47. फिलिप्पीन पौलुसो सीलास
ज़ेखैईं शाऊले पूरा रोमी साम्राज्यन सफर किया त तेनी अपां रोमी नाऊं “पौलुसा” इस्तेमाल करिबा च़ुख्फि किया। एक झा, पौलुस-ओ तेसी साथी सीलास फिलिप्पी नगरीन यीशु बारेन रुठ खबर शुंणइब गे। तेने नगरी भईरीं नेंई मुखीं एक ठारि गे ज़ेटि मऊं प्रार्थना करिब ओनी ठोक्कन भूरे थिये। तेटि तेने लुदिया नाऊंआ कि एक ज़लऊं सा हतुए ज़े व्यापारी थी। से परमेश्वरर दा करनि थी होरेक परमेश्वरा कि आराधना करनिति।
परमेश्वरे लुदियेर यीशु बारेन उज़ाबा पुटि विश्वास करिबे ज़ोगा किया। पौलुसे ओ सीलासे तेसर-ओ तेसी टबरर बपतिस्मा दिता। तेनी पौलुसर-ओ सीलासर अपें घरे अईकर बेशो बोलिया, तेरे तेने तेटि बेठे।
पौलुस ओ सीलास मऊंओं सा ज्यातार तेस ठारि हतेओने थिये ज़ेटि यहूदी मऊं प्रार्थना करने थिए। रोज ज़ेखेंईं बी तेने ज़ेटि गानेति त एक दासी मठी ज़ेसर मदम आत्मा थिया से तेनोकि पिछा करनि थी। इस मदम आत्माए द्वारे से मऊंओर भविष्य बतानि ठो थी, एऱा ठो से भविष्य बतईकर अपें मालिको ओनी ढेर ढबुआ कमानि थी।
तेनो गइबे मुके इ दासी मठी हउशेओनी थी, “इने मुशुड्ले परम प्रधान परमेश्वरा सेवा करने भोन। इने तुसोर मुक्ति हतेरिबे बत हेरालनेन!” से रोज एरा करनिथी ज़ेनी लेई पौलुस रुषि गिया।
एक झा ज़ेखेंई तेनी दासी हउशुइबा च़ुख्फी किया, त पौलुसे तेसारि फिरिकर तेसी अण्डीं कि मदम आत्मईर बोलिया, “यीशु नाऊंवे एसी अण्डी किंञ निसि ग।” तेस्से मुके तेनी मदम आत्मई तेस छोड़ि बिदा।
तेस मठी कि मालिको डरोंआ रोषुए। तेनोर पता लगि गिया कि इ मठी मदम आत्मई मेतैंईं भविष्य बतई नोटली। इसी मतलब थिया कि मऊं हेबे तेसी मालिकोर डबोआ न देले कि से तेनोर भविष्य बतालि कि तेनो सा खि भोल।
तेरे तेस दासी मठी कि मालिके, पौलुसो सीलासर रौमि अधिकारिउ कच़ा लेई गे। तेने पौलुसो सीलासर कुटिया, होरेक कैदखानेन ढपि बिदा।
तेने पौलुसो सीलासर कैदन एरा घाटे ठारि थैइया ज़ेटि बदेओंञ जादा सिपाही थिये। इटि च़ेक कि तेने तेनो ठुड़ु कठोआ सा बनि बिदा। पर पौलुसो सीलास आध राति मुके, परमेश्वरा स्तुति घीत बोल्ला थिये।
अचानके, एक डरअईब ज़ोगा भुंयोल आया! कैदा कि बदे द्वारो उगुई गे, होरेक बदे कैदिउ कि ज़ंज़ीरो युह्प्सी करि गे।
च़े से दरोगा च़ेवि गिया। तेनी कईया कि कैदा द्वारो उगेओरे थिये। तेनी च़ेता कि बदे कैदी नशि गे। से डरि गिया कि बदे कैदी नशिबे बजे रोमी अधिकारी मूर मारि बिज़ेले, तेरे से अपींर मारि बिज़िबेर तियारुआ! पर पौलुस तेसर हेरिकर हऊशुआ, “च़ोख! तपींर नुक्सान मा-अपरा। असे बदे ज़ेंञ इट्ठीं असु।”
तेनी दरोगे डकिला पौलुसो सीलासा कच़ा अइकर पुछ़िया, “मुक्ति ओनी हऊं खि करु?” पौलुसे जुवाब दिता, “प्रभु यीशु पुटि विश्वास कर, चे तु ओ तेरा घराना मुक्ति हतेरले।” च़े से दरोगा पौलुसो सीलासर घरेआर लेई गिया होरेक तेनो ज़खमोर धोया। पौलुसे तेसी घरे तेनोर बदेओर यीशु कि रुठ खबर शुंणाया।
दरोगे ओ तेसी पूरा टबरी यीशु पुटि विश्वास किया, तेरे पौलुसो सीलासे तेनोर बपतिस्मा दिता। च़े दरोगे पौलुसो सीलासर बगत दिता, होरेक तेने साथे खुशी मनाया।
होर्दी नगरी परधाने पौलुसो सीलासर कैदंञ आज़ाद करि बिदा होरेक फिलिपींञ उठि गईबे ओनी बोलिया। पौलुसो सीलास लुदिया होरेक अपें साथिऊ सा हतुए तेस पिच़ंञ उठि गे। यीशु बारेन रुठ खबर अपरला किया, होरेक कलीसिया बढ़ला किया।
पौलुस ओ होरेक मसीह परधाने केतेक्बा नगरिउ कि सफर किया। तेनो मऊंओर यीशु बारेन रुठ खबर शुंणाया। तेने कलीसिये कि विश्वासिउर होरेक बी जादा संगति करिबे ओनी केतेक्बा डाको लिखिये। इनो बिच़ंञ मिन डाक बाइबला कि कताबो बणिं गे।
प्रेरितो की कम 16:11-40 च़ेक एक बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।