2. दुनियाते पापम होळियंता.
यह कहानी सुनें ऑडियो फ़ाइल · 5.1 MB
इस रिकॉर्डिंग के शब्द नीचे Aheri Gondi में दिए गए हैं।
पेन तयार कीता आ सक्कटा तोटाते आदाम आनि ओना मुत्तो वेल्लेन कूस मत्तुर. ओर इव्वुरगुडा कपडिं केर्राकोंदुर. अयनागानि ओर बस्केने सिग्गु अर्राकोंदुर. बारित्ते दुनियाते पापम हिलाका मत्ता. आदाम ओना मुत्तो आ तोटाते तिरियसेके, पेनतोनि वळ्कसेके मनुंदुर.
गानि आ तोटाते उंदि तरास मत्ता. अद वेल्लेन बदमास मत्ता. आ तरास वासि आ मरतटुन, “ई तोटाते मनना मराकुनाल बद्दना मराता पंडिं तिनामन्नि इंचि पेन मीकु निजमे वेहतना?” इंचि पूसकीता.
अस्के आ मुरतळ, “मंचि-सेड्डाता तेल्वि हियाना मराता पंडिं होळसि, कळमा अन्नि मराकुना पंडिं मोमोट तिना पर्रांतोम, इंचि पेन वेहता. अचोने आयाका, ओक्कला आ पंडितुन तिन्निना, इट्टिनागानि मिमेट हासि दांतिर, इंचिगुडा पेन वेहता” इत्ता.
अस्के आ तरास मुरतळ्क इल्हाँ जवाब हीता: “इद निजम आयो, मिमेट हायिर. गानि मिमेट आ पंडितुन तिननय्ते पेनदालेसीं मिमेटगुडा मंचि-सेड्डातुन एरपाट कियापर्रांतिट आनि पेनदालेसीं आंतिर, इद पेनदुक एरपाट मंता.”
आ मुरतळ आ पंडिहेके हूळता अय्ते, आ पंडि दानकु, सक्कगा आनि वेल्लेन रुसि मत्ताप दिसता. दानकुगुडा तेल्विगल्लद आयाना मत्ता. अदुनहाटीं आ मुरतळ आ पंडितुन कोय्सि तित्ता. अचोने आयाका दानतोनि मत्ता दान मुय्दोंकगुडा हीता अय्ते ओरगुडा तित्तोर.
अस्के अचानक ओरा कळ्कु बय्यर आतां, अस्के ओर कुळकें मंतुर इंचि ओर्कु तेळियता. अस्के ओर आकिं उंदांकु-उंदि कुट्सि अवुना कपडिं तयार कीसि ओरा मेंदुल्तुन मुच्चाना कोसिस कीतुर.
अस्के आ मांडसा आनि ओना मुत्तो तोटाते तिरियसेके पेनदा लेंगुन केंजतुर. ओर इव्वुरगुडा पेनदुक दिस्साकोंटा मक्कुतुर. अस्के, “निमे बगा मंतिन?” इंचि पेन आ मांडसातुन केयता. अय्ते, “नना तोटाते तिरियनेंके नीवा लेंग केंजतन. नना कुळकें मत्तन इंचि नीवा लेंग केंजसि, वेरियसि, मक्कुतन,” इंचि आदाम इत्तोर.
मर्रा पेन इल्हा पूसकीता, “निमे कुळकें मंतिन इंचि नीकु बोर वेहतोर? नना तिनुमा इत्ता पंडितुनगिंटा निमे तित्तिना?” अस्के आ मांडसा मनकल इल्हा जवाब हीतोर, “निमे नाकु हीता ई मुरतळे नाकु आ पंडि तच्चि हीता.” अस्के, “निमे इल्हा बारि कीतिन,” इंचि पेन मुरतटुन पूसकीता. अस्के आ मुरतळ, “तरास नाकु दोका हीता.” इंचि जवाब हीता.
अस्के पेन आ तरासुंक इल्हा सापनेम हीता, “निमे सापनेम दल्गतदुन आंद. निमे तोळि तिंचेके पीटपोर्रो बेंगसेके ताककिन. निमे आनि ई मुरतळ मिमेट इव्वुर वरोंक-वरोर हय्साकोंटा आंतिर. अचोने आयाका नीवा पिलाल्क, ई मुरतटा पिलाल्कगुडा वरोंक-वरोर अर्राकोंटा आंतुर. ई मुरतटा वंसमतोर नीवा तल्लातुन पिच्चि-पिच्चि कींतुर, निमे बारे ओरा मळमेतुन कस्ककिन,” इंचि पेन इत्ता.
पजा पेन मुरतटुन इल्हा इत्ता, “निमे पिलाल्क कनानेंके नीकु वेल्लेन तकलिप आयागोटंतन. नीवा मनसु बस्केळ्क नीवा मुय्दोनहेकेन मनागोटंतन आनि ओर नीवापोर्रो अदिकारम हुप्सानुर,” इंचि पेन इत्ता.
पजा मांडसातुन पेन इल्हा इत्ता, “निमे नावा पोल्ले केंजाकोंटा, नीवा मुत्तोना पोल्ले केंजतिन. इंदके बूमिकगुडा सापनेम दल्गता. अदुनहाटीं पंटा पंडसानाहाटीं नीकु इंदके इरगा कस्टम कियापींता. इंका निमे हाकिन अस्के नीकुन ई तोळितेन कल्पमळ जर्गार,” इंचि पेन इत्ता. आ मांडसा ओना मुत्तोंकु हव्वा इंचि पोरोल दोसतोर. ई पोरोलता अर्तम, “पिस्वर हियनदु” इल्हा आंदु. बारित्ते अद अन्नि जातिनोर्कु तल्लुर आयार. पजा पेन आदाम, हव्वांकु जिवरासिना तोलुनतोनि तयार कीता कपडिं केराहता.
पजा पेन इल्हा इत्ता, “इंदके मनकल मंचि-सेड्डातुन एरपाट कींतोर, दीनहेंदाल ओर मनालेसीं आतोर. अदुनहाटीं ओन इंदके आ पिस्वर हियाना मराता पंडितुन तिना हियानायो, अदुन तिनानय्ते ओन्कु बस्केने हामुर वायो.” अदुनहाटीं पेन आदामुन आनि हव्वान आ तोटाताल पलाते पेचाहता. आनि आ तोटाताल बोरे आ पिस्वर हियाना मराता पंडितुन तिनामन्नि इंचि तोटाता गलमातगा वेल्लेन बलमाता पेनदा दूतन कावेल इरता. बायबलता उत्पत्ति पुस्तकताल अद्याय 3 नाल ई वेसुडि येतमळ जर्गता.
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।