48. यीशु का वादा डाके मिनी मसीह होय
जब परमेश्वर नी दुनिया के आरुके मेटे अदा अच्छा डा। आदम एठा हव्वा इनिज-दियाटे प्यार दडा डा, एठा दिकु परमेश्वर टे प्यार दडा डा। तुनिका बिमारी या गुजू बाऊ डा। परमेश्वर येनोगोका दुनिया के चाहता डा।
शैतान नी बिंज गा सहारा टे बगीचा गेन हव्वा टे बातो डावे, चोयाकी डीच डीचके धोका जिऊ चाहता डा। मेटे हव्वा एठा आदम नी परमेश्वर गा खिलाफ पापो डाके। चोयाकी दिकुनी पापो डाके डा इनिघल्जी पृथ्वी लिंजेन थंदळ मिंकू सेबाई कुरकू गुजूवा होय।
चोयाकी आदम एठा हव्वा नी पापो डाके डा, इनिघल्जी चोच्का येठाभी बुरा डाएन। दिकु परमेश्वर गा दुश्मन आरोएन। दियागा परिणाम-स्वरूप, मेटे टे हर म्या कोरो नी पापो डाके। हर म्या कोरो जनम टेका परमेश्वर गा दुश्मन होय। परमेश्वर एठा कुरकू गा तालान शांति बाऊ डा। पेनो परमेश्वर शांति सुबने चाहता डा।
परमेश्वर नी वादा डाके कि हव्वा गा म्या पिढी शैतान गा कपार के कुचलातिंजेवा। डीचनी इनी भी मंडीके कि शैतान दियागा पिंदळी के काबेवा। दूसरा शब्द गेन, शैतान मसीह के गोजेज्बा, पेनो परमेश्वर डीचके डाबोलटे जीटाएच्बा। येनेगा बादोन, मसीह शैतान गा शक्ति के हमेशा गा घल्जी स्यागेवा। चोटोका साल गा बादोन, परमेश्वर नी ओटके कि डीच मसीह यीशु होय।
परमेश्वर नी डी आडी टे हेजा परिवार के बचातिंज्के डीके डीच सेगेवा मिठाच डा। नूह टे म्या डोंगा आरुगा घल्जी मंडीके कि डीच इनी रोंगो परमेश्वर नी डी कुरकू के बचातिंज्केकु जो दिया लिंजेन विश्वास दडा डा। इनी रोंगो, दिकु सेबाईकु गा सेबाई परमेश्वर गा द्वारा गुजू गा लायको डा चोयाकी पापो डाके डा। पेनो परमेश्वर नी दिकु सेबाईकु के बबाचातिंज गा घल्जी यीशु के कुल्केनेच जो दिया लिंजेन विश्वास दडावा होय।
चोटोका साल टाएन, याजक परमेश्वर गा घल्जी बलिदान पेळेजेका लक्के। इनी दर्शातींजेवा होय कि कुरकू नी पापो डाके, एठा इनी कि दिकु परमेश्वर गा द्वारा दिकुके दण्डो जिऊ गा लायको डा। पेनो दिकु बलिदान दिकुगा पापो के मापोऊ बान साकता डा। यीशु सेबाई टे खाट महायाजक होय। डीचनी डी डाके जो तुनिका याजक बान डाए साकता डा। डीचनी डी म्याका बलिदान डाऊ गा घल्जी खुदके जीके जो हर जेकाकेका पापो के उथुरे साकता डा। डीचनी मनेनजे कि परमेश्वर दिकु सेबाई गा पापो गा घल्जी डीचके दण्डो जे। इनी वाजाटे, यीशु पक्का महायाजक डा।
परमेश्वर नी अब्राहम टे मंडीके, “इंज अमा द्वारा दुनिया गा सेबाई कुलके आशीष जेवा।” यीशु इनिका अब्राहम गा पिढी डा। परमेश्वर अब्राहम गा सहारा टे सेबाई कुल के आशीष जेवा होय, चोयाकी जो यीशु लिंजेन विश्वास दडावा होय परमेश्वर दिकु सेबाईकु के पापो टे बचातिंजेच्बा होय। जब इनी कुरकू यीशु लिंजेन विश्वास दडावा होय, मेटे परमेश्वर दिकुके अब्राहम गा पिढी ममानातिंज्बा होय।
परमेश्वर नी अब्राहम टे मंडीके कि डीच खुद गा कोण, दियागा घल्जी बलिदान पेळेचकी। पेनो डाबोलटे परमेश्वर नी इसहाक गा बेदला गेन बलि दडा गा घल्जी म्या मेंडा कोंटे के जिकेनेच। आले सेबाईकु आलेगा पापो गा घल्जी गोगेज गा लायको डा! पेनो परमेश्वर नी आलेगा जगान गुजू गा घल्जी यीशु के बलिदान गा रुपोन जीके। इनी वाजाटे आले यीशु के परमेश्वर गा मेंडा कोंटे मंडीवा होय।
जब परमेश्वर नी मिस्र लिंजेन आखरी सिनी कुल्के मेटे डीचनी हर म्या इस्राएली परिवार टे मंडीके कि दिकु म्या मेंडा कोंटे गा बलि डाए। डी मेंडा कोंटे गेन तुनिका दोष बाकी होना। मेटे हेजा दरवाजा गा चौखुट गा मठान एठा बाजुन दिकुके दियागा पचना के येंडा गा डा। जब परमेश्वर नी डी पचना के डोके मेटे डीच दिकुके उरा टे सम्मान बळातिंजे एठा दिकुगा पेला कोण के बान गोचडुका। जब इनी डाएन मेटे परमेश्वर नी इनिके फसह गा तिवार मंडीके।
यीशु फसह गा तिवार गा म्या मेंडा कोंटे गा खिजा होय। डीचनी चोलाका पापो बान दडुका, इनिघल्जी डेन चोच्काभी गलत बान दडुका डा। डीच फसह गा तिवार गा टेमो लिंजेन गोच्केनेच। जब जेका यीशु लिंजेन विश्वास दडावा होय, मेटे यीशु गा पचना डी कोरो गा पापो गा किम्मत चूकातिंजेवा होय जैसा कि परमेश्वर डी कोरो गा मेराटे सम्मान बळातिंजे, चोयाकी डीच डीचके दण्डो बान जिऊ होय।
परमेश्वर नी इस्राएली कुरकू गा सेंग्गोन म्या वादा टोलके, चोयाकी दिकु येनोगो कुरकू डा दिकुके परमेश्वर नी हेजा आरुगा घल्जी कलमकेकु डा। पेनो नका परमेश्वर नी म्या येनोगो वादा टोल्के होय जो कि सेबाईकु गा घल्जी होय। अगर तुनिकभी जाटो गा तुनिकभी कोरो इनी उनाई के मनेनेवा होय, मेटे डीच परमेश्वर गा कुरकू गेन बेल्लाऊवा होय। डीच येनोगो इनिघल्जी दडावा होय चोयाकी डीच यीशु लिंजेन विश्वास दडावा होय।
मूसा म्या येनोगो परमेश्वर गा कोनेटे मंडी मिठाच डा डीचनी परमेश्वर गा वचन के खाट शक्ति गा सेंग्गोन प्रचार डाके डा। पेनो यीशु सेबाई परमेश्वर गा कोनेटे मंडी मिंकू तालाटे खाट होय। डीच परमेश्वर होय, इनिघल्जी जो चोच्काभी डीचनी डाके एठा मंडीके डीच परमेश्वर गा कामय एठा वचन डा। इनिघल्जी पवित्र- ग्रंथ यीशु के परमेश्वर गा वचन मंडीवा होय।
परमेश्वर नी राजा दाऊद टे वादा डाके डा राजा गा रुपो गेन दियागा म्या पिढी परमेश्वर गा कुरकू लिंजेन हमेशा गा घल्जी राजो डाएवा। यीशु परमेश्वर गा कोण एठा मसीह होय, इनिघल्जी डीच राजा दाऊद गा पिढी होय जो हमेशा गा घल्जी राज्य डाए साकतावा होय।
दाऊद मेटे इस्राएल राजा डा, पेनो यीशु सेबाई दुनिया गा राजा होय! डीच डाबोलटे हेजेवा एठा हमेशा गा घल्जी न्याय एठा शांति गा सेंग्गोन हेजा राज्य लिंजेन राजो दडावा।
त्ति १-३, ६, १४, २२; निर्गमन १२, २०; २ शमूएल ७; इब्रानियों ३:१-६, ४:१४-५:१०, ७:१-८:१३, ९:११-१०:१८; प्रकाशितवाक्य २१ टे म्या बाईबल गा कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।