5. हीता पोल्‍ले परकारम पुट्ता मर्रि

अब्राम आनि सारै कनान देसेमते होंचि पदि(10) वर्सां आतां, गानि ओर्कु इंका मर्क-मियाह्‍क आयाहिल्‍लुर. अदुनहाटीं अब्रामुना मुत्‍तो सारै, ओन इल्‍हा इत्‍ता, “पेन नाकुन पिलाल्‍क कननालायक कियाहिल्‍ले. ननागुडा इंदके मातरिन आतन, नना पिलाल्‍क कनापर्रोन. अय्ते नावा दासि हाजिरान निमे मरमिं आम, अस्‍के अद नावाहाटीं वरोर पेडन कनंता.”

पजा अब्राम हाजिरानतोनि मरमिं आतस्‍के अद वरोर पेडन कंता, अब्राम आ पेडन पोरोल इस्माएल दोसतोर. गानि सारै मात्रम हाजिरानपोर्रो अळुंदु. इस्‍माएल पदामूडु(13) वर्सानोर आतस्‍के पेन अब्रामुनतोनि मर्रा वळ्‍कता.

पेन इत्‍ता, “नना वेल्‍लेन ताकतवार पेनदुन आंदुन. नना नीतोनि उंदि करार कींतन.” अस्‍के अब्राम बूमिपोर्रो अर्सि पेनदुक जोहार कीतोर. पेन इल्‍हागुडा इत्‍ता, “निमे वेल्‍लेन जातिनोर्क बाबो आकिन. नना नीकु आनि नीवा वंसमतोर्क कनान देसेमतुन पुरागा हींतन. हमेसाताहाटीं नना मीवा पेन आसि मनंतन. नीकु नीवा लोता हरेक मांडसा मनकना कतना कियापींता.”

“नीवा मुत्‍तो सारै वरोर पेडन कनंता, ओर हीता पोल्‍ले परकारम पुट्ता मर्रि आयानुर. ओना पोरोल इसहाक इंचि इर्रा. नना ओनतोनि कीता करारतुन बस्‍केळताहाटीं इर्रंतन, ओनाहेंदाल उंदि पेद्‍दा जाति तयार आयार. नना इस्माइलुनहेंदालगुडा उंदि पेद्‍दा जाति तयार कींतन, गानि नावा करार मात्रम इसहाकुनतोने बस्‍केळ्‍क मनंता." पजा पेन अब्रामुना पोरोल बदलांचि अब्राहाम इंचि कीता. आ पोरोलता अर्तम, “वेल्‍लेटोर्कुंक बाबो” आंद. सारैना पोरोलगुडा पेन बदलांचि सारा इंचि कीता. आ पोरोलता अर्तम, “मोदाटा तल्‍लुर” आंद.

अद रोज अब्राहाम ओना लोतोरा अंटोर मांडसाता कतना कीतोर. पजा एडादि पेय्‍सतस्‍के, इत्‍ते अब्राहामुना वय्‍सु नूर(100) आनि साराना वय्‍सु टोंबै(90) मत्‍ता, अस्‍के अब्राहामुनाहेंदाल साराल मर्रिन कंता. पेन वेहतापे अब्राहाम आ पेडाना पोरोल इसहाक इरतोर.

इसहाक लेय्योड आतस्‍के, पेन अब्राहामुना विस्वासमता पट्टु हूळालय, “निमे नीवा वरोरे आता मर्रिन, नावाहाटीं मोक्‍कु इंचि बलि हीम.” इंचि इत्‍ता. मर्रागुडा अब्राहाम पेनदा पोल्‍ले केंजतोर आनि ओना मर्रिन मोक्‍कु हियालय तयार कीतोर.

अब्राहाम आनि इसहाक मोक्‍कु हियाना जेगाहेके होननेंके इसहाक इल्‍हा इत्‍तोर, “बाबा, मोक्‍कुनाहाटीं मनागा कट्टें अय्ते मंतां, गानि बलि हियालय मनागा गोर्रे बगा मंता?” इत्‍तोर. अस्‍के अब्राहाम, “कोको, बलि हियालय पेन गोर्रेतुन दोर्किचंता,” इंचि जवाब हीतोर.

मोक्‍कु हियाना जेगातगा येवतस्‍के, अब्राहाम इसहाकुन दोहचि मोक्‍कु गद्‍देपोर्रो मींडिस्‍तोर. ओर ओना मर्रिन हव्‍कानदे मत्‍ता, अचोटेन पेन, “आगा, पेडन हव्‍कुमा. निमे नीवा वरोरे आता मर्रिनगुडा नहगाटाल मक्‍किचि इर्राहिल्‍लिन, निमे नाकु निजमे वेरियंतिन, इंचि नाकु तेळियसोत्‍ता,” इंचि पेन इत्‍ता.

अचोटेन दग्‍गेरेन हाह्‍कुना पोदाते उंदि गोर्रे पोतु हिरकिसि मत्‍तद अब्राहाम हूळतोर. इसहाकुन बलि हियाना जेगाते बलि हियालय पेन गोर्रे पोतुन दोर्किच्ता. पजा अब्राहाम वेल्‍लेन कूस आसि आ गोर्रे पोतुन बलि हीतोर.

अस्‍के पेन अब्राहामुन इल्‍हा इत्‍ता, “निमे नावाहाटीं अन्नि हियालय तयार आतिन, नीवा वरोरे आता मर्रिनगुडा नावाहाटीं हियालय तयार आतिन. नना नीकु आसिर्वाद हींतन इंचि पोल्‍ले हीसेके मंतन. नीवा वंसमतोर मब्‍बुने मनना सुक्‍कांकन्ना एक्‍को आयानुर. निमे नना वेहताप ताकतिन इंचि नीवा परिवारहेंदाल नना ई दुनियाते मनना अन्नि जातिनोर्कु आसिर्वाद हींतन. बायबलता उत्‍पत्‍ति पुस्‍तकताल अद्याय 16-22 ताल ई वेसुडि येतमळ जर्गता.