48. यीशु-ए वाइदे कि मसीह भो

ज़ेखेंईं परमेश्‍वरे संसारर बणांया त बदे-दिर रुठू थिया। खीं पाप नोथा। आदम ओ हव्‍वा एम्‍फी दुयोर दा करने थिये, होरक तेने परमेश्‍वरा सा दा करने थिये। ना बिमारी थिया ना मरिबा थिया। परमेश्‍वर एरी घाटे दुनियेर चाहना थिया।

शैताने लोड्लू ज़रिये बगीचेन हव्‍वे सा गप्‍पा किया, किसबोली से तेसर धोखा दीबा चाहना थिया। तेखेंईं हव्‍वे ओ आदमे परमेश्‍वरा खिलाफन पाप किया। किसबोली तेने पाप कियाति तेरे पृथ्वी पुटि बेशने मऊं मरनेन।

किसबोली आदम-ओ हव्‍वे पाप कियाति, तेरे होरेक बी खीं मदम भुआ। तेने परमेश्‍वरा बइरि बणिं गे। ज़ेसी बजे, तेखेंइंञ दी हर एक मऊंवीं पाप किया। हर एक मऊं ज़मिबेंञ दी परमेश्‍वरा बइरि भोन। परमेश्‍वर ओ मऊंओं बिच़ा शान्ति नोथा। पर परमेश्‍वर शांति बणंईं थैइबा चाहना थिया।

परमेश्‍वरे वाइदा किया कि हव्‍वे बंश शैताना कपार घ्रेच़ल। परमेश्वरे इ बी लाई कि शैतान तेसी खुरोर डसल। एरा बी लाई, शैतान मसीहर मारि बिज़ल, पर परमेश्‍वर यीशुर फिरि ज़ीनेरल। इस पिच़ंञ, मसीह शैताना ताग्‍तर हमेशा कि ओनी खतम करि बिज़ल। केतेबा बरिउ पिच़ंञ, परमेश्‍वरे हेरालिया कि यीशुए मसीह भो।

परमेश्‍वरे तेस डढ़ंञ अपें टबरर बच़ाया ज़ेसर से अन्‍नाति। नूहर एक पांईं कि झाज़ बणंईब ओनी बोलिया एरा ठो परमेश्‍वरे तेनो मऊंओर बच़ाया ज़े तेस पुटि विश्‍वास करने थिये। एरा ठो, तेने बदे परमेश्‍वरा द्वारा मारि बिज़िबे ज़ोगा थिये किसबोली तेने पाप कियाति। पर परमेश्‍वरे तेने बदेओर बच़ईब ओनी यीशुर बिदा ज़े तेस पुटि विश्‍वास करने असुन।

केतिबा शऊ बरिऊ च़ेक, यहूदी पुजारी परमेश्‍वरा ओनी बलिदान चढ़ईला बेठे। इ दर्शाना असे कि मऊंए पाप किया, होरेक इ कि तेने परमेश्‍वरा द्वारा तेनोर सज़ा दिब ज़ोगे थिये। पर तेनो बलिदान तेनोकी पापर माफ करि नोटनाति। यीशु बदेओंञ मोड़ा यहूदी पुजारी भो। तेनी से किया ज़े कऊं बी यहूदी पुजारी करि नोटना थिया। तेनी से एक्‍के बलिदान भुईबे ओनी मपींर दी बिदा ज़े हर केसोआ पापोर मिटई बटना थिया। तेनी सवीकार किया कि परमेश्‍वर तेनो बदेओ की पापा ओनी तेसर सज़ा दितोरा लोई। इनी बजे, यीशु सिद्ध मोड़ा यहूदी पुजारी थिया।

परमेश्‍वरे अब्राहमा सा लाई, “हऊं तेपें द्वारा संसारा की बदे कुलोर आशीष देऊं।” यीशु एस्‍से अब्राहमा वंशज थिया। परमेश्‍वर अब्राहमा द्वारा बदे कुलोर आशीष देना असे, किसबोली ज़े यीशु पुटि विश्‍वास करने असुन परमेश्‍वर तेनो बदेओर पापंञ बच़ाना असे। ज़ेखेंईं इने मऊं यीशु पुटि विश्‍वास करने असुन, त परमेश्‍वर तेनोर अब्राहमा वंशज मन्‍ना असे।

परमेश्‍वरे अब्राहमर बोलिया कि से अपें कोएर, तेसी ओनी बलिदान करि बिज़। पर परमेश्‍वरे इसहाका मुंह्न्दे एक छ़ेल्‍ड्लू इंतज़ाम किया। अस्‍पीं बदे ज़ेंञ हईपा पापा बजे मारि बिज़िबे ज़ोगे थिये! पर परमेश्‍वरे हईंपा ठारि यीशुर बलिदाना रुपन दिता। इनी बजह तेरे अस्‍पीं यीशुर परमेश्‍वरा कि छ़ेड्ल्‍लू बोलनू।

ज़ेखेंईं परमेश्‍वरे मिस्रा पुटि अखिरी विपति बिदा त परमेश्‍वरे हर-एक परिवारर बोलिया कि तुसे एकि-एकि छ़ेल्‍ड्लू बलि करो। तेस छ़ेल्‍ड्लुन न लोई खींए दोष भूरा। च़े तेनोर एम्‍फां-एम्‍फां द्वारन तेसी रत लवईबा थिया। ज़ेखेंईं परमेश्‍वरे तेनो द्वारन रत कईया त परमेश्‍वर अगलिर उठि गिया च़ परमेश्‍वरे तेनोकि मुहंड्क्‍वें कोओर न मारिया। इ भुइब मुके परमेश्‍वरे इसर फसह कि त्‍योहार बोलिया।

यीशु फसह कि त्‍योहारा एक छ़ेल्‍ड्लू घाटे भो। तेनी कद्‍दी पाप न किया, तेरे तेतन खीं दोष नोथा। यीशु फसह कि त्‍योहारा मुके मरि गिया। ज़ेखेंए कऊं बि यीशु पुटि विश्‍वास करना असे, तेखेंइंए यीशु कि रत तेस मऊं कि पापा मुल चुकाना असे। इ एरा भो कि ज़ेरा परमेश्‍वर तेस मऊं कच़ंञ अगलि बढ़ि गिया, किसबोली परमेश्‍वर तेसर इ सज़ा दीबा न चाहन्‍ना थिया।

परमेश्वरे इस्राएला मऊंओं सा चेक वायदा किया, किसबोली तेने मऊं परमेश्‍वरा कि चुनोरे थिये। पर परमेश्वरे हेबे एक एरा खर्का वाइदा किया ज़े बत्‍तेओ ओनी थिया। अगर कोसंञ बी ज़ाति मऊं इस खर्के वाईदेर अपनाल, त से परमेश्‍वरा मऊंओन शामिल भुई गाल। से एरा तेरे करना किसबोली से यीशु पुटि विश्‍वास करना असे।

मूसा एक एरा घाटे परमेश्‍वरा तरफे बोलना थिया ज़ेनी परमेश्‍वरा कि वचनर बड़ा सामर्था सा प्रचार कियाति। पर यीशु बदे परमेश्‍वरा तरफे बोलनेओंञ मोड़ा भो। से परमेश्‍वर भो, तेरे ज़ेभि तेनी किया होरेक बोलिया से परमेश्‍वरा कम-ओ वचन थिये। तेरे पवित्रशास्‍त्र यीशुर परमेश्‍वरा कि वचन बोलना।

परमेश्‍वरे दाऊद रज्‍ज़ेर वाइदा कियाति कि रज्‍ज़े रुपन तेसी एक वंशज परमेश्‍वरा मऊंओं पुटि हमेशा कि ओनी शासन करल। यीशु परमेश्‍वरा कोआ होरेक मसीह भो, तेरे से रज्‍ज़ा दाऊदा कि वंशज भो ज़े हमेशा कि ओनि राज्‍य करि बटल।

दाऊद त इस्राएला रज्‍ज़ा थिया, पर यीशु पूरे संसारा रज्‍ज़ा भो! से फिरी अयल होरेक हमेशा कि ओनी न्‍याय ओ शान्‍ति सा अपें राज्‍यन शासन करल।