1. दुनियाता पुट्मळ
यह कहानी सुनें ऑडियो फ़ाइल · 4.9 MB
इस रिकॉर्डिंग के शब्द नीचे Aheri Gondi में दिए गए हैं।
इल्हा पेन मोदाला अन्नि वस्तुकुन पुटिस्ता. हारूं रोजकुने दुनियातुन आनि अव्टे मनना अन्निट्तुन पुटिस्ता. पेन बूमितुन तयार कीतस्के अव्टे हीकटा आनि अद रिकम मत्ता. बारित्ते अदवेरदाका पेन अव्टे बतलतुने तयार कियाका मत्ता. गानि पेनदा आत्मा मात्रम येतापोर्रो तिरियसेके मत्ता.
अस्के पेन, “वेल्गु आम!” इत्तस्के, वेल्गु आता. पेन वेल्गुन हूळतस्के दानकु बेस अन्पिच्चि, पेन दान, “रोजु” इंचि इत्ता. पजा पेन वेल्गुन हीकटताल वेरे कीसि हीकटतुन “नर्का” इंचि इत्ता. दुनियातुन पुट्टिचना कबळता मोदाटा रोजुने पेन मोट्टा मोदाला वेल्गुन तयार कीता.
दुनियातुन पुटिस्तस्केटा रोडोंव रोजुने पेन, “येतापोर्रो उंदि अंतर आयिकांटि!” इत्ता. आनि उंदि अंतर तयार आता. आ अंतरतुन पेन, “मब्बु” इत्ता.
मूडोव रोजुने पेन, “येर उंदि जेगाते जमा आसि, वत्तुता जेगा दिस्सिकांटि,” इत्ता. अस्के पेन, आ वत्तुता जेगातुन, “बूमि” आनि येतुन बारे, “समुद्रम” इत्ता. पजा पेन अद कीतदुन हूळसि बेस मंता इंचि इत्ता.
पजा पेन, “बूमितुना! निमे अन्नि तीरकुना मराकु-पोर्कां पुट्टागोट्टा,” इत्तस्के, अल्हेने आता. पजा पेन अद कीतदुन हूळसि, बेस मंता इत्ता.
नालूंगो रोजुने पेन, “मब्बुने वेल्गु हिय्यानव आयिं,” इत्ता. अस्के पोळ्दु, वेळसि आनि सुक्कां दिस्सालय दल्गतां. पेन अवुन बूमिपोर्रो वेल्गु हिय्यालय, नर्का-पिय्यल आयालय आनि कालाल्क, वर्साने परक हुप्सानाहाटीं कीता.
हेय्युंगो रोजुने पेन, “येते जिवरासिं तयार आयिं आनि मब्बुने पिट्टें परयिंकांटि,” इत्ता. इल्हा पेन येते ईदाना अन्नि जिवरासिं आनि पिट्टेन कीता. पेन अवुन हूळसि बेस मंता इंचि अवुंक आसिर्वाद हीता.
दुनियातुन पुटिस्ता हारुंगो रोजुने पेन, “बूमिपोर्रो मननाहाटीं अन्नि रकाल्कुना जिवरासिं आयिं,” इत्ता. अस्के पेन इत्तापे जर्गता. अव्टे कोन्नि जिवरासिं पोस कियानव मत्तां, कोन्नि बेंगानव आनि कोन्नि बारे केडा जिवरासिं मत्तां. अवुन पेन हूळतस्के बेस मंता इत्ता.
पेन मर्रा, “सरे, इंदके मना रूपमते आनि मनालेसींगे मनना मनकन कीकोम. ओर बूमिपोर्रो आनि अन्नि जिवरासिनपोर्रो अदिकार ताकसंतोर,” इत्ता.
पजा पेन तोळितोनि मनकन तयार कीसि, ओनव्टे जीवाता ऊपिरि उह्कुता. आ मनकना पोरोल आदाम. आदामुंक मननाहाटीं पेन उंदि पेद्दे तोटा तयार कीता आनि दान बेस हूळकुननाहाटीं ओन अव्टे इरता.
आ तोटाता नट्टा नड्डुम पेन रोंडु विसेस मराकुन पुटिस्ता. उंदि पिस्वरता मरा आनि इंकुंदि बारे मंचि-सेड्डाता तेल्वि हिय्याना मरा. पजा,, “तोटाते मनना अन्नि मराकुना पंडिं निमे तिना परांतिन, गानि पिस्वरता मरा आनि मंचि-सेड्डाता तेल्वि हिय्याना मराता पंडि तिनुमा. आ मराकुना पंडिं तित्ते निमे हासि दांतिन” इंचि पेन आदामुंक वेहता.
पेन मर्रा, “मांडसा वरोरे मनमळ बेस आयो,” इंचि इत्ता. गानि बवे जिवरासिं ओना दंटा आया पर्राहिल्लें.
अदुनहाटीं आदामुन पेन गट्टि निद्राते वाटता. पजा पेन ओना उंदि बरबद्दा बोक्का तेंडसि आ बोक्कातोनि उंदि मुरतटुन तयार कीता. कीसि अदुन आदामुनगा ओता.
आदाम आ मुरतटुन हूळतस्के, “इद अय्ते नालेसींगे मंता. दीनु मुरतळ इनानुर, बारित्ते इदुन मांडसाताल तयार कियमळ जर्गता,” इंचि इत्तोर. इदुनहाटींगे, मांडसा ओना तल्लुर-बाबोन होळसिसि ओना मुत्तोनतोनि उंदासि मनांतोर.
मांडसातुन आनि मुरतटुन पेन दाना सतता रूपमते तयार कीता. पजा ओर्कु आसिर्वाद हीसि, ओर्कुन इल्हा इत्ता, “वेल्लेन पिलाल्कुन कंचि, ई पूरा बूमिअंता निंडसोंटु.” पजा अद तयार कीतदुन हूळसि, “वेल्लेन बेस मंता,” इत्ता. आनि पेन इरगा कूस आता. इदंता दुनियातुन पुटिस्ता हारूंगो रोजुने जर्गता.
एडुंगो रोजुननाड, पेन इदवेरदाका बव कबाह्क कीसेके मत्तानो अवुनंता पुरागा कीता. आ एडुंगो रोजुन पेन आसिर्वाद हीसि, पवित्र कीता, बारित्ते आ एडुंगो रोजुननाडु पेन अन्निटतुन तयार कियाना कबाटुन महाता. इल्हा पेन दुनियातुन आनि अव्टे मनना अन्निटवुन पुटिस्ता. उत्पत्ति पुस्तकता अद्याय 1-2 ताल ई वेसुडि येतमळ जर्गता.
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।