16. कापाळनोर
यह कहानी सुनें ऑडियो फ़ाइल · 9.6 MB
इस रिकॉर्डिंग के शब्द नीचे Aheri Gondi में दिए गए हैं।
येहोसु हासोत्तस्के इस्राएल लोकुल्कु पेनदा कदर इर्रा हिल्लुर. ओर पेनदा नियमाल्कुन पीसि ताकाहिल्लुर. पेन हींतन इत्ता देसेमते मय्सि मत्ता कनानि लोकुल्कुन अद देसेमताल पलाते पेच्हा हिल्लुर. इस्राएल लोकुल्कु ओरा सत्तेम यहोवा पेनदुन होळसि, कनानि लोकुल्कुना पेनकुन मोळ्कमळ सुरुव कीतुर. इस्राएल लोकुल्कुनपोर्रो बोरे राजाल मनवाहेंका, बोरा मनसुंक वाताप ओर कियालय दल्गतुर.
पेनदा आदेसतुन केंजाकोंटा इस्राएल लोकुल्कु उंदि रिवाजतुन बच्चुंगो मल्का कीतुर. अद रिवाज इल्हा मुन्ने ताकता: कोन्नि वर्सनदाका इस्राएल लोकुल्कु पेनदा आदेसतुन केंजाकोंटा आंतुर, अस्के अद ओर्कुन ओरा पगातोरा कय्दे ओळागोटसि ओर्कु सिक्सा हींता. ई पगातोर इस्राएल लोकुल्कुनगटाल ओरा वस्तुकुन दोसकुंतुर, ओरा संपत्तितुन नासडेम कींतुर, ओरा लोप्पोटाल वेल्लेन मंदितुन हव्कांतुर. पजा इस्राएल लोकुल्कुना पगातोर, ओरपोर्रो बच्चुंगो वर्सनदाका अन्यायम कीतस्के, इस्राएल लोकुल्कु ओर कीता पापाल्कुनाल मनसु मार्सकुंतुर आनि ओर्कुन कापाळनाहाटीं पेनदुक पारतना कींतुर.
इस्राएल लोकुल्कु बस्के-बस्के मनसु मार्सकुंतुर अस्के-अस्के पेन ओर्कुन कापाळंता. अद वरोर कापाळनोनहेंदाल अल्हा कींता. ओर इसंटोर गदा, ओर इस्राएल लोकुल्कुना पगातोरा विरोदमते लडाइ कीसि ओर्कुन गेल्संतोर. अस्के देसेमते सांति वांता आनि आ कापाळनोर इस्राएल लोकुल्कुनपोर्रो मंचिगा राज्येम कींतोर. आ लोकुल्कुन पिसागोटनाहाटीं पेन बचटूरो कापाळनोर्कुन लोहता. ओरा दगेटदे मिद्यानि इनना उंदि पगा जातितोरा कय्दे पेन इस्राएल लोकुल्कुन ओळागोटसि मर्रा अल्हा कीता.
मिद्यानि लोकुल्कु एडूं वर्सनदाका इस्राएल लोकुल्कुना पंटातुन दोसकुंचेके मत्तुर. इस्राएल लोकुल्कु इरगा वेरियसि मिद्यानि लोकुल्कुंक दोर्कामन्नि इंचि गुट्टा सोर्रेने होंचि मकतुर. आकिरते ओर्कुन कापाळनाहाटीं पेनदुने केयतुर.
गिदोन पोरोलतोर वरोर इस्राएली मनकल मत्तोर. मिद्यानि लोकुल्कु गोह्कु दोसकुना मन्नि इंचि ओर मक्किसि उंदि जेगाते गोह्कु साप कीसेके मत्तोर. यहोवा पेनदा उंदि दूता ओनगा वासि, “ए लडाइते गेल्सना तेल्विगल्ला मनका, पेन नीतोनि मंता. होन, होंचि मिद्यानि लोकुल्कुना कय्दाल इस्राएल लोकुल्कुन कापाळा,” इंचि इत्ता.
गिदोनना बाबानगा बोम्माहाटीं कीता उंदि गद्दे मत्ता. पेन मोट्टा मोदाला गिदोनुंक गद्देतुन कुल्हाना कबळ वेहता. गानि गिदोन लोकुल्कुन हूळसि वेरियुंदुर, अदुनहाटीं ओर हीकट आयानदाका एदुर हूळतोर. पजा आ गद्देतुन कुल्हाचि तुकड़ां-तुकडां कीतोर. ओर पेनदाहाटीं उंदि पूना गद्दे वाटतोर, वाटसि दानपोर्रो पेनदाहाटीं मोक्कु हीतोर.
इंकुंदि रोज हक्केरा, बोरो गद्देतुन कुल्हाचि तुकडां-तुकडां कीतद लोकुल्क हूळतुर अस्के ओर इरगा होंगुक वातुर. गिदोनुन हव्कालय ओर ओना लोन होत्तुर, गानि गिदोनुना बाबाल, “मिमेट बारि मीवा पेनदा सहायम कियाना कोसिस कीसंतिर? अदगिंटा निजमे पेन आयानय्ते अद सतातुन कापाळकुन्निकांटी,” इंचि इत्तोर. ओर अल्हा इत्तोर इंचि लोकुल्कु गिदोनुन हव्का हिल्लुर.
अस्के इस्राएल लोकुल्कुन दोसकुनालय मिद्यानि लोकुल्कु मर्रा वातुर. ओर इच्चोन वेल्ले मत्तुर गदा, ओर्कुन लेक्कालयगुडा कुदरा हिल्ले. ओरा विरोदमते लडाइ कियालय गिदोन अंटोर इस्राएल लोकुल्कुन उंदगा केयतोर. पेन निजमे इस्राएल लोकुल्कुन कापाळनाहाटीं गिदोनुंक वेहचंतना इत्ता पोल्लेपोर्रो विस्वासम आयालय, गिदोन पेनदुन रोंडु चिन्हां तल्कतोर.
मोदाटा चिन्हाहाटीं गिदोन गोर्रे बूरातुन बूमिपोर्रो तारतोर, तारसि, “हक्केटा मच्चु सिराप ई गोर्रे बूरापोर्रेन अर्रागोम, बूमिपोर्रो अर्रामन्नि,” इंचि पेनदुन इत्तोर. पेन अल्हेन कीता. इंकुंदि नर्का गिदोन पेनदुन, “बूमि पदन आयिकांटी गानि गोर्र बूरा पदन आयानायो,” इंचि इत्तोर. पेन अल्हेन कीता. ई रोंडु चिन्हानाहेंदाल, पेन निजमे इस्राएल लोकुल्कुन मिद्यानि लोकुल्कुना कय्दाल कापाळना इन्कुंचंता इंचि गिदोनुंकु विस्वासम आता.
अस्के गिदोन सिपाइल्कुन केयतोर अय्ते मुप्पै रोंडु वेय्कुना (32000) मांडसा वातुर. अस्के पेन ओन, “ईर वेल्लेन मंदि आतुर,” इत्ता. अदुनहाटीं बोर अय्ते लडाइ कियालय वेरियुंदुर असोंटा इरवै रोंड वेय्कुना (22000) मंदितुन गिदोन लोन वापस लोहतोर. अयना, ‘ईर इंका वेल्लेन मंतुर’ इंचि पेन इत्ता. अदुनहाटीं गिदोन, मूड नुह्कुना (300) सिपाइल्कुन इरसि कळमातोर्कुन अंटोर्कुन वापस लोन लोहचीतोर.
अद नर्का पेन गिदोनुन इल्हा इत्ता, “मिद्यानि लोकुल्कुना कँपने होन्नु, होंचि ओर बतल वळ्कंतुरो, ओरा पोल्लें केंजा. ओक्कला ओर वळ्काना पोल्लें निमे केंजानय्ते ओरपोर्रो लडाइ कियालय निमे वेरियिन.” अदुनहाटीं अद नर्का गिदोन मिद्यानि लोकुल्कुना कँपने होत्तोर. होंचि वरोर मिद्यानि सिपाइ ओर कलाते हुळतदुन ओना वरोर दंटागानकु वेहानद ओर केंजतोर. अस्के आ सिपाइना दंटागाल, “गिदोनुना सैनम मना मिद्यानि सैनमतुन ओळिचंता इंचि ई कलाता अर्तम आंदु,” इंचि इत्तोर. अद पोल्ले गिदोन केंजतस्के ओर पेनदा स्तुति कीतोर.
अस्के गिदोन ओना सिपाइल्कुनगा मल्सि होत्तोर, होंचि हरेक सिपाइंक उंद-उंदि तूताकोम, उंदि तोळिता सिप्पा आनि उंदि दिव्टि हीतोर. पजा ओर मिद्यानि सिपाइल्क मींडसि मत्ता कँपता सुट्टु आतुर. गिदोनुना मूड नुह्कुना (300) मंदि सिपाइल्क ओरा दिव्टिन तोळिता सिप्पने मुच्चिसि मत्तुर. अदुनहाटीं मिद्यानि लोकुल्कु ओरा दिव्टिना वेलगुन हूळा पर्राहिल्लुर.
अस्के गिदोनुना अंटोर सिपाइल्क ओरगा मत्ता तोळिता अन्नि सिप्पान उंदे मल्का पय्हाचि अचानक तळमिता पेद्दा वेलगु कीतुर. ओर ओरा तूताकोम्कु उह्कुसेके, “यहोवा पेनदा आनि गिदोनुना कसेर!” इंचेके इरगा मोत्कुत्तुर.
पेन मिद्यानि लोकुल्कुन वेराहता, अदुनहाटीं ओर वरोंक-वरोर हव्कुड-कोय्युड कियालय दल्गतुर. अस्के मिद्यानि लोकुल्कुनतोनि लडाइ कियालय ओर्कु सहायम कियालय कळमता इस्राएल लोकुल्कुन केयालय गिदोन बिराना कबुरतोर्कुन लोहतोर. वेल्लेन मिद्यानि लोकुल्कुन हव्कमळ जर्गता आनि मिगिल्सि मत्तोर्कुन ओरा पज्जो-पज्जो होंचि ओर्कुन इस्राएल देसेमताल पलाते पेच्हामळ जर्गता. उंदि लक्से इरवै वेय्कुना (1,20,000) मिद्यानिर्क हातुर. इल्हा इस्राएल लोकुल्कुन पेन कापाळता.
ओर लोकुल्कु गिदोनुन ओरा राजाल कियालय हूळतुर, गानि गिदोन अल्हा जर्गा हिय्या हिल्लोर. गानि मिद्यानि लोकुल्कुनाहेंदाल दोसकुंचि तत्ता बंगारमता अन्नि नगां मात्रम गिदोन इस्राएल लोकुल्कुनाहेंदाल तल्कतोर. आ लोकुल्कु गिदोनुंक वेल्लेन बंगारम हीतुर.
अस्के गिदोन आ बंगारमतोनि पेद्दा पेर्माल केर्रानसोंटद उंदि विसेस अंगि तयार कीतोर. लोकुल्कु दानगुडा उंदि बोम्माकु मोळ्कताप मोळ्कालय दल्गतुर. अल्हा कीताहाटीं पेन मर्रा इस्राएल लोकुल्कुंक सिक्सा हीता, बारित्ते ओर बोम्माकु मोळ्कतुर. इस्राएल लोकुल्कुन गेल्सानाहाटीं पेन ओरा पगातोर्कुन इरगा मजबूत कीता. गानि इस्राएल लोकुल्कु आकिरते मर्रा ओर्कु सहायम कियाना इंचि पेनदुक पारतना कीतुर. अस्के ओर्कुन कापाळनाहाटीं पेन मर्रा इंकावरोन कापाळनोन ओरगा लोहचीता.
इदे पोल्ले बच्चुंगो मल्कां आसेके मत्ता: इस्राएल लोकुल्कु पापम कींतुर, पेन ओर्कु सिक्सा हींता, ओर मनसु मार्सकुंतुर, ओर्कुन कापाळनाहाटीं पेन बोनना लोहंता. बच्चुंगो वर्सनदाका पेन इस्राएल लोकुल्कुन कापाळनाहाटीं बचटूरो कापाळनोर्कुन लोहता, ओर इस्राएल लोकुल्कुन ओरा पगातोरा कय्दाल कापाळतुर.
आकिरते, वेरे देसेल्कुनोरलेसीं इस्राएल लोकुल्कुगुडा ओराहाटीं राजाल गावाले इंचि पेनदुन तल्कतुर. बोर अय्ते एत्तु, ताकतवार मंतोर, आनि ओरा मुन्ने अरसि ओर्कुन ताकसा पर्रांतोर, असोंटा राजाल इस्राएल लोकुल्क कोरसेके मत्तुर. पेनदुक मात्रम ओर तल्कता पोल्ले नच्चा हिल्ले, गानि ओर तल्कतसोंटा राजाल पेन ओर्कु हीता.
न्यायियों अध्याय 1-3; 6-8; 1 शमूएल 1-10 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।