1. दुनिया आरु
इनी रोंगो टे सुरुवात गेन परमेश्वर नी सेबाई चीजो के आरुके। डीचनी छे दिन नौर गेन दुनिया गा एठा जो चोच्का डेन होय डी सेबाई के आरुके। परमेश्वर द्वारा पृथ्वी गा आरु गा बादोन डी अंधरा एठा खाली का डा, चोयाकी आए टाएन परमेश्वर नी डेन नी तुनिकाभी चीजो के बान आरुडुका डा। पेनो परमेश्वर गा आत्मा डा गा लिंजेन थंदळ डा।
डाबोलटे परमेश्वर नी मंडीके, “उजालायु!” एठा उजालाएन मेना। परमेश्वर नी डोके कि उजाला अच्छा होय एठा डीके “दिन” मंडीके। एठा डीचनी डीके अंधराटे अलग्गो के डीके डीचनी “राटो” मंडीके। परमेश्वर नी दुनिया आरुटे पेला दिन गेन उजाला के आरुकेनेच।
दुनिया आरु गा दूसरा दिन गेन परमेश्वर नी मंडीके, “डा गा मठान म्या अंतर डायु।” एठा म्या अंतर डाएन। परमेश्वर नी डी अंतर के “बादळा” मंडीके।
अफाई दिन गेन परमेश्वर नी मंडीके, “डा म्या जगान गोलायु, एठा लोखोळ ओटे डोयु होना।” डीचनी लोखोळ ओटे के “पृथ्वी” मंडीके एठा डा के “समुद्र” मंडीके। परमेश्वर नी डोके कि जो डीचनी आरुके डा डी अच्छा डा।
डाबोलटे परमेश्वर नी मंडीके। “पृथ्वी सेबाई रोंगो गा सिंज एठा रोपो ओटजू।” एठा येनोगोका डाएन। परमेश्वर नी डोके कि जो डीचनी आरुके डा, डी अच्छा डा।
दुनिया आरु गा उफुन दिन गेन परमेश्वर नी मंडीके, “बादळा गेन उजालानौर आरुयु।” एठा सूर्य, चंद्रा एठा इफीलकु ओटजे मेना। परमेश्वर नी दिकुके पृथ्वी लिंजेन उजाला जिऊ गा घल्जी एठा दिन एठा, मोसोमनौर एठा डा घामानौर गेन फारक दडा गा घल्जी आरुके।
मोनाई दिन गेन परमेश्वर नी मंडीके, “डा गेन जीटा जानवरकु भेट्टियु एठा बादळा गेन भुरिकू उळातिंजे।” इनी रोंगो टे डीचनी डा गेन उयार मिंकूसेबाई जंतुकू एठा भुरिकू के आरुकेकु। परमेश्वर नी डोके कि इनी अच्छा डा एठा दिकुके आशीष जीके।
दुनिया आरु गा तुरुईय्या दिन गेन परमेश्वर नी मंडीके, “ओटे लिंजेन थंदळ मिंकू सेबाई रोंगो गा जानवरकु आरुयु।” एठा परमेश्वर गा मंडीके रोंगो येनोगो डाएन। अदा जानवरकु फालतू डा, अदाकु ओटे लिंजेन गोसोर मिंकू, एठा अदाकु डोंगोरा जानवरकु डा। एठा परमेश्वर नी डोके कि इनी अच्छा डा।
डाबोलटे परमेश्वर नी मंडीके, “हेजे आबु कोरोकु के आपना रुपोन एठा आपना रोंगो आरुकुवा। डीच पृथ्वी लिंजेन एठा सेबाई जानवरकु लिंजेन राजो दडावा।”
इनिघल्जी परमेश्वर नी कासा साटे देटे कोरोकु के आरुकेकु एठा दियेन जीवन गा सांसो के होलोमके। इनी कोरो गा जीमू आदम डा। परमेश्वर नी आदम गा थंदळ गा घल्जी म्या खाट बगीचा के आरुके एठा डेगा देखभाल दडा गा घल्जी आदम के देटेन डोकेनेच।
डी बगीचा गा तालाबिचोन परमेश्वर नी बारी कास सिंज येंडाके-जीवन गा सिंज एठा भला एठा बुरा गा ज्ञान गा सिंज। परमेश्वर नी आदम टे मंडीके कि डीच डी बगीचा गा जीवन गा सिंज एठा भला एठा बुरा गा ज्ञान गा सिंज के आराटे अलग्गो तुनिकाभी सिंज गा फल के जोमे साकतावा होय। अगर डीचनी डी सिंज गा फल जोवे टासो मेटे डीच गुजूवा।
डाबोलटे परमेश्वर नी मंडीके, “कोरो गा घल्जी एकला थंदळ अच्छा बाऊ होय।” लेकिन तुनिकाभी जानवर आदम गा सेंग्गो बान आरुडुका।
इनिघल्जी परमेश्वर नी आदम के भारी दुनूम गेन येंडाकेनेच। डाबोलटे परमेश्वर नी आदम गा म्या सिपळी हाडे साटे दियाटे म्या जापाए के आरुकेनेच एठा डीचके आदम गा मेरान साटे हेन।
जब आदम नी डीचके डोकेनेच मेटे डीचनी मंडीके, “कम टे कम इनिज नी इंजा रोंगो होय! इनिज्के ‘जापाए’ मेंटो मंडेच्बा, चोयाकी इनिजके कोरो तालाटे आरुकेनेच मेना होय।” इनी वाजाटे आपना आंटे-बाटे के आरागेच्बा होय एठा आपना जापाए गा सेंग्गोन म्यागुवा होय।
परमेश्वर नी सना एठा जापाए के आपना रुपो गेन आरुकेकु। डीचनी दिकुके आशीष जीके एठा डीचनी मंडीके, घोनेच कोंकू एठा नातूकु-पंतुकु डाकु एठा पृथ्वी के भेट्टिकी!” एठा परमेश्वर नी डोके कि जो चोच्काभी डीचनी आरुके डा डी भेबाव अच्छा डा, एठा डी च डी सेबाई टे भेबाव कुसोके डा। इनी सेबाई दुनिया आरु गा तुरुईय्या दिनेन डाएन डा।
जब याईय्या दिन हेन मेटे जो चोच्का परमेश्वर दडा लक्के डा डीचनी डी सेबाई कामयनौर के स्याके। डीचनी याईय्या दिन के आशीष जीके एठा डीके पवित्र ठहरातिंज्के, चोयाकी डी दिन डीचनी सेबाई चीजो के आरु स्याके मेना डा। इनी रोंगो टे परमेश्वर नी दुनिया गा एठा जो चोच्का डेन होय डी सेबाईके आरुके।
उत्पति अध्याय 1-2 टे बाईबल गा म्या कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।