50. यीशु डाबोलटे हिरावा होय

अंदजोटे २००० साल टे, दुनिया गेन सेबाई जगान घोनेचटेका घोनेच कुरकू मसीह यीशु गा बारेन अच्छा खबोर के आजुम लक्के होय। मसीह गा मण्डली फारे लक्के होय। यीशु नी वादा डाके कि डी दुनिया गा अंत गेन डाबोलटे हिरावा। अगरका डीच आए डाबोलटे बान हेजडुका होय तोभी डीच हेजा वादा के पूरा डाएवा।

जब कि आले यीशु गा डाबोलटे हिरा गा राह दोडोवा होय, परमेश्वर आलेटे येनोगो रिती टे जीवन बिबातातिंज गा इच्छा दडावा होय जो पवित्र होय एठा जो दियागा आदर दडावा होय। जब यीशु पृथ्वी लिंजेन थंदळ लक्के डा मेटे डीचनी मंडीके, “इंजा चेला दुनिया भोरेन सेबाई जगानौर गा कुरकू के परमेश्वर गा राज्य गा बारेन अच्छा खाबोर प्रचार डाएवा, एठा मेटे अंत हेजेवा।”

घोनेच्का का जाटोनौर नी आए टाएन यीशु गा बारेन बान अजुमडुका होय। स्वर्ग टे हिराटे पेला, यीशु नी मसीहकु टे डी कुरकू के अच्छा खबोर घागल गा घल्जी मंडीके दिकुनी इनिके चोलाका बान अजुमडुका होय। डीचनी मंडीके, “सेने एठा सेबाई जाटोनौर गा कुरकू के चेला आरूकु!” एठा “हिर गा घल्जी खिटी गा आनोजो हेन होय!”

यीशु नी इनी भी मंडीके, “तुनिका कोरो गा सेवक हेजा स्वामी टे खाट बाऊ होय। इनी दुनिया गा कास कुरकू नी इंजाटे नफरत डाके, एठा इंजा वाजाटे दिकु आपेके भी सतातिंजकोम्बा एठा गोजेच्बा। इनी दुनिया गेन आपे तक्लिप कोम्बा, पेनो मजबूत आरोए, चोयाकी इंज्नी शैतान के हरातिंज्केनेच होय जो इनी दुनिया लिंजेन राजो दडावा होय। अगर आपे आखरी टाएन इंजा विश्वास लायको आरुका थंदळे, मेटे परमेश्वर आपेके बचातिंजकोम्बा!”

यीशु नी हेजा चेलाकू के इनी ससामझातिंजा गा घल्जी म्या कहानी घाल्के कि जब दुनिया गा अंत डाऊवा होय मेटे कुरकू गा सेंग्गोन चोच डाऊवा। डीचनी मंडीके, “तुनिका कोरो नी हेजा खिटी गेन अच्छा बीजो बिटके। जब दिकु गिटिच लक्के डा मेटे दियागा दुश्मन हेन एठा गूंगा बीजो गा तालान डोंगोर कोम्बो गा बीजो के बिटके, एठा डाबोलटे डीच ओले मेना।”

“जब रोपो पिवळेन मेटे सेवककु नी डी कोरो टे मंडीके,‘हे स्वामी, आमनी मेटे हेजा खिटीन अच्छा बीजो बिटके डा। मेटे डाबोलटे एनेन डोंगोर रोपो चोया होय?’ डी कोरो नी जवाब जीके, ‘बस इंजा दुश्मन का डीके बिडेवा होय। इनी इंजा तुनिका दुश्मन होय डीचनी येनोगो डाके होय।’”

“डी सेवककु नी हेजा स्वामी के जवाब जीके, ‘चोच आलेके डोंगोर रोपो के तुठुट होना डा?’ डी स्वामी नी मंडीके, ‘बाने। अगर आपे येनोगो डाएवा मेटे आपे अदा गुं के भी तूडेवा। हिर गा टेमो टाएन तरागे। मेटे डोंगोर रोपो के गाठी गेन गोलाकी ताकि आपे जुल्की होना। पेनो गुं के इंजा ख्यारयान गेन सेगे।’”

चेलाकू नी इनी कहानी गा मतलब के बान समझातिंज डुका, इनिघल्जी दिकुनी यीशु टे दिकुके ससामझातिंजा गा निवेदान चोच। यीशु नी मंडीके, “अच्छा बीजो बिबिट कोरो मसीह गा मंडी अजोम्बा होय। खिटी दुनिया गा मंडी अजोम्बा होय। अच्छा बीजो परमेश्वर गा राज्य गा कुरकू गा मंडी अजोम्बा होय।”

“डोंगोर रोपो डी दुष्ट कोरो, शैतान गा कुरकू गा मंडी आजोम्बा होय। डी कोरो गा दुश्मन शैतान गा मंडी आजोम्बा होय, डीचनी डोंगोर रोपो के बिटके डा। हिर इनी दुनिया गा अंत गा मंडी अजोम्बा होय, एठा हिर मिंकू परमेश्वर गा स्वर्गदूतकु गा मंडी आजोम्बा होय।”

“जब दुनिया गा अंत डाऊवा मेटे स्वर्गदूत डी सेबाई कुरकू के म्या सेंग्गोन गोलाकुवा जो शैतान गा होय। स्वर्गदूत दिकुके म्या घोनेच्का गरम सिंगेल गेन टेप्पाकुवा। देटेन डी कुरकू भयंकर सताव गेन जम्बा एठा इकुगा तिळींज रिगीडेवा। पेनो जो कुरकू धर्मी होय, दिकुनी यीशु गा रोंगो का डाके होय, डीच दिकुगा परमेश्वर बाटे गा राज्य गेन सूर्य गा रोंगो चमकातिंजूवा।”

यीशु नी इनी भी मंडीके कि डीच दुनिया गा अंत डाऊटे पेला पृथ्वी लिंजेन हिरावा। डीच डीका तरीका टे डाबोलटे हिरावा जैसा डीच ओले डा। मतलब, दियागा मेरान टाकू कोम्बोर होंगा, एठा डीच आकाश गेन बादळा लिंजेन चुटटे हेजेवा। जब यीशु हिरावा होय, मेटे हर म्या मसीह जो गोएन मिठाच जाटे जीटाऊवा एठा दियाटे आकाश गेन

मेटे जो मसीह आए भी जिटाका होय डीच आकाश गेन टुलेच्बा एठा डी दूसरा मसीहकु गा सेंग्गोन बेल्लाऊवा जो गोएन मिंकुटे जीटाएन होय। दिकु सेबाईकु देटेन यीशु गा सेंग्गोन थंदळवा। डेगा बादोन, यीशु हेजा कुरकू गा सेंग्गोन थंदळवा। जब दिकु म्या सेंग्गोन थंदळवा होय मेटे दिकुगा मेरान हमेशा गा घल्जी पूरा शांति थंदळवा।

यीशु नी दिया लिंजेन विश्वास दडा मिंकू हर म्या कोरो के म्या मुकुट जिऊ गा वादा डाके होय। दिकु हमेशा गा घल्जी परमेश्वर गा सेंग्गोन हर म्या चीजो लिंजेन राजो दडावा। दिकुगा मेरान पक्का शांति होंगा।

पेनो परमेश्वर डी सेबाईकु गा न्याय डाएवा जो यीशु लिंजेन विश्वास बान दडा होय। डीच दिकुके नरक गेन येंडाकुवा। देटेन दिकु जम्बा एठा इकुगा तिळींज रिगीडेवा, एठा दिकु हमेशा तक्लिप बेन थंदळवा। चोलाका न चोलाका बान हिरीजू मिनी सिंगेल दिकुके टाऊ लगी जुल्कूवाका, एठा किळा दिकुके जोम टे चोलाकाभी बान रुराकातिंज।

जब यीशु हिरावा होय, मेटे डीच पूरा रितीटे शैतान के एठा दियागा राज्य के नशोएवा। डीच शैतान के नरक गेन येंडाएच्बा। डी शैतान हमेशा गा घल्जी जुलुका लक्कूवा, दिकु सेबाईकु गा सेंग्गोन दिकुनी परमेश्वर गा बातो के ममानातिंज गा बाजाए शैतान गा पिछा सेंदरा गा चुनाव डाके डा।

चोयाकी आदम एठा हव्वा नी परमेश्वर गा हुकूम के बान अजुम डुका डा एठा पापो के दुनिया गेन साटे हेन डा, परमेश्वर नी डीचके श्रापो जीके एठा डीचके नशो दडा गा निर्णय डाके। पेनो तुनिका दिन परमेश्वर म्या उनाई स्वर्ग एठा उनाई पृथ्वी के आरोएवा जो पक्का होंगा।

यीशु एठा दियागा कुरकू डी उनाई पृथ्वी लिंजेन थंदळवा, एठा दिकु हमेशा गा घल्जी सेबाई चीजो लिंजेन राजो डाएवा। डी कुरकू गा मेट टे हर म्या मेट गा डा के ओजोएवा। नका तुनिका तकलिप या कासु बान डाऊ। दिकु जाम बाने। दिकु बीमारु बाने या गुजू बाने। एठा देटेन चोच्काभी बुराई बान डाऊ। यीशु हेजा राज्य लिंजेन न्याय गेल्ला, एठा शांति गा सेंग्गोन राजो दडावा। डीच हमेशा गा घल्जी हेजागा कुरकू गा सेंग्गोन थंदळवा।