45. स्तिफनुस एठा फिलिप्पुस

पेला मसीह अगुवाकु गा तालान स्तिफनुस जीमू गा म्या कोरो डा। सेबाई कुरकू दियागा आदर दडा डा। पवित्र आत्मा नी डीचके घोनेच शक्ति एठा दिमाग जीके डा। स्तिफनुस नी घोनेच्का चमत्कार डाके डा। जब डीचनी यीशु लिंजेन भरोसा दडा गा बारेन दिकुके शिक्षा जीके मेटे घोनेच्का कुरकू नी दिया लिंजेन विश्वास डाके।

म्या दिन, स्तिफनुस यीशु गा बारेन शिक्षा जिऊ लक्के डा, एठा अदा येनोगो यहूदीकु हेन दिकुनी यीशु लिंजेन विश्वास बान दडुका डा एठा दियागा सेंग्गोन हिंजमान दडा सुरुके। दिकु भेबाव खीजो के, इनिघल्जी दिकु धार्मिक अगुवाकु गा मेरान ओले ओले एठा दियागा बारेन लाबाळ मंडीके। दिकुनी मंडीके, ““आलेनी स्तिफनुस के मूसा एठा परमेश्वर गा बारेन बुरा बातो मंडी बातोटे आजुम्के होय!” इनिघल्जी धार्मिक अगुवाकु नी स्तिफनुस के जेलेन केटकेनेच एठा डीचके महायाजक एठा यहूदी कुरकू गा अलग्गो अगुवाकु गा सम्मान साटे हेन। येठाभी लाबाळ गवाहकु हेन दिकुनी स्तिफनुस गा बारेन लाबाळ मंडीके।

महायाजक नी स्तुफ्नुस टे कोम्बराके, “चोच इनी कुरकू अमा बारेन सच्चो मंडी लक्के होय?” स्तिफनुस नी महायाजक के जवाब जिऊ गा घल्जी घोनेच्का बातो के मंडी सुरुके। डीचनी मंडीके कि अब्राहम गा टेमो टे यीशु गा टेमो टाएन परमेश्वर नी इस्राएल गा कुरकू गा घल्जी घोनेच्का अलग्गो कामय डाके होय। पेनो कुरकू नी हमेशा परमेश्वर गा मंडी बान आजुम डुका डा। स्तिफनुस नी मंडीके, “आपे कुरकू परमेश्वर गा खिलाफ हुकूम बान आजोम एठा झागळा झागळा दडा लज्जे होय। आपेनी हमेशा पवित्र आत्मा के बा नमनेन डुका, जैसा कि आलेगा जुनाकु नी हमेशा पवित्र आत्मा के मनेन के डा एठा हमेशा दियागा परमेश्वर गा कोनेटे मंडी मिंकू के गोच्केकु डा। पेनो जो दिकुनी डाके डा डेगा तुल्ना गेन आपेनी येठाभी बुरा डाके होय! आपेनी मसीह के गोच्केनेच!”

जब डी धार्मिक अगुवाकु नी इनी अजुम्के, मेटे दिकु येटो खीजोएन कि दिकुनी इकुगा लुतुर के बंदोके एठा ऊँचा आवाज गेन चिल्लातिंज्के। दिकु स्तिफनुस के गोसोर टे पूराटे बल्लान सैय्येनेच एठा डीचके गोगेज गा घल्जी डीचके घोटाटे लेचाएच।

जब स्तिफनुस गुजू लक्के डा, डीच हाकोटे बिटजे, “हे यीशु इंजा आत्मा के मनेनजा!” मेटे डीच हेजा टोपरेन बोचोटे एठा डाबोलटे हाकोटे बिटजे, “हे प्रभु, इनी पापो दिकु लिंजेन बाकी येंडा।” मेटे डीच गोएन।

डी दिन, यरूशलेम गेन थंदळ मिंकू घोनेच्का कुरकू नी यीशु गा सेंग्गो मिठाच के ससातिंज सुरुके, इनिघल्जी विश्वासी कुरकू अलग्गो जगान सळुपजे। पेनो येनेगा बावजूद भी, जो तोटेन काभी दिकु दिकुनी यीशु गा बारेन प्रचार डाके।

फिलिफ्फुस जीमू गा यीशु गा म्या विश्वासी डा। जैसा कि अलग्गो घोनेच विश्वासीकु नी डाके डा दिकु भी यरूशलेम टे सळुपजे। डीच सामरिया गा इलाका गेन ओले। देटेन डीचनी कुरकू गेन यीशु गा बारेन प्रचार डाके। घोनेच्का कुरकू नी दिया लिंजेन विश्वास डाके एठा उध्दार घाटाएन। म्या दिन, फिलिप्पुस गा मेरान परमेश्वर गा कोनेटे म्या स्वर्गदूत हेन एठा दियाटे डोंगोरेन सेने गा घल्जी, एठा म्या सळाक्को लिंजेन सेंदरा गा घल्जी मंडीके। फिलिप्पुस देटेन ओले। जब दिकु डी सळाक्कोन चेल्के डा, मेटे डीचनी म्या कोरो के हेजा म्या कोरो के हेजा रथ गेन सेने लठ्ठाका डोकेकु। इनी कोरो कूश देशो गा म्या कास हाक मिठाच डा। पवित्र आत्मा नी फिलिप्पुस टे मंडीके कि सेनेडो डी कोरो गा सेंग्गो-सेंग्गो ओले।

इनिघल्जी फिलिप्पुस रथ गा मेरान ओले। डीचनी अजुम्के कि डीच कूशी परमेश्वर गा वचन के पपाळातिंज लक्के डा। जो यशायाह परमेश्वर गा कोनेटे मंडी मिठाच नी ओल्के डा डीच डीके पपाळातिंज लक्के डा, “डीच डीके गोगेज गा सेने मिनी मेंडा गा रोंगो सैय्येनेच, एठा जैसा म्या मेंडा कोंटे शांतिवा होय, डीचनी भी म्या शब्द बान मंडीडुका। दिकुनी दियागा सेंग्गोन बुरा व्यवहार डाके एठा दियागा आदर बान दडुका। दिकुनी दियागा जान सैय्ये।”

फिलिप्पुस नी डी कूशी टे कोम्बराके, “जो आम पपाळातिंज लक्के होय चोच आम डीचके समझातिंजेच्बा भी होय?” डी कूशी नी जवाब जीके, “बाने। जब टाएन जेका इनिके इंज्के बान ससामझातिंज, मेटे टाएन इंज इनिके बान समझातिंजू। कृपा डाटे इंजा मेरान हेजेडो सुबने। यशायाह इनी हेजा बारेन ओल लक्के डा या तुनिका दूसरा गा?”

फिलिप्पुस रथ लिंजेन पेळेनडो सुबांजे। मेटे डीचनी डी कूशी कोरो के डी घाल्के जो यशायाह नी यीशु गा बारेन ओल्के डा। फिलिप्पुस नी परमेश्वर गा वचन गा घोनेच्का अलग्गो भागो गा चर्चा डाके। इनी खिजाटे, डीचनी डी कोरो के यीशु बारेन अच्छा खाबोर घाल्के।

फिलिप्पुस एठा डीच कूशी सेने लठ्ठाका डा गा मेरान हेन। डी कूशी नी मंडीके, “डोगे! येटेन डा होय! चोच इंज बपतिस्मा सा साकतावा मेना?” एठा डीचनी सारथी टे रथ के रोराकातिंज गा घल्जी मंडीके।

इनिघल्जी दिकु डा गेन ओले मेना, एठा फिलिप्पुस नी डी कूशी के बपतिस्मा जीके। जब दिकु डाट े बल्लान हेन, मेटे पवित्र आत्मा अचानक का फिलिप्पुस के टुलटे तुनिका अलग्गो जगान सैय्येनेच। देटेन फिलिप्पुस नी कुरकू के यीशु गा बारेन घागल सुरुका डोके।

डी कूशी हेजा उरा गा यात्रा लिंजेन सम्मान बळातिंजे। डीच कुशोके डा नका यीशु के हाडाई डा।