49. परमेश्वर गा उनाई वादा

म्या स्वर्गदूत नी म्या जवान जापाए मरियम टे मंडीके डीच परमेश्वर गा कोण के जनम जेवा। डीच आए कुंवारी डा, पेनो पवित्र आत्मा दियागा मेरान हेन एठा डीच लाज हेन। डीचनी म्या कोणटे के जनम जीके दियागा जीमू डीचनी यीशु डोके। इनिघल्जी, यीशु परमेश्वर एठा कोरो बर्खिंज होय।

यीशु नी घोनेच चमत्कार डाके जो घालेवा होय कि डीच परमेश्वर होय। डीच डा लिंजेन सेंदराके एठा धुंदळ के शांति के। डीचनी घोनेच्का बिमारी कुरकू के सजाकेकु एठा घोनेच्का कुरकू तालाटे भूतोकु के ओटकेकु। डीचनी गोएन मिंकू कुरकू के जीटाकेकु, एठा डीचनी मोनाई सोकळा एठा बारी काकू के ५००० कुरकू के चचारा गा घल्जी होना ओटो आटा गेन बदलाके।

यीशु म्या महान गुरूजी भी डा। जो चोच्का डीचनी इथुकेकु, डीके डीचनी पक्काऊ गा सेंग्गोन इथुकेकु। जो डीच कुरकू टे दडा गा घल्जी मंडीवा होय दिकु डीके दडा होना चोयाकी डीच परमेश्वर गा कोण होय। उदाहरण गा घल्जी, डीचनी इथुकेकु कि आपेके अलग्गो कुरकू के डीका रिती टे प्यार दडा गा जरुरत होय जैसा आपे खुद के प्यार दडावा होय।

डीचनी इनी भी इथुकेकु कि आपेके सेबाई चीजो टे जादा एठा आपना संपत्ति टे भी जादा परमेश्वर के प्यार दडा होना।

यीशु नी मंडीके कि दुनिया गेन तुनिकाभी चीजो के घाटाऊ टे जादा अच्छा होय परमेश्वर गा राज्य गेन थंदळ। दियागा राज्य गेन आपेगा मु गा घल्जी जरुरी होय कि परमेश्वर आपेके आपेगा पापो टे बचातिंज्केमी।

यीशु नी मंडीके कि अदा कुरकू डीचके मनेनेज्बा। परमेश्वर डी कुरकू के बचातिंजकुवा। पेनो दूसरा कुरकू डीचके मनेनेज बाने। डीचनी इनी भी मंडीके कि अदा कुरकू अच्छा ओटे गा रोंगो होय, चोयाकी दिकु यीशु गा बारेन अच्छा खाबोर के मनेनेवा होय, एठा परमेश्वर दिकुके बचातिंजकुवा होय। पेनो अदा कुरकू कोरा गा जिद्दी ओटे गा रोंगो होय। परमेश्वर गा वचन बीजो गा रोंगो कोरा लिंजेन बोचोवा होय, पेनो देटेन चोच्का बान ओट होय। इनी कुरकू यीशु गा बारेन खाबोर के मनेने बाने होय। दिकु दियागा राज्य गेन मुटे बान मेंबा होय।

यीशु नी इथुकेकु कि परमेश्वर पापीकु टे भेबाव दडावा होय। डीच दिकुके मापो जिऊ चाहतावा होय एठा दिकुके इकुगा कोणकु आरू चाहतावा होय।

यीशु नी इनी भी घाल्के कि परमेश्वर पापो टे खीजो दोडोवा होय। चोयाकी आदम एठा हव्वा नी पापो दडावा होय एठा परमेश्वर टे लेंक्कीन के होय। हर म्या कोरो परमेश्वर गा दुशमन होय।

पेनो परमेश्वर नी इनी दुनिया गेन थंदळ मिंकू हर कोरो टे इनीका रिती टे प्यार डावे, डीचनी हेजा म्याका कोंटे के जिकेनेच ताकि परमेश्वर दिकुके दण्डो बाकी जिऊ दिया लिंजेन विश्वास दडावा होय। येनेगा बाजाए, दिकु दियागा सेंग्गोन हमेशा गा घल्जी थंदळवा।

आपे गुजू गा लायको होय, चोयाकी आपेनी पापो डाके होय। आपेटे परमेश्वर गा खीजोऊ सही का होय, येनेगा उम्मीद, डीच यीशु लिंजेन खीजोएन। डीचनी यीशु के क्रूस गा गुजू जीटे दण्डो जीके।

यीशु नी चोलाका पापो बान दडुका, पेनो डीचनी परमेश्वर के डीचके दण्डो जीके। डीचनी गुजू मनेनजे। इनी रिती टे, आपेगा पापो के एठा इनी दुनिया गेन थंदळ मिंकू हर म्या कोरो गा पापो के तुटूल गा घल्जी डीच म्या पक्का बलिदान डा। यीशु नी खुद के परमेश्वर गा घल्जी बलिदान डाके, इनिघल्जी परमेश्वर तुनिकाभी पापो के, येटे टाएन कि भयंकर पापो के भी मापोएवा होय।

भला का अगर आपे घोनेच्का अच्छा कामय के दडावा होय, मेटे इनिज गा द्वारा परमेश्वर आपेके बान बबाचातिंज। दियागा सोप्ती आरुगा घल्जी येनोगो चोच्काभी बाऊ होय जो आपे डाए साकतावा होय। येनेगा उम्मीद, आपेके विश्वास दडा होय कि यीशु परमेश्वर गा कोण होय, एठा डीच आपेगा बेदला गेन क्रूस लिंजेन गोएन, एठा इनी भी कि परमेश्वर नी डीचके डाबोलटे जीटाकेनेच। अगर आपे इनिजा लिंजेन विश्वास डाए, मेटे परमेश्वर आपेगा पापो गा मापी जेवा।

परमेश्वर डी हर म्या कोरो के बचातिंजकुवा जो यीशु लिंजेन विश्वास दडावा होय एठा डीचके हेजा प्रभु मेंटो मनेज्बा होय। पेनो डीच दिकुके बान बबाचातिंज जो दिया लिंजेन विश्वास बान दडा होय। इनीका तुनिका मायना बान दोडो कि आपे लकपति होय या गिरबो होय, कोरो होय या जापाए होय, बुड्डा होय या जवान होय, या आपे तोटेन थंदळवा होय। परमेश्वर आपे टे प्यार दडावा होय एठा चाहतावा होय कि आपे यीशु लिंजेन विश्वास डाए कि डीच आपेगा सोप्ती आरुयु होना।

यीशु आपेके हाको लक्के होय कि दिया लिंजेन विश्वास डाए एठा बपतिस्मा सेगे। चोच आपे विश्वास दडावा होय कि परमेश्वर गा म्याका कोण, यीशु का मसीह होय? चोच आपे विश्वास दडावा होय कि आपे म्या पापी होय एठा इनी कि आपे परमेश्वर द्वारा आपके दण्डो जिऊ गा लायको होय? चोच आपे विश्वास दडावा होय कि आपेगा पापो के उथुर गा घल्जी यीशु क्रूस लिंजेन गोएन?

अगर आपे यीशु लिंजेन एठा जो डीचनी आपेगा घाल्जी डाके होय दिया लिंजेन विश्वास दडावा होय, मेटे आपे म्या मसीह होय! शैतान हेजा अंधकार गा राज्य गेन नका आपे लिंजेन राजो बान दडा होय। नका परमेश्वर हेजा उजाला गा राज्य गेन आपे लिंजेन राजो दडावा होय। डीचनी आपेके पापो दडा टे रोकातिंज्केनेच होय, डीके आपे डाए चाले डा। डीचनी आपेके म्या उनाई, सही जीवन जीके होय।

अगर आपे मसीह होय मेटे जो यीशु नी डाके होय दियागा वाजाटे परमेश्वर नी आपेगा पापो के मापोके होय। नका, परमेश्वर म्या दुश्मन गा उम्मीद आपेके म्या पक्का सोप्ती ममानातिंजवा होय।

अगर आपे परमेश्वर गा सोप्ती होय एठा प्रभु यीशु गा सेवक होना मेटे आपे डी बातो गा पालन दडा गा इच्छा डोएवा जो यीशु आपेके इथुवा होय। भला का आपे म्या मसीह होय, शैतान आए भी पापो दडा गा घल्जी आपेगा अंदजो डाएवा। पेनो परमेश्वर हमेशा डी दडावा होय जो डीच मंडीवा होय कि डीच डाएवा। डीच मंडीवा होय कि अगर आपे आपेगा पापो के मनातिंजेवा, मेटे डीच आपेके मापोकोम्बा। डीच आपेके पापो गा खिलाफ बेन लड़ाई गा शक्ति जेवा।

परमेश्वर आपेके प्रार्थना दडा एठा दियागा वचन के पपाळातिंज गा घल्जी मंडीवा होय। डीच आपेके अलग्गो विश्वासीकु गा सेंग्गोन बेल्लाटे दियागा आराधना दडा गा घल्जी भी मंडीवा होय। आपेके अलग्गो कुरकू के भी घागल होना होय कि डीचनी आपेगा घल्जी चोच डाके। अगर आपे इनी सेबाई कामयनौर के डाए टासो, मेटे आपे दियागा म्या पक्का सोप्ती आरुवा।