3. कम्मुड
यह कहानी सुनें ऑडियो फ़ाइल · 5.8 MB
इस रिकॉर्डिंग के शब्द नीचे Aheri Gondi में दिए गए हैं।
वेल्लेन वर्सां आतस्के, दुनियाते वेल्लेन लोकुल्क आतुर. ओर वेल्लेन पापि आनि बदमास आसि मत्तुर. ओर इच्चोन हेळसोत्तुर गदा, पेन उंदि पेद्दा कम्मुड वायागोटसि पूरा दुनियातुने नासडेम कियाना निरनायम येतता.
गानि नोहा इनना मनकनतोनि पेन वेल्लेन कूस मत्ता. ओर हेळसोत्ता लोकुल्कुना नड्डुम मंचिगुडा नीतिमंतुड मत्तोर. ‘नना उंदि पेद्दा कम्मुड वायागोटंतन, अदुनहाटीं निमे उंदि पेद्दा डोंगा तयार कीम,” इंचि पेन नोहांकु वेहता.
140 मीटर्कुना पोडगु, 23 मीटर्कुना नेरवु, आनि 13.5 मीटर्कुना एत्तु मनना उंदि डोंगा तयार कियालय पेन नोहांकु वेहता. नोहांकु आ डोंगा कट्टेतोनि तयार कियानद मत्ता. अव्टे मूडु अंतराल्क, वेल्लेन अर्रां, उंदि एनागर्रा आनि उंदि किडकि इर्रानद मत्ता. आ डोंगा नोहाल, ओना परिवातोर आनि बूमिपोर्रो मनना अन्नि तीरकुना जिवरासिन कम्मुडताल पिसागोटालय तयार कियमळ जर्गता.
नोहाल पेनदा पोल्ले केंजतोर. नोहाल आनि ओना मर्कु कलियसि पेन वेहतापे डोंगा तयार कीतुर. अद वेल्लेन पेद्दा डोंगा मत्ताहटीं अदुन तयार कियालय वेल्लेन वर्सां दल्गतां. वायाना कम्मुडता बारेमते नोहाल लोकुल्कुंक वेहतोर, पेनदाहेके वायालय वेहतोर, गानि आ लोकुल्कु ओना पोल्लेतुन नम्मा हिल्लुर.
‘नीकु, नीवा परिवातोर्कु आनि जिवरासिंक हालानच्चो तिंडि-मेता निमे जमा कीकुन्नु,’ इंचि पेन नोहांकु वेहचि मत्ता. अन्नि तयार आसि, वेला वातस्के, नोहाल, ओना मुत्तो, ओना मुव्वुर मर्कु-कोडियाह्कु इल्हा एनमिदि मंदि आ डोंगाते होळियानद मत्ता.
कम्मुड वातस्के अन्नि जिवरासिनाल, पिट्टेनाल उंदि तल्लुर, उंदि पोतु कम्मुडताल पिसागोम इंचि पेन आ जिवरासिन, पिट्टेन डोंगाते होळियालय नोहानगा लोहता. इल्हा मोक्कुंकु ओज्जानालायकतव हरेक जिवरासिनाल एडुं तल्लुर जिवरासिन आनि एडुं पोतु जिवरासिन पेन नोहानगा लोहता. अव अन्निगुडा डोंगाते होळियतस्के पेन कुद्दु आ डोंगाता तल्पुन बंद कीता.
अस्के पिर्रु वायालय सुरुव आता, वासेकेन होत्ता, वासेकेन होत्ता. इल्हा आगाकोंटा नल्पै रोजकु, नल्पै नर्कां उंदितीर वासेकेन मत्ता. दुनियाता हरेक वस्तु, एत्तु-एत्तु गुट्टांगुडा आ येते मुळ्गिसि होत्तां
डोंगाते होळियता मत्ता मनकालोर आनि जिवरासिं तप्पा बूमिपोर्रो मत्तव अन्निगुडा हासोत्तां. आ डोंगा येतपोर्रो तेलसेके मत्ता, दानहेंदाल अव्टे मत्ता हरेक वस्तु, मनकल आनि जिवरासि बतले तकलिप हिलाकोंटा मत्ता.
पिर्रु मग्गुतस्के, हेय्युं नेल्कुनदाका आ डोंगा येतपोर्रो तेलसेके मत्ता. आ हेय्युं नेल्कुना लोप्पो येरगुडा तक्को आसेके मत्ता. उंदि रोजु आ डोंगा उंदि गुट्टाता कोस्सक होंचि आगुता. गानि दुनिया मात्रम इंकागुडा येतेन मुळ्गिसि मत्ता. मूळ नेल्क आतस्के गुट्टाना कोस्सा कोड्डिं दिसालय दल्गतां.
नल्पै रोजकु आतस्के, येर पुरागा वत्तुताना हिल्लेना कनकुनालय उंदि काकडतुन नोहाल पलाते लोहतोर. आ काकड वत्तुता बूमिहाटीं हेके-हीके तिरियता गानि दानकु बग्गेने वत्तुता बूमि दोर्काहिल्ले.
पजा उंदि रोजु नोहाल उंदि पावरेमतुनगुडा पलाते लोहतोर. गानि दानकुगुडा बग्गेने वत्तुता बूमि दोर्कुवाहेंका अद मल्सि नोहानगेन वाता. उंदि वारम आतस्के नोहाल अदे पावरेमतुन मर्रा पलाते लोहतोर. अस्के अदु दाना तोळ्दे जय्तुन मराता उंदि आकि पीकुंचि वाता. येर तक्को आसेके मत्ता, मराकुना मोल्कां मर्रा मोलियालय दल्गतां.
नोहाल इंकुंदि वारमदाका एदुर हूळसि, अद पावरेमतुन मूडोव मल्का पलाते लोहतोर. दानकु वत्तुता जेगा दोर्काहेंके अद ई मल्का मात्रम मल्सि वायाहिल्ले. येर वत्सोंचेके मत्ता.
रोंडु नेल्क आतस्के पेन नोहानतोनि इल्हा इत्ता, “इंदके निमे, नीवा परिवार आनि अन्नि जिवरासिं डोंगाताल पलाते पेय्सि वटु. वेल्लेन मर्क-मियाह्कुन, तंग मर्क-मियाह्कुन कंचि, बूमिपोर्रो निंडसि होंटु.” अस्के नोहाल आनि ओना परिवारतोर डोंगाताल पलाते वातुर.
नोहाल डोंगाताल पलाते वासि, उंदि गद्दे कीतोर. कीसि मोक्कुलायक मत्ता जिवरासिनाल कोन्नि जिवरासिना मोक्कु हीतोर. पेन आ मोक्कुनाहेंदाल कूस आसि नोहांक आनि ओना परिवारतोर्क आसिर्वाद हीता.
पजा पेन इल्हा इत्ता, “मनकल ओना सिन्नास्केटाले पापि आंदुर. आयिना नना मर्रा बस्केन ओर कियाना तप्पुड कबाह्कुनाहाटीं बूमिकु सापनेम हिय्योन आनि कम्मुड वायागोटसि दुनियातुन नासडेम किय्योन इंचि ओट्टु तिंतन.”
पजा पेन अद हीता पोल्लेता चिन्ह इंचि मोट्टा मोदाला सिंगिडि तयार कीता. बस्के-बस्के अय्ते मब्बुने सिंगिडि दिस्सार, अस्के पेन अद तित्ता ओट्टुन मति कींता आनि दाना लोकुल्कगुडा मति कींतुर. बायबलता उत्पत्ति पुस्तकताल अद्याय 6-8 ताल ई वेसुडि येतमळ जर्गता.
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।