6. पेन इसहाकुनाहाटीं व्यवस्‍ता कींता

अब्राहाम वेल्‍लेन मातरल आतस्‍के, इसहाकगुडा बेस लेय्योड आतोर. अदुनहाटीं अब्राहाम इसहाकुनाहाटीं मुत्‍तोन पीसि वायालय ओना वरोर सेवाकुन अब्राहामुना जीवातोर मनना देसेमकु लोहतोर.

अब्राहामुना जीवातोर मनना देसेम वेल्‍लेन लक्‍कु मत्‍ता. अगा होनालय वेल्‍लेन रोजकु दल्‍गतां. पजा पेन आ सेवाकुन उंदि रेबेका इनना पेगिटा लोन ओता. आ पेगिड अब्राहामुना तम्मुना तंगमिय्यड आंद.

रेबेकालगुडा दाना परिवारतुन होळसि आ सेवाकुनतोनि होनालय ओप्‍कुत्‍ता. अद इसहाकुना लोन एव्ता एव्‍वुडे इसहाक दान मरमिं आतोर.

वेल्‍लेन कालम पेय्‍सोत्‍ता पजा, अब्राहाम हासोत्‍तोर. अस्‍के पेन अब्राहामुनतोनि कीता करारताहाटीं, इसहाकुंक आसिर्वाद हीता. आ करारते, अब्राहामुनाहेंदाल लेक्‍का परवच्‍चो वंसमतोर आयानुर. इंचि पेन पोल्‍ले हीसि मत्‍ता. गानि रेबेकांक मात्रम पिलाल्‍क आयाहिल्‍लुर.

इसहाक रेबेकानाहाटीं पारतना कीतोर अय्ते पेन रेबेकाना पीटे एमडाल्‍कुन वाटसीता. आ पिलाल्‍क रेबेकाना पीटे मननेंकेन लोप्‍पोटद लोप्‍पेन जगडाल्‍क आयुंदुर, अदुनहाटीं रेबेकाल जर्गनंता पेनदुक वेहसीता.

अस्‍के पेन रेबेकान इल्‍हा इत्‍ता, “निमे इव्‍वुर मर्कुन कनकिन, ओर इव्‍वुर वेरे-वेरे जातिनोर आयानुर. ओर्क वरोनद वरोंक अर्रो. गानि नीवा पेद्‍दा मर्रिनाहेंदाल पुट्‍टना जातितोर्कु, नीवा सिन्‍ना मर्रिनाहेंदाल पुट्‍टना जातितोरा पोल्‍ले पोर्रो ताका पिय्यार.”

रेबेकाल मोदाटा मर्रिन कंता. ओर एर्रगा आनि केल्‍कु पीसि पुट्तोर. ओर ओनकु एसाव इंचि पोरोल दोसतुर. पजा ओरा सिन्‍ना मर्रि एसावुना मडमेतुन पीसि पुटतोर. ओना पोरोल याकोब इंचि इरतुर.