7. पेन याकोबुंक आसिर्वाद हींता

आ पिलाल्‍क पेद्‍दागा आतस्‍के, याकोबुंक लोन मनमळे पसंद वाता. गानि एसावुंक मात्रम जिवरासिना सिकार कियमळ पसंद वाता. रेबेकाल याकोबुन बेस हूळुंदु. गानि इसहाक एसावुन बेस हूळुंदुर.

उंदि रोजु एसाव सिकार कीसि लोन वातस्‍के, ओन्‍कु इरगा कर्वेस्‍सि मत्‍ता. अस्‍के ओर याकोबुन, “निमे बतल अय्ते अट्तिनो, अव्टेटाल गोडच्‍चो गाटो नाकु हीम,” इत्‍तोर. अस्‍के याकोब ओनकु इल्‍हाँ जवाब हीतोर, “नना नीकन्ना पेद्‍दोन आंदुन. अदुनहाटीं नीकु दोर्कना हरेक वस्‍तुकु नाकु हींतन, इंचि निमे मोदाला पोल्‍ले हीम,” इत्‍तोर. अय्ते एसाव अन्नि वस्‍तुकु याकोबुंक हींतन इंचि पोल्‍ले हीतोर. अस्‍के याकोब ओनकु गोडच्‍चो गाटो हीतोर.

इसहाक एसावुंक आसिर्वाद हियालय हूळुंदुर. गानि ओर आसिर्वाद हिय्याका मुन्नेन रेबेकाल आनि याकोब इव्‍वुर कलियसि एसाव आयाना नाटकम कीसि इसहाकुंकु दोका कीतुर. इसहाक वेल्‍लेन मातरल मत्‍तोर, ओनकु कळ्‍कु दिस्‍साकोंदुं. अय्ते याकोब एसावुना कपडिं केरसि, एटिता तोल ओना बोंडंगे आनि कयकुंक हुटकुत्‍तोर.

पजा याकोब इसहाकुनगा वासि, “नना एसावुन आंदुन, निमे नाकु आसिर्वाद हीम इंचि, नना निहगा वातन,” इत्‍तोर. अस्‍के इसहाक एटि बूरातुन आनि कपडिन मूसकिसि हूळतोर, अस्‍के ओनकु एसाव अनपिच्‍चि ओर याकोबुंक आसिर्वाद हीतोर.

एसाव याकोबुनपोर्रो होंग आतोर. बारित्‍ते याकोब एसावुना जेस्‍टम पालुना अदिकार आनि ओनकु दोर्काना आसिर्वादतुनगुडा दोंगा कीतोर. पजा ओर ओना बाबो हातस्‍के याकोबुन हव्‍काना पिलान कीतोर.

गानि रेबेकाल एसावुना पिलानुन केंजता. अदुनहाटीं रेबेकाल आनि इसहाक इव्‍वुर कलियसि याकोबुन रेबेकाना जीवातोराहेके होंचि मनालय लक्‍कु लोहचीतुर.

याकोब वेल्‍लेन वर्सानदाका रेबेकाना जीवातोरगा मत्‍तोर. अल्‍हा मननेंके ओर मरमि आसि ओनकु पन्‍नेंड(१२) मर्कु आनि उंदि मिय्यळ पुटता. पेन ओन वेल्‍लेन सिरमंत कीता.

इरवै वर्सानदाका ओना जीवातोरागटाल लक्‍कु कनान देसेमते मत्‍ता पजा, ओर ओना परिवारतोर्कुन, ओना सेवाकुल्‍कुन आनि ओना जिवरासिना मंदान पीकुंचि मल्‍सि वातोर.

एसाव इंदकेगुडा हव्‍कांतोर बारे इनकुंचि याकोब इरगा वेरियसि मत्‍तोर. अदुनहाटीं उंदि इनाम लेह्‍का जिवरासिना मंदातुन याकोब एसावुनगा लोहतोर. आ मंदातुन पीकुंचि होत्‍ता सेवाकुल्‍कु इल्‍हा इत्‍तुर, “नीवा दासुड याकोब ई जिवरासिन नीकु हीतोर, ओर बिरानेन वांतोर.”

गानि एसाव मात्रम याकोबुंक बदे नुकसान कियाना विचारम किया हिल्‍लोर. दाना बदुलते याकोबुन मर्रुंदि मल्‍का हूळसि वेल्‍लेन कूस आतोर. पजा याकोब कनान देसेमते इरगा सांतिते मनालय दल्‍गतोर. पजा इसहाक हातस्‍के याकोब आनि एसाव ओना गति कीतुर. पेन अब्राहामुंक हीता पोल्‍लें आनि करार इंदके इसहाकुनाहेंदाल याकोबुनपोर्रो वाता.