15. वायदा गा देशो

आखिरी गेन, नका डी टेमो हेन मेना डा कि इस्राएली कुरकू वायदा गा देशो, कनान गेन मोए। डी देशो गेन यरिहो जीमू गा म्या पूरा डा। दियागा सुरक्षा गा घल्जी डेगा उफुन भी कोनेन मजबूत दीवार डाफ यहोशू नी डी पूरा गेन बारी भेदीया किंज के कुल्केकिंज। डी पूरा गेन राहाब जीमू गा म्या रांडो थंदळ डाफ डीचनी इनी भेदीनौर के उखुके, एठा डाबोलटे बादोन डीचनी दिकुके पूरा टे बचातिंजटे ओट गा मदत डाके। डीचनी येनोगो इनिघल्जी डाके चोयाकी डीच परमेश्वर गेन विश्वास दडा डा। जो टेमो इस्राएली कुरकू यरिहो के नशोएवा मेटे दिकुनी राहाब एठा दियागा परिवार गा राक्षा दडा गा वायदा डाके डा।

इस्राएली कुरकू के वायदा गा देशो गेन मुगा घल्जी यरदन गडान दडा डा। परमेश्वर नी यहोशू टे मंडीके, “याजककु के पेला सेनडाए।” जब याजककु नी यरदन गडा गेन इकुगा फांगोल के डोके मेटे डा गा धार गा आडी रुकातिंजे, देटे कि इस्राएली कुरकू गडा गा दुसरा कोनेन लोखोळ ओटे लिंजेन हुधेळेन सेंजू होना।

डी कुरकू गा यरदन गडा पारजे मेटे परमेश्वर नी यहोशू टे मंडीके कि यरीहो लिंजेन हामला दडा गा घल्जी तैयार थंदळे, अगरका दिकु भेबाव पक्का पूरा डा। परमेश्वर नी डी कुरकू टे मंडीके कि दिकुके याजककु के तुरुई दिननौर टाएन डी पूरा गा उफुन कोनेन चक्कर येंडा होना होय। इनिघल्जी याजककु एठा सैनिककु नी येनोगो का डाके।

मेटे याई दिन, इस्राएली कुरकू नी डी पूरा गा उफुन भी कोनेन याई बार एठा चक्कर येंडाके। दिकुगा पूरा गा उफुन भी कोनेन याई बार चक्कर येंडा गा बादोन, याजककु नी पिंगी होलोम्के एठा सैनिककु नी जोरदार आवाज डाके।

मेटे यरीहो गा उफुन भी कोने गा दीवार बोचोएन! जैसा परमेश्वर नी हुकूम जीके डा इस्राएली कुरकू नी पूरा गा हर म्या चीजो के नशोके। दिकुनी बस राहाब एठा दियागा परिवार के आराके, जो इस्राएली कुरकू गा भागो आरोएन मेना डा। जब कनान गेन थंदळ मिंकू अलग्गो कुरकू नी आजुम्के कि इस्राएली कुरकू नी यरीहो के नशोके होय, मेटे दिकु हिघराएन कि इस्राएली कुरकू दिकु लिंजेन भी हामला डाएवा।

परमेश्वर नी इस्राएली कुरकू के हुकूम जीके डा कि कनान गेन थंदळ मिंकू तुनिकाभी जाटो गा सेंग्गोन शन्ति दडा बान होना होय। पेनो गिबोनियो जीमू म्या कनानी जाटो नी यहोशू टे लाबाळ मंडीके कि दिकु कनान टे लेंक्कीन म्या जगा गा थंदळ मिंकू होय। दिकुनी यहोशू टे दिकुगा सेंग्गोन शांति दडा गा अनुरोध डाके। यहोशू एठा अलग्गो इस्राएली अगुवाकु नी परमेश्वर टे बान कोम्बाराडुका कि दिकुन चोच दडा होना। येनेगा बाजाए, दिकुनी गिबोनियो गा सेंग्गोन शांति डोके।

आफाई दिन बादोन, इस्राएली कुरकून मालुम्जे मेना कि कनान गेन का थंदळ डा। दिकु खीजोएन चोयाकी गिबोनियो नी दिकुके धोका जीके डा। पेनो दिकुनी दियागा सेंग्गोन डाके मिनी डी शांति दडा के आरुका डोके चोयाकी दिकु परमेश्वर गा सम्मान ओले मेना डा। मेटे थोडा टेमो गा बादोन, कनान गेन थंदळ मिंकू म्या अलग्गो जाटो, एमोरिया गा राजाकु नी आजुम्के कि गिबोनियो नी इस्राएली कुरकू गा सेंग्गोन शांति डाके होय, इनिघल्जी दिकुनी इकु-इकुगा सेनाकु के म्याजागान टे म्या खाट सेना आरुके एठा गिबोन लिंजेन हमला डाके। गिबोनियो नी दिकुगा मदत दडा गा घल्जी यहोशू गा मेरान म्या खाबोर कुल्के।

इनिघल्जी यहोशू नी इस्राएली कुरकू गा सेना के गोलाके एठा गिबोनियो गा मेरान आदिरु गा घल्जी दिकु पूरा राटो सेंदराके। फेजेर आंगु गेन दिकुनी एमोरियो गा सेना के बिचार होळाकेकु एठा दिकु लिंजेन हमला डाके।

डी दिन परमेश्वर इस्राएली कुरकू गा लडाईवे। डीचनी एमोरियो के हिघराके एठा डीचनी खापेट-खापेट बाराप बोचोटे घोनेच्का एमोरियोकु के घोच्केकु।

परमेश्वर नी सूर्य के भी बादळा गेन म्या जागान रुकातिंज्के ताकि इस्राएली कुरकू के घाटाऊ टेमो घाटायु होना कि एमोरियो के पूरा खिजाटे हरातिंज्केकु होना। डी दिन, परमेश्वर नी इस्राएली कुरकू गा घल्जी म्या खाट जीटाऊ हासिलजे।

जब परमेश्वर नी डी सेनाकु के हरातिंज गा बादोन, घोनेच्का कनानी जाटो गा कुरकू इस्राएल लिंजेन हमला दडा गा घल्जी घोलाकेकु मेना। यहोशू एठा इस्राएली कुरकू नी हमला डाटे दिकुगा सर्वनाशो डाके।

इनी लड़ाई गा बादोन, परमेश्वर नी इस्राएल गा हारेक पिढी के वायदा गा डी देशो गेन डेगा भागो डाके। मेटे परमेश्वर नी इस्राएल के डेगा सेबाई एरिया लिंजेन शांति जीके।

जब यहोशू बुड्डाएन मेटे डीचनी इस्राएल गा सेबाई कुरकू के म्या सेंग्गोन हाकोकेकु। मेटे यहुशू नी डी कुरकू के यादो जीके कि दिकुनी डी वादा गा पालन दडा गा वायदा डाके डा जो परमेश्वर नी दिकुगा सेंग्गोन सीनै टुक्की लिंजेन टोल्के डा। डी कुरकू नी परमेश्वर गा प्रति विश्वास लायको थंदळ एठा दियागा नियमनौर गा पालन दडा गा वादा डाके।