46. पौलुस मसीह विश्वासी आरुवा होय
शाऊल जीमू गा म्या कोरो डा डीचनी यीशु लिंजेन विश्वास बान दडुका डा। जब डीच जवान डा, मेटे डीचनी स्तिफनुस के गुजू मिंकू कुरकू गा कपळे गा निगरानी डाके डा। बादोन, डीचनी विश्वासीकु के सतातिंज्केनेच डा। डीचनी यरूशलेम गेन उरा-उरान ओले डो कोरो या जापाए बार्खिंज के गिरफ्तार टे जेलेन येंडाकेकु डा। मेटे महायाजक नी शाऊल के दमिश्क पूरा गेन सेने गा अनुमति जीके। डीचनी डेगा मसीहकु के गिरफ्तार दडा एठा दिकुके डाबोलटे यरूशलेम गेन साटे हेजे गा घल्जी शाऊल टे मंडीके।
इनिघल्जी शाऊल नी दमिश्क गेन सेने गा यात्रा सुरुके। डी पूरा के आदिरू टे थोडाका पेला, दियागा उफून कोनेन बादळा टे म्या उजाला चमकातिंजे, एठा डीच ओटे लिंजेन बोचोएन। शाऊल नी जेकाकेका मंडी लठ्ठाका आजुम्के, “हे शाऊल! हे शाऊल! आम इंज्के चोया ससातिंज लक्के होय?” शाऊल नी कोम्बराके, “हे प्रभु, आम जे होय?” यीशु नी डीचके जवाब जीके, “इंज यीशु मेना। आम इंज्के ससातातिंज लक्के होय!”
जब शाऊल बिटजे मेटे डीच दोडो बान साकता डा। दियागा सोप्ती दमिश्क गेन सैय्येनेच डा। शाऊल नी आफाई दिन टाएन चोच्काभी जोमडुका या नुडुका बान डा।
दमिश्क गेन हनन्याह जीमू गा म्या चेला डा। परमेश्वर नी दियाटे मंडीके, “डी उरा गेन सेने देटेन शाऊल ठहरातिंज्के होय। इकुगा टी के दिया लिंजेन डोकी ताकि डीच डाबोलटे दोडो लज्जे।” पेनो हनन्याह नी मंडीके, “हे प्रभु, इंज्नी आजुम्के होय कि इनी कोरो नी विश्वासीकु के टोनोगो सतातिंज्केकु होय।” परमेश्वर नी डीचके जवाब जीके, “सेने! इंज्नी डीचके यहूदी कुरकू गेन एठा दूसरा जाटोकु गा कुरकू गेन इंजा जीमू गा एलान दडा गा घल्जी कलाम्जेनेच होय। डीच इंजा जीमू गा घल्जी घोनेच तकलिप सेहेनेवा।”
इनिघल्जी हनन्याह शाऊल गा मेरान ओले, हेजा टी के दिया लिंजेन डोके, “यीशु नी, जो येटेन हेजे गा अमा कोरा गेन अमा लिंजेन ओटजे डा, इंज्के अमा मेरान कुल्लेमी होय ताकि आम डाबोलटे दोडो लज्जू, एठा पवित्र आत्मा आमके भेट्टिकेमी।” तुरुटो का शाऊल डाबोलटे दोडो गेन पक्काएन, एठा हनन्याह नी डीचके बपतिस्मा जीके। मेटे शाऊल नी आटा जोवे एठा डाबोलटे ताखतदार आरोएन।
देटेका, शाऊल नी दमिश्क गेन थंदळ मिंकू यहूदी कुरकू गेन प्रचार दडा सुरुके। डीचनी मंडीके, “यीशु का परमेश्वर गा कोंटे होय!” यहूदी कुरकू बिचारजे डा, चोयाकी शाऊल नी मेटे विश्वासी कुरकू के गोगेज गा कोशिश डाके डा, पेनो नका डीचनी यीशु गेन विश्वास डाके डा। शाऊल नी यहूदी कुरकू गा सेंग्गोन हिंजमान डाके। डीचनी टिपीके कि यीशु का मसीह डा।
घोनेच दिन गा बादोन, यहूदी कुरकू नी शाऊल के गोगेज गा योजना आरुके। दिकुनी डीचके घोगेज गा घल्जी पूरा गा फाटक लिंजेन कुरकू के कुल्केकु। कि दियागा निगरानी डाए पेनो शाऊल नी डी योजना गा बारेन आजुम्जे, एठा दियागा सोपतीकु नी बचातिंजटे ओट गेन मदत डाके। म्या राटोन दिकुनी डीचनी टोपला गेन सुबांटे पूरा गा दीवार टे डीचके इटान अगुरुकेनेच। दमिश्क टे बचातिंजटे ओट गा बादोन शाऊल नी यीशु गा बारेन प्रचार दडा सुरुका डोके।
शाऊल कलमके चेलाकु टे मिलातिंजू गा घल्जी यरूशलेम शहर गेन ओले, पेनो दिकु दियाटे हिघरा डा। मेटे बरनाबस जीमू गा म्या विश्वासी शाऊल के कलमके चेलाकू गा मेरान साईंय्येनेच। डीचनी दिकुके घाल्के कि शाऊल नी टोनोगो हिम्मत टे दमिश्क गेन प्रचार डाके डा। डेगा बादोन, कलमके चेलाकू नी शाऊल के मनेनजेनेच।
अदा विश्वासीकु जो यरूशलेम शहर गा सतातिंजटे सळुपजे डा दिकु लेंक्कीन अंताकिया पूरा गेन ओले डा एठा यीशु गा बारेन प्रचार दडा डा। अंताकिया गेन थंदळ मिंकू कुरकू जादा यहूदी बाऊ डा, पेनो पेला बार, दिकु तालाटे घोनेच्का कुरकू विश्वासी आरोएन। बरनबास एठा शाऊल इनी उनाई विश्वासीकु के यीशु गा बारेन एठा जादा इथू गा घल्जी देटेन ओले एठा मसीह गा मण्डली के मजबूत आरुके। यीशु लिंजेन विश्वास दडा मिंकू पेला बार अंताकिया गेन का “मसीह” मंडेवा।
म्या दिन, अंताकिया पूरा गा मसीह कुरकू उपासो गा सेंग्गोन प्रार्थना दडा लक्के डा। पवित्र आत्मा नी दिकुटे मंडीके, “इंजा घल्जी बरनबास एठा शाऊल के डी कामय के दडा गा घल्जी लग्गोकी डीके दडा गा घल्जी इंज्नी दिकुके हकोलेकु होय।” इनिघल्जी अंताकिया गा मसीह गा मण्डली नी बरनाबस एठा शाऊल गा घल्जी प्रार्थना डाके एठा दिकु लिंजेन इकुगा टी के डोके। मेटे दिकुनी दिकुके अलग्गो घोनेच्का जगान यीशु गा बारेन अच्छा खाबोर गा प्रचार दडा गा घल्जी कुल्केकु। बरनाबस एठा शाऊल नी अलग्गो-अलग्गो जाटो कुरकू के शिक्षा जीके, एठा घोनेच्का कुरकू नी यीशु गेन विश्वास डाके।
प्रेरितों गा कामय ८:३; ९:१-३१; ११:१९-२६; १३:१-३ टे म्या बाईबल गा कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।