन किया। यीशुई केतेक्‍बा दुखोरे मऊंओर अइन किया होरेक केतेक्‍बा मऊंओं अंडीकिंञ मदम आत्‍माओर खनिया। तेनी मूरे मऊंओर ज़ीनेरिया, होरेक तेनी पन रोटि ओ दुई मछ़ा सा पन हजार मऊंओंर भरपुर बगत खिलाया।

यीशु एक महान मुंछी बी थिया। ज़े बी तेनी शिख्राया, से तेनी सिद्धांता सा शिख्राया। ज़े बी से मऊंओर करिबेर बोलना से तेनोर करिब लोईना भो, किसबोली से परमेश्‍वरा कोआ भो। उदाहरणा ओनी, यीशुई शिख्राया कि ज़ेरा तुसे तुस्‍प्‍योंर दा करनूं तेरी तुसोर होरिउ सा बी दा करिब लोईना भो।

यीशुई इ बी शिख्राया कि तुप्‍सेयोंर बदे चीज़ंञ मस्‍स होरेक तुईंपां जायदादंञ बी मस्‍स परमेश्‍वरर दा करिब लोइना भो।

यीशुई बोलिया कि संसारन कोसंञ बी चीजर हथेरिबेंञ करि मस्‍स रुठ असे परमेश्‍वरा कि राज्‍यन भूईबा। परमेश्‍वरा राज्‍यन गइबे ओनी ज़रुरी भो कि परमेश्‍वर तुसोर तुईयें पापंञ बच़ई थेल।

यीशुई बोलिया कि मिन मऊं यीशुर अपनाले। परमेश्‍वर तेनो मऊंओर बच़ाल। पर होरेक ज़ेंञ मऊं तेसर अपनाले न। यीशुई इ बी बोलिया कि मिन मऊं रुठू धर्त्रि घाटे भोन, किसबोली तेने यीशु बारेन रुठ खबरर अपनई बिज़नेन, होरेक परमेश्‍वर तेनोर बच़ाना। पर मिन मऊं बता कि ट्क-ट्क धर्ति घाटे भोन। परमेश्वरा वचन बता बेजे ठो झ़ण्‍णां, पर तेटि खीं न उब्‍ज्‍ना। इने मऊं यीशु बारेन खबरर न अपनानेन। तेने तेसी राज्‍यन गईबेंञ इंकार करि बिज़नेन।

यीशुई शिख्राया कि परमेश्‍वर पापीयो सा डरोंआ दा करना। परमेश्‍वर तेनोर माफ करिबा चाहना होरेक तेनोर अपां औलाद बणंइबा चाहना।

यीशुई इ बी बताया कि परमेश्‍वर पापा सा नफरत करना। किसबोली आदम ओ हव्‍वे बी पाप किया, तेरे तेनो कि बदे वंशजे बी पाप किया। इस संसारन बेशना हर एक मऊं पाप करना होरेक परमेश्‍वरंञ दूरे असे। हर एक मऊं परमेश्‍वरा बईरी भोन।

पर परमेश्‍वरे इस संसारन बेशने मऊओं सा एरा घाटे दा किया कि तेनी अपां एकलौता कोआ दी बिदा ताकि परमेश्‍वरे तेनोर सज़ा न लोई दितोरा ज़े तेस पुटि विश्‍वास करनेन। इसी बजाए, तेने हमेशा परमेश्‍वरा सा बेशेले।

तुसे मरिब ज़ोगे भोउ, किसबोली तुसे पाप किउरा असे। तुसो पुटि परमेश्‍वरा रोषुइबा ठीक भो, इसी ठारी, परमेश्‍वर यीशु पुटि रोषुआ। परमेश्‍वरे यीशुर क्रूसा पुटि मरि गईबे सज़ा दिता।

यीशुई कद्‍दी पाप न किया, पर तेनी परमेश्‍वरर सज़ा दीब दिता। तेनी मरि गईबा सवीकार किया। एरा करि, तुईंपा पापोर इस संसारन बेशने हर एक मऊंओं कि पापोर उछ़ुई लेई गईबे ओनी एक पूरा बलिदान थिया। यीशुई अपींर परमेश्‍वरा ओनी बलिदान करि बिदा, तेरे परमेश्‍वर कोसंञ बी पापर, इटि च़ेक कि डरोंआ मोड़े पापोर बी माफ करना।

बड़गे त अगर तुसे डरोंआ रुठू कमोर करनूं, त इसी द्वारे परमेश्‍वर तुसोर न बच़ाल। तेसी साथी बणिंबे ओनी एरा खीं नांई ज़े तुसे मपींञ करि बटोले। इसी ठारि, तुसोर विश्‍वास करिबा असे कि यीशु परमेश्‍वरा कोआ भो, होरेक से तुयां ओनी क्रूसा पुटि मरि गिया, होरेक इ बी कि परमेश्‍वरे यीशुर फिरि ज़िनेरिया। अगर तुसे इस पुटि विश्‍वास करोले त, परमेश्‍वर तुईंया पापोर माफ करल।

परमेश्‍वर हर एक तेस मऊंर बच़ाल ज़े यीशु पुटि विश्‍वास करना होरेक तेसर मेपां प्रभु सवीकार करना। पर से तेनोर न बच़ाल ज़ेने यीशु पुटि विश्‍वास न करनेन। इ खीं मायने न थेण्‍णां कि तुसे सउकार भोओ या गरीब, ज़लऊं भो या मुषुल्‍ड्ले, बुए भोउ या छ़ोकरे, या तुसे कोटि बेशनु। परमेश्‍वर तुसो सा दा करना होरेक चाहना कि तुसे यीशु पुटि विश्‍वास करो कि से तुईंया साथी बणिं बटोरा लोई।

यीशु तुसोर बुलाना कि तेस पुटि विश्‍वास करो होरेक बपतिस्‍मा लेओ। खि तुसे विश्‍वास करनुआ कि परमेश्‍वरा एकलौता कोआ, यीशु-ए मसीह भो? खि तुसे विश्‍वास करनुंआ कि तुसे एक पापी भोऊ होरेक इ कि तुसे परमेश्‍वरा कि सज़ा हतेरिब ज़ोगे भोऊ? खि तुसे विश्‍वास करनुंआ कि तुईंया पापार दुशिब ओनि यीशु क्रूसा पुटि मरि गिया?

अगर तुसे यीशु पुटि होरेक ज़े तेनी तुईयां ओनी किउरा असे तेसे पुटि विश्‍वास करोले त, च़े तुसे एक मसीही भोऊ! शैतान अपें अन्हारे राज्‍यन हेबे तुसो पुटि शासन न करना। हेबे परमेश्‍वर अपें प्रागाला राज्‍यन तुसो पुटि शासन करना असे। तेनी तुसोर पाप करिबेंञ रोकि बिदोरा असे, ज़ेसर तुसे करला करने थिये। तेनी तुसोर एक खर्का, सही जीवन दितोरा असे।

अगर तुसे एक मसीही भोऊ त ज़े यीशुई किउरा असे तेसी बजहे परमेश्‍वरे तुईयां पापोर माफ करि बिदोरा असे। हेबे, परमेश्‍वर एक बईरी ठारि तुसोर अपां एक जिगरी साथी मन्ना।

अगर तुसे परमेश्‍वरा साथी भोऊ होरेक प्रभु यीशु कि सेवक भोऊ त तुसे तेने गप्‍पयोर मनिबे कि इच्‍छा थेओले ज़े यीशु तुसोर शिख्राना। बड़गे तुसे एक मसीही भोऊ, शैतान अयता बी तुसोर पाप करिबे ओनी तुईंयां परीक्षा करल। पर परमेश्‍वर हमेशा से करना ज़े से बोलना कि से करल। परमेश्‍वर बोलना कि अगर तुसे तुईयां पापर मनि बिज़ो, च़े से तुसोर माफ करि बिज़ल। परमेश्‍वर तुसोर पापा विरोधन लड़िबे तागत देल।

परमेश्‍वर तुसोर प्रार्थना करिबेर होरेक तेसी वचन पढ़िबेर बोलना। परमेश्‍वर तुसोर होरेक विश्‍वासिउ सा हतुई कर तेसी अराधना करिबेर बी बोलना। तुसोर होरेक मऊंओंर बी बतइबा असे कि तेनी तुसो ओनी खि किउरा असे। अगर तुसे इने बदे कमो करोले, त च़े तुसे परमेश्‍वरा कि पक्‍के साथी बणिं गाओले।