47. फिलिप्पी गेन पौलुस एठा सीलास

जब शाऊल नी पूरा रोमी साम्राज्य गेन यात्रानौर डाके मेटे डीचनी हेजा रोमी जीमू, “पौलुस”गा उपयोग दडा सुरुके। म्या दिन, पौलुस एठा दियागा सोपती सीलास फिलिप्पी पूरा गेन यीशु गा बारेन अच्छा खाबोर घागल गा घल्जी ओले। दिकु पूरा गा बल्लान गडा गा धुरान म्या जगान ओले देटेन प्रार्थना दडा गा घल्जी गोलके डा। देटेन दिकु लुदिया जीमू गा म्या जापाए टे मिलातिंज्के जो म्या व्यपारी डा। डीच परमेश्वर टे प्यार दडा डा एठा दियागा आराधना दडा डा।

परमेश्वर नी लुदिया के यीशु गा बारेन खाबोर लिंजेन विश्वास दडा गा घल्जी पक्काकेनेच। पौलुस एठा सीला सनी डीचके एठा दियागा परिवार के बपतिस्मा जीके। डीचनी पौलुस एठा सीलास के हेजा उरान रुकातिंजू गा घल्जी आमंत्रितकेकु, इनिघल्जी दिकु डेनेन ठहरातिंजे।

पौलुस एठा सीलास कुरकू टे अक्सर डी जगान मिलातिंजू डा देटेन यहूदी कुरकू प्रार्थना दडा लक्कू डा। हारेक दिन जब दिकु देटेन सेने डा मेटे म्या भगनी ताराई जो भूतो द्वारा काबूके डा दिकुगा पीछा दडा डा। इनी भूतो गा सहारा टे डीच कुरकू गा भविष्य घाले लक्कू डा, इनिघल्जी डीच भविष्य घागल मिठाच गा रुपो गेन हेजा स्वामीकु गा घल्जी घोनेच डामा कामय लक्कू डा।

दिकुगा सेने टेमो इनी भगनी ताराई चिल्लातिंजू लक्कू डा, “इनी कोरो परम प्रधान परमेश्वर गा सेवक होय। इनिज आपेके उध्दार घाटाऊ गा कोरा घाले लक्के होय!” डीच हरेक दिन येनोगो डाए लक्कू डा डेटे कि पौलुस नराजोएन।

आखरी गेन, म्या दिन जब डी भागनी नी चिल्लातिंजू सुरुके, मेटे पौलुस नी दियागा कोनेन मुराटे दियागा तालागा भूतो टे मंडीके, “यीशु गा जीमू टे इनिज गा तालाटे ओटजू ।” डीका टेमो डी भूतो नी डीचके अराकेनेच।

डी भागनी ताराई गा स्वामी भेबाव खिजोएन। दिकुन मालूमजे। कि बिना डी भूतो गा डी भगनी ताराई कुरकू के भविष्य बान घाले साकता डा। येनेगा मतलब डा कि कुरकू नका दियागा स्वामीकु के डामा बान जिऊ कि डीच दिकुके भविष्य घाले कि दिकुगा सेंग्गोन चोच डाऊवा।

इनिघल्जी डी भगनी ताराई गा स्वामी पौलुस एठा सीलास के रोमी अधिकारीकु गा मेरान साईंनेच। दिकुनी पौलुस एठा सीलास के मुंडाकेनेच, एठा डाबोलटे दिकुके जेलेन येंडाके किंज।

दिकुनी पौलुस एठा सीलास के जेल गा येनोगो हिस्सा गेन डोकेकु देटे जगान सेबाई टे जादा सिपाहीकु डा। येटे टाएन कि दिकुनी दिकिंज नंगा के लकडी गा खाट टुकळा गेन जोळातिंज्के। पेनो पौलुस एठा सिपाही अदि राटो गा टेमो, परमेश्वर गा स्तुति गा सिरिंज गाना लक्के डा।

अचानक टे, म्या भयानक भूकंप डाएन! जेल गा पूरा दरोजो खुल्लाएन, एठा सेबाई कैदीकु गा सकळी खुल्लाटे बोचोएन।

मेटे जामदार बिट्जे। डीचनी डोके कि जेला गा दरोजो खुल्लाएन डा। डीचनी सोचातिंज्के कि सेबाई कैदीकु बचातिंजटे साळुपजे डा। डीच हिघराएन कि दिकुगा साळुप गा वाजा रोमी अधिकारी डीचके गोजेच्बा, इनिघल्जी डीच खुद के गोगेज गा घल्जी तैयारजे होय! पेनो पौलुस डीचके धोटे चिल्लातिंजे, “रुकातिंजे! खुदके नुकसान बाकी जिऊ। आले सेबाईकु येटेनकेका होय।”

डी जामदार नी कपातिंजटे पौलुस एठा सीलास गा मेरान हेंडो कोम्बराके, “उध्दार घाटाऊ गा घल्जी इंज चोच डाए?” पौलुस नी जवाब, “प्रभु यीशु लिंजेन विश्वास डाए, मेटे आम एठा अमा उराकु उध्दार घाटाएवा।” मेटे डीच जामदार पौलुस एठा सीलास के हेजा उरा गेन सायईय्येकु एठा दिकुगा घाव के अबुंज्के। पौलुस नी दियागा उरा गा सेबाई कुरकू के यीशु गा बारेन अच्छा खाबोर घाल्के।

जामदार एठा दियागा पूरा परिवार नी यीशु लिंजेन विश्वास डाके, इनिघल्जी पौलुस एठा सीलास नी दिकुके बपतिस्मा जीके। मेटे जामदार नी पौलुस एठा सीलास के आटा चराके, एठा दिकु म्या सेंग्गोन कुशोएन।

दूसरा दिन पूरा गा अगुवाकु नी पौलुस एठा सीलास के जेलाटे आजादकेकु एठा फिलिप्पी टे सेने गा घल्जी मंडीके। पौलुस एठा सीलास लुदिया एठा अदा अलग्गो सोप्तीकु टे मिलातिंज्के एठा डेगा पूराटे ओटजे। यीशु गा बारेन अच्छा खाबोर फैलातिंजू लज्जे, एठा मसीह गा मण्डली बळातिंजू लज्जे।

पौलुस एठा अलग्गो मसीह अगुवाकु नी घोनेच्का पूरानौर गा यात्रा डावे। दिकुनी कुरकू के यीशु गा बारेन अच्छा खाबोर घाल्के। दिकुनी मसीह गा मण्डली गा विश्वासीकु के आरी घल्जी एठा शिक्षा जिऊ गा घल्जी चोटोका पत्र भी ओल्के। इंकू तालाटे अदा पत्र बाईबल गा पुस्तक आरोएन।