4. अब्राहामुनतोनि पेन करार कींता
यह कहानी सुनें ऑडियो फ़ाइल · 4.2 MB
इस रिकॉर्डिंग के शब्द नीचे Aheri Gondi में दिए गए हैं।
कम्मुड वासि वेल्लेन वर्सां आतंका, दुनियाते वेल्लेन लोकुल्क आतुर. ओर पेनदा विरोदमते आनि ओर-ओरा विरोदमते मर्रा पापम कीतुर. बारित्ते ओर अंटोर उंदे बासा वळ्कुंदुर. अदुनहेंदाल ओर अंटोर उंदासि, पेन वेहाकोन्ना गानि दुनियातुन निहानाहाटीं उंदि सहर उपिस्तुर.
ओर्कु इरगा गर्रा मत्ता. पिस्वर बल्हा पिस्साना? इदुना बारेमते पेन वेहता आदेसकुन पीसि ताकमळ ओर्कु इस्टम मनाहिल्ले. अचोने आयाका स्वर्गमदाका एव्वानाहाटीं ओर उंदि पेद्दा गोपुरम दोहालय सुरुव कीतुर. पेन हूळसि, ‘ईर अंटोर कलियसि पापम कीसेके होत्ते, वेल्लेन पापि कबाह्क कींतुर,’ इंचि इत्ता.
अदुनहाटीं पेन ओरा बासातुन वेल्लेन बासाने मारियागोटता आनि ओर्कुन अंटोर्कुन पूरा दुनियाते पैलांचता. ओर बद सहरतुन अय्ते उपिच्चालय सुरुव कीसि मत्तुरो, अदुन बेबिलोन इंतुर. आ पोरोलता अर्तम, ‘गयबेत’ इंचि मंता.
कोन्नि नुह्कुना वर्सां आतस्के, अब्राम इनना वरोर मनकनतोनि पेन वळ्कता. पेन ओन इल्हा इत्ता, “नीवा देसेम आनि नीवा परिवारतुन होळसि, नना हुप्साना देसेम निमे पेय्सि होन. अस्के नना नीकु आसिर्वाद हींतन, नीहेंदाल उंदि पेद्दा जातितुन तयार कींतन. नीवा पोरोलतुन पेद्दा कींतन, नीकु आसिर्वाद हियानोंक नना आसिर्वाद हींतन, नीकु सापनेम हियानोंक नना सापनेम हींतन. नीहेंदाल दुनियाता अन्नि जातिनोर्क आसिर्वाद दोर्कार.”
अय्ते अब्राम पेनदा पोल्ले केंजतोर. ओर ओना अंटोर सेवाकुल्कुन, ओना संपत्तितुन आनि ओना मुत्तो सारान पीकुंचि, पेन हुपिस्ता कनाना इनना देसेम पेय्सि होत्तोर.
अब्राम कनान देसेमते येवतस्के पेन ओन इल्हा इत्ता, “नालुं मूलां तिरियसि हूळा! नना नीकु ई देसेमतुन पुरागा हींतन. नीवा वंसमतोर अंटोरगुडा ई देसेमपोर्रो अदिकार ताकसानुर.” अस्के अब्राम अदे देसेमते जेगा आतोर.
अन्निटकन्ना पेद्दा पेनदा वरोर पेर्मल मत्तोर, ओन पोरोल मल्किसेदेक. उंदि रोज अब्राम लडाइ कीसि मल्सि वायनेंके ओर अब्रामुंक कलियतोर. अस्के मल्किसेदेक अब्रामुंकु आसिर्वाद हीसि, “स्वर्ग आनि बूमिता मालक आता आ अन्निटकन्ना पेद्दा पेन नीकु आसिर्वाद हिय्यि,” इंचि इत्तोर. अस्के अब्राम लडाइते गेल्सता अन्निटवुना पदोव बागम मल्किसेदेकुंक हीतोर.
वेल्लेन वर्सां आसोत्तां, गानि अब्राम आनि सारांक मात्रम इदवेरदाकागुडा मर्क-मियाह्क पुट्टाहिल्लुर. ‘नीकु वरोर मर्रि पुट्टांतोर. मब्बुने मनना सुक्कां मत्ताप ओना वंसमतोर पुट्टानुर.’ इंचि पेन अब्रामुंक मर्रुंदि मल्का पोल्ले हीता. पेन हीता पोल्लेपोर्रो अब्राम विस्वासम कीतोर. अब्राम वरोर बेस नीतिमंतुड इंचि पेन गवाइ हीता. बारित्ते ओर पेन हीता पोल्लेपोर्रो विस्वासम कीतोर.
अस्के पेन अब्रामुनतोनि उंदि करार कीता. उंदि करार इत्ते, बोरन्ना इव्वुर नड्डुम जर्गाना कबाह्कुन कियानाहाटीं जर्गंता. पेन अय्ते अब्राम मींडसि मननेंके ओनतोनि करार कीता. गानि अब्राम मींडसिगुडा पेनदा पोल्ले केंजसेके मत्तोर. पेन इत्ता, “नना नीवा मेंदुल्ताल नीवा सतता मर्रिन नीकु हींतन. नीवा वंसमतोर्क ई कनान देसेमतुन हींतन.” अयनागानि अब्रामुंकु इंका मर्क-मियाह्क हिल्लुर. बायबलता उत्पत्ति पुस्तकताल अद्याय 11-15 ताल ई वेसुडि येतमळ जर्गता.
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।