46. पौलुस मसीही विश्वासी बणिं गाना असे।
शाऊल नाउवां कि एक मऊं थिया ज़ेनी यीशु पुटि विश्वास किउरा नोथा। ज़ेखैंईं से छ़ोकरा थिया, तेखैंईं तेनी स्तिफनुसर मारने मऊंवों कि डबुआ निगरानी कियाति। पिच़ंञ, तेनी विश्वासिउर बर्दो दिती। तेनी यरुशलेमन घर-घरे गई ज़लऊं मुषुल्ड्लेओर गिरफ्तार करि कैदन ढपि बिदाति। तेखैंई मोड़ा यहूदी पुजारी शाऊलर दमिश्क नगरिआर गइब दिता। तेनी तेठा मसीही मऊंओर गिरफ्तार करि यरुशलेमार अणिबे ओनी शाऊलर बोलिया।
च़े शाऊले दमिश्कारि गईबा च़ुख्फी किया। तेस नगरी अपरिबे अगरञ, तेसी फेरे सर्गंञ एक प्रागा च़ल्किया, च़ से धत्रि पुटि झ़ई गया। शाऊले केसोआरा बोलिब शुंईंया, “हे शाऊल! “हे शाऊल! तु मूर किस सताना?” शाऊले पुछ़िया, “हे प्रभु, तपीं कऊं भोई?” यीशुई तेसर जुवाब दिता, “हऊं यीशु भोऊं। तु मूंर सताना!”
ज़ेखैंईं शाऊल खा भुआ च़े से हेरि नोटनाति। तेसी साथी ठो तेसर दमिष्कारि लेई गेति। शाऊले त्राई दियो च़ेक खीं खाओरा-पितोरा नोथा।
दमिश्का हनन्याह नाऊंवा कि एक च़ेल्ला थिया। परमेश्वरे तेसर लाई, “तेस घरेआर ग ज़ेटि शाऊल च़ोखोरा असे। तेपें हथर तेस पुटि थे ताकि तेनी फिरि कई बटोरा लोई।” पर हनन्याहे लाई, “हे प्रभु मैईं शुंरा असे कि इनी मऊंवीं विश्वासिउर केरा घाटे सताओरा असे।” परमेश्वरे तेसर जुवाब दिता, “गा! मैंईं तेसर यहूदिउन ओ होरेक ज़ातिउ मऊंओ बिच़ा मेरे नाऊंवां कि घोषणा करिबेओनी चुनी बिदोरा असे। से मेरा नाऊंआ ओनी मस्स बर्दो ज़ख्फि करल।”
च़े हनन्याह शाऊला कच़ा गिया, अपें हथर तेस पुटि थेई बोलिया, “यीशुई, ज़े तु अईबे मुके तू पुटि प्रकट भुआति, मूंर तु कच़ा बिदा ताकि तेईं फिरी कई बटोरा लोई, होरेक पवित्रात्मा तूर भरि बिज़ल।” तेरी शाऊल फिरि कईब ठारुआ, होरेक हनन्याहे तेसर बपतिस्मा दिता। च़े शाऊले बगत खाया होरेक फिरि तेतन जाह्न अई गिया।
तेखेईंञ दी, शाऊले दमिश्कन बेश्ने मऊंओं बिच़ा प्रचार करिबा च़ुक्फी करि बिदा। तेनी बोलिया, “यीशुए परमेश्वरा कोआ भो!” यहूदी मऊं ठट्ट थिये, किसबोली शाऊले त विश्वासिउर मारि बिज़िबे कोशिश किउरा थिया, पर हेबे तेनी यीशु पुटि विश्वास कियाति। शाऊले यहूदिउ सा बहस किया। तेनी हेरालिया कि यीशुए मसीह थिया।
एस्सी ध्याड़े पिच़ंञ, यहूदिये शाऊलर मारि बिज़िबे योजना बणांया। तेने तेसर मारि बिज़िबे ओनी नगरी अंडुईबे द्वारा मऊओर बिदा। कि तेसी निगरानी करेले पर शाऊले इस पाठि शुंई बिदा, होरेक तेसी साथी तेटिंञ बच़ि कर निसिबे ओनी तेसी मदद किया। एक राति तेने तेसर बल्ड्लिन बिठईकर नगरि भितिंञ बुल्लिर ओसालि बिदा। दमिश्कंञ बच़िकर निसि पिच़ंञ शाऊले यीशु बारेन प्रचार करिबा जारी थैया।
शाऊल प्रेरितो सा हतुईब यरुशलेमारि गिया, पर तेने तेस सा डरने थिये। तेखैंई बरनबास नाऊंआ कि विश्वासी शाऊलर प्रेरितो कच़ा लेइकर गिया। तेनी तेनोर कया कि शाऊले केरा डरिब मेतेईं दमिश्का प्रचार कियाति। तेस पिच़ंञ, प्रेरिते शाऊलर अपनाया।
मिन विश्वासी ज़ेने यरूशलेमा कि सतावंञ नशि गेति तेने अंताकिया नगरी उठि गेति होरेक यीशु बारेन प्रचार करनेति। अंताकिया बेशने मऊं यहूदी नोथे, पर पहली बार, तेनो बिच़ंञ मस्स ज़ेंञ मऊं विश्वासी बणिं गे। बरनाबास-ओ शाऊल खर्के विश्वासिउर यीशु बारेन होरेक बी मस्स शिख्रइबे-ओनी तेटि गे होरेक कलीसियेर मज़बूत किया। यीशु पुटि विश्वास करने मऊं पहली बार अंताकियान “मसीही” गणुंए।
एक झा, अंताकिया की मसीही मऊं ब्रता सा प्रार्थना करला थिये। पवित्रात्मई तेनौ सा लाई, “मेरा ओनी बरनबासो शाऊलर तेस कमर करिबे ओनी बिक्रे करि बिज़ो ज़े करिबेर मैंईं तेन दुयोर बुलाओरा असे।” तेरे अंताकिया कि कलीसिये बरनाबासो शाऊला ओनी प्रार्थना किया होरक तेनो पुटि एम्फा हतर थैया। च़े तेने होरेक बी मस्स ठारियार यीशु बारेन रुठ खबराकि प्रचार करिबे ओनी बिज़ छ़ईया। बरनवासो शाऊले पाठि-पाठि ज़ाति मऊंओर शिक्षा दिता, होरेक मस्स ज़ेञ मऊंवीं यीशु पुटि विश्वास किया।
प्रेरितों की कम 8:3; 9:1-31; 11:19-26; 13:1-3 च़ेक एक बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।