15. पेन हींतन इत्ता देसेम
यह कहानी सुनें ऑडियो फ़ाइल · 6.5 MB
इस रिकॉर्डिंग के शब्द नीचे Aheri Gondi में दिए गए हैं।
आकिरते पेन इस्राएल लोकुल्कुंक हींतन इत्ता देसेमते इत्ते, कनान देसेमते ओर होळियाना वेला वाता. अद देसेमते यरिहो इनना उंदि सहर मत्ता. दाना लोप्पो बोरे होळियाकोंटा मननाहाटीं दाना सुट्टु गट्टि कंटेगूरें दोहचि मत्ता. येहोसु अद सहरता लोप्पो इव्वुर जाडागाह्कुन लोहतोर. अद सहरते रहाब पोरोलता उंदि बोगमोतड मनुंदु. अद ई जाडागाह्कुन दानागा मक्किचि इरता, आनि पजा ओर्कुन अद सहरताल पिस्सि पेय्सि होनालय ओर्कु सहायमगुडा कीता. अद पेनदुन नम्मुंदु इंचि अद अल्हा कीता. यरिहो सहरतुन नासडेम कियानस्के रहाब आनि दाना लोतोर्कुन नासडेम किय्योम इंचि आ जाडागाह्कु दानकु पोल्ले हीतुर.
पेन हींतन इत्ता देसेमते इस्राएल लोकुल्कु होनागोम इत्ते ओर्कु योर्दन इनना बेरेड दाटाना मत्ता. पेन येहोसुन, “पेर्मालोर्कुन मुन्ने होना हीम,” इत्ता. पेर्मालोर योर्दन बेरेटे अळगु वाटतुर अय्ते पोंगाना बेरेड अग्गेने आगता, दानहेंदाल इस्राएल लोकुल्कु बेरेटा हब्बेटा बाजुना बूमिते होना परतुर.
यरिहो सहर वेल्लेन गट्टि सहर मत्ता. अयना इस्राएल लोकुल्कु योर्दन बेरेड दाटतस्के पेन येहोसुन, “यरिहो सहरपोर्रो लडाइ कियालय तयार आम्टु,” इंचि इत्ता. ‘मीवा पेर्मालोर आनि मीवा सिपाइल्कु हारूं रोजकुनदाका आ सहर सुट्टु तिरियसेके मनना,’ इंचि पेन इस्राएल लोकुल्कुंक वेहता. पेन वेहतापे आ पेर्मालोर आनि सिपाइल्क कीतुर.
पजा एडुंगों रोजुननाडु, इस्राएल लोकुल्कु आ सहरता सुट्टु मर्रा एडूं मल्का तिरियतुर. ओरा सहर सुट्टु एडूं मल्का तिरियमळ आतस्के, पेर्मालोर ओरा तूरिलां उह्कतुर आनि सिपाइल्क पेद्दा आवाज कीतुर.
अस्के यरिहो सहरता सुट्टु मत्ता अन्नि कंटेगूरे कूल्सि अर्तां. पजा इस्राएल लोकुल्कुंक पेन आदेस हीतस्के ओर आ सहरता हरेक वस्तुकुन नासडेम कीतुर. गानि इस्राएल लोकुल्कुने कलियसोत्ता आ रहाब आनि दाना परिवारतोर्कुन मात्रम नासडेम किया हिल्लुर. यरिहो सहरतुर इस्राएल लोकुल्क नासडेम कीतुर इंचि कनान देसेमते मत्ता कळमाता लोकुल्कुंक तेळियतस्के, इस्राएल लोकुल्कु ओरपोर्रोगुडा लडाइ कींतुर इंचि ओर इरगा वेरियतुर.
कनान देसेमते मनना बदे जातिता लोकुल्कुनतोनि मंचिपोल्ले आयानायो इंचि पेन इस्राएल लोकुल्कुंक आदेस हीसि मत्ता. गानि गिबोनि इनना उंदि कनानि जातिता लोकुल्कु, ‘मोमोट कनान देसेमताल वेल्लेन लक्कु वेरे जेगाते मनांतोम,’ इंचि येहोसुनतोनि आबद्दम वळ्कतुर. ओर येहोसुनतोनि मंचिपोल्ले आयालय इरगा बतिमलाडतुर. असोंटस्के, येहोसु आनि इस्राएल लोकुल्कुना कळमाता नेतालोर, बल्हा बतल कियाना इंचि पेनदुन तल्कागुडा तल्का हिल्लुर. ओर गिबोनि लोकुल्कुतनोनि मंचिपोल्ले आतुर.
मूड रोजकु आतस्के, गिबोनि लोकुल्कु कनान देसेमतेन मनुंदुर इंचि इस्राएल लोकुल्कुंक तेळियसोत्ता. गिबोनि लोकुल्कु ओर्कु दोका कीतुर इंचि इस्राएल लोकुल्कु इरगा होंगुंक वातुर. अयना इस्राएल लोकुल्कु पेनदा मुन्नेन गिबोनि लोकुल्कुनतोनि मंचिपोल्ले आताहाटीं ओर अदुन नेम्हा हिल्लुर. कोन्नि रोजकु आतस्के, गिबोनि लोकुल्कु इस्राएल लोकुल्कुनतोनि मंचिपोल्ले आतुर इंचि, कनान देसेमते मनना एमोरि इनना इंकुंदि जातिता राजालोर केंजतुर. अदुनहाटीं ओर ओरा वरोर-वरोर सिपाइन जमा कीसि पेद्दा सैनम कीतुर, पजा गिबोन पोर्रो लडाइ कीतुर. सहायताहाटीं गिबोनि लोकुल्कु येहोसुंक कबुर लोहतुर.
अस्के येहोसु इस्राएलतोरा सैनमतुन जमा कीसि गिबोनि लोकुल्कुनगा होनालय नर्का-पल्हिं ताकतुर. हक्केरे पंगाय्नेंके ओर एमोरि लोकुल्कुना सैनमतुन इचंत्रमते अराहचि ओरपोर्रो लडाइ कीतुर.
अद रोजु पेन इस्राएल लोकुल्कुनाहाटीं लडाइ कीता. अद एमोरि लोकुल्कुन वेराहता. पेद्दा-पेद्दा बंडां अराहचि वेल्लेन मंदि एमोरि लोकुल्कुन हव्कुता.
इस्राएल लोकुल्कु एमोरि लोकुल्कुन पुरागा गेल्सगोम इंचि पेन पोळ्दुनगुडा मब्बुने उंदि जेगाते आपिसि इरता. अद रोज पेन इस्राएल लोकुल्कुनाहाटीं उंदि पेद्दे गेल्पु गेल्सि हीता.
पेन ओरा सैनमतुन ओळिच्तस्के, कनान जातिता वेल्लेन लोकुल्कु इस्राएल लोकुल्कुनपोर्रो लडाइ कियालय उंदगा जमा आतुर. अस्के येहोसु आनि इस्राएल लोकुल्कु ओरपोर्रो लडाइ कीसि ओर्कुन नासडेम कीतुर.
इव लडाइं आसोत्तस्के, इस्राएल लोकुल्कुना हरेक गोत्रमतोर्क पेन हींतन इत्ता देसेमता ओरा बागम ओर्क हीसीता. पजा पेन इस्राएलतोर्कुना हरेक सर्दुनपोर्रो सांति हीता.
येहोसु मातरल आतस्के इस्राएलता अंटोर लोकुल्कुन उंदे मल्का ओनगा केयतोर. वातस्के, सिनाइ गुट्टापोर्रो पेन ओरतोनि कीता करार परकारम ताकंतोम इंचि ओर पोल्ले हीतदुन इस्राएल लोकुल्कुंक मति कीसि वेहतोर. अस्के ओर पेनतोनि विस्वासमलायक मंचेके, दाना हरेक नियमतुन पीसि ताकंतोम इंचि पोल्ले हीतुर.
यहोशू अध्याय 1-24 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।