14. केडाते तिरियमळ
यह कहानी सुनें ऑडियो फ़ाइल · 8.5 MB
इस रिकॉर्डिंग के शब्द नीचे Aheri Gondi में दिए गए हैं।
पेन कीता करार परकारम बव नियमकुना पालन अय्ते इस्राएल लोकुल्क कियाना मत्तानो, अवुन पेन ओर्कु वेहामळ महाता. मर्रा पेन सिनाइ गुट्टातगटाल मुन्नेळ्क होनालय ओरा मुन्ने ताकता. पेन ओर्क हींतन इत्ता देसेमते अद ओर्कुन होयाना विचारमते मत्ता. आ देसेमतुन कनान इंचिगुडा इंतुर. मब्बुना कंबाते पेन ओरा मुन्ने-मुन्ने ताकसेके मत्ता आनि ओर दाना पज्जो-पज्जो ताकसेके मत्तुर.
पेन अब्राहाम, इसाक, याकोबुनतोनि, अद ओरा वंसमतोर्क हींतन इत्ता देसेमतुन ओर्क हींतन इंचि पोल्ले हीसि मत्ता, गानि अद वेलाते अगा वेल्लेन जातिना लोकुल्कु मनुंदुर. ओर्कुन कनानि इंचि इनुंदुर. आ कनानि लोकुल्क पेनदा आरादना कियाकोंदुर आनि दाना आदेसकुना पालनगुडा कियाकोंदुर. ओर आबद्दम पेनकुना पूजा कीसेके वेल्लेन कराब कबाह्क कियुंदुर.
पेन इस्राएल लोकुल्कुन इल्हा इत्ता, “मिमेट मीकु दोर्कना देसेमते होत्तास्के अगाटा अंटोर कनानि लोकुल्कुनाल मुक्ति दोर्किच्कुंटु. ओरतोनि हेळमि कल्पकुनमट आनि ओरतोनि मरमिंगुडा आयमट. ओरा अन्नि बोम्मान मिमेट नासडेम कीसि पोहाटु. मिमेट नना वेहता आदेसकुना पालन कियाकोंटे मिमेटगुडा ओरा पेनकुने मोळ्कालय दल्गंतिर."
बस्के अय्ते इस्राएल लोकुल्कु कनान देसेमता सर्दुनगा एव्तुर, अस्के मूसाल इस्राएल लोकुल्कुना हरेक गोत्रताल वरोर-वरोर इल्हा पन्नेंड मंदि मांडसातुन पेरतोर. पजा ओर्कुन, “मिमेट होंचि अद देसेम बसंटदो, अगाटा कनानि लोकुल्कु ताकतवार का मरि लंडोर्का? हूळसि वटु,” इंचि लोहतोर.
आ पन्नेंड मंदि मांडसा मनकालोर पूरा कनान देसेमते नल्पै रोजकु तिरियसि मल्सि वातुर. वासि ओर लोकुल्कुंक इल्हा वेहतुर, “अद देसेम वेल्लेन बेस मंता अगा इरगा पंटा पंडंता.” गानि पदि मंदि बारे, “अद देसेम वेल्लेन गट्टिगा मंता, अगाटा लोकुल्क एत्तुंक-एत्तु मंतुर. ओक्कला मनम ओरतोनि लडाइ कियानय्ते तप्पाकोंटा ओळांतोम, अस्के ओर मनाकुन हव्कांतुर.” इंचि इत्तुर.
होंचि वातोराव्टेटाल कालेब, यहोसु आनि इंकिव्वुर अस्केन इल्हा इत्तुर, “हाँ, कनान देसेमता लोकुल्कु निजमे एत्तुंक एत्तु, ताकतवार मंतुर, गानि मनम ओर्कुन गेल्सा परांतोम, पेन मनाहाटीं ओरतोनि लडाइ कींता.” इत्तुर.
गानि लोकुल्क मात्रम कालेब, येहोशुना पोल्ले केंजाहिल्लुर. ओर मूसाल आनि हारूनुनपोर्रो होंगुक वासि इल्हा इत्तुर, “मिमेट माकुन इसोंटा कतरनाक जेगाते बारि पीसि वातिर? मनम इजिप्ततेन मनना मत्ता. मनम अद देसेमते होनानय्ते लडाइते हासि दांतोम, आ कनानि लोकुल्कु मना मुत्तोह्कुन, पिलाल्कुन ओरा दासुल्क कीकुंतुर." इत्तुर. आ लोकुल्क ओर्कुन इजिप्त देसेमते वापस ओयानाहाटीं वेरे इंकावरोन पेर्राना विचारमते मत्तुर.
बस्के अय्ते आ लोकुल्क अल्हा इत्तुर, अस्के पेनदुक ओरपोर्रो इरगा होंग वाता. अद कलियाना डेराते वासि इल्हा इत्ता, “मिमेट ना विरोदमते निरनायम कीतिट, अदुनहाटीं मिमेट अंटोर इद केडाते तिरियमळ गावाले. इरवै वर्सां इरवै वर्सांकन्ना एक्को वयमतोर हरेक मनकल अगेन हायानुर आनि ओर बस्केन नना हींतन इत्ता देसेमते होळिया पर्रोर. सिराप कालेब आनि यहोसु ईरे अव्टे होळिया परांतुर.” इत्ता.
लोकुल्क पापम कीसि मत्तुर, अदुनहाटीं पेन अल्हा इत्तद केंजसि ओर्क अंटोर्क दुक्कम वाता. इंचि ओर कनानि लोकुल्कुनतोनि लडाइ कियाना निरनायम कीतुर. मूसाल ओर्कुन होनमट इंचि वेर्रे वेहतोर, बारित्ते पेन ओरतोनि होंचेक हिल्ले, गानि ओर मात्रम मूसाना पोल्ले केंजाहिल्लुर.
इद लडाइते पेन ओरतोनि लडाइ कियालय होनाहिल्ले इंचि कनानि लोकुल्क अद लडाइ गेल्सतुर आनि ओराव्टेटाल वेल्लेन मंदितुन हव्कतुर. अस्के इस्राएल लोकुल्क कनानताल मल्सि वातुर. मुन्ने नलपै वर्सानदाका केडाते ओर हेके-हीके तिरियसेके मत्तुर.
नलपै वर्सानदाका इस्राएल लोकुल्कु केडाते तिरियसेके मत्तुर, अव रोजकुने पेन ओरा अन्नि अवराल्क तीरसता. ओर्कु “मन्ना” इनना हारि पेन स्वर्गमताल हीता. ओर्कु हव्विं तिनालय दोर्कागोम इंचि पेन बटेरा इनना पिट्टेनगुडा ओरा डेराने लोहता. ओरा पूरा कालमते पेन ओरा कपडिं, हेरपुह्क हर्राकोंटा इरता.
अचोने आयका ओराहाटीं उनालय एरगुडा पेन उंदि बंडाताल पेचहाता. अद उंदि इचंत्रमाता कबळ आंद. गानि अवन्नि कीसिगुडा इस्राएल लोकुल्कु पेनदा विरोदमते आनि मूसाना विरोदमते वळ्कतुर, गुल्गतुर. अयनागानि पेन विस्वासमगल्लद आंद. अद अब्राहाम, इसाक आनि याकोबुना वंसमतोर्क बतल अय्ते कींतन इंचि पोल्ले हीता, अद अन्निगुडा कीता.
उंदि मल्का लोकुल्कुनगा एर मनाहिल्ले, अस्के पेन मूसान इत्ता, “बंडातोनि वळ्का, अस्के अव्टेटाल एर पेय्संता.” इत्ता. गानि मूसाल वळ्काहिल्लोर, दाना बदुलते दुड्डुने रोंड मल्का बंडापोर्रो तंतोर. इल्हा ओर पेनदा कदर रेहतोर. उनालय अंटोराहाटीं बंडाताल एर अय्ते पेय्सता, गानि पेन मूसानपोर्रो होंग आता. अद इल्हा इत्ता, “निमे इल्हा कीतिन, अदुनहाटीं हींतन इत्ता देसेमते निमे होळिया पर्रिन.” इत्ता.
बस्के अय्ते इस्राएल लोकुल्कु नल्पै वर्सानदाका केडाते तिरियमळ मारता, अस्के बोर लोकुल्क अय्ते पेनदा विरोदमते ताकाना निरनायम कीतुर, ओर अंटोर हासोत्तुर. अस्के पेन मर्रा आ लोकुल्कुन हींतन इत्ता देसेमता दग्गेर्क ओता. मूसाल अदवेरदाका बागेन मातरल आतोर, अदुनहाटीं लोकुल्कुना मुन्ने अर्रालय ओना सहायमताहाटीं पेन यहोसुन पेरता. मूसानसंटोन वरोन पेनदा कबुरतोन ओना लोकुल्कुनगा लोहंतन इंचि पेन मूसांक पोल्लेगुडा हीसि मत्ता.
पजा पेन ओर्क हींतन इत्ता देसेमतुन हूळालय, पेन मूसान उंदि गुट्टाता कोस्सापोर्रो होनालय वेहता. पेन हींतन इत्ता आ देसेमतुन मूसाल हूळळ अय्ते हूळतोर, गानि अव्टे होळियालय पेन ओन्कु अदिकारम हियाहिल्ले. पजा मूसाल हासोत्तोर, ओनाहाटीं इस्राएल लोकुल्कु मुप्पै रोजकुनदाका दुक्कमते मत्तुर. इंदके यहोसु ओरा पूना नेताल आतोर. यहोसु पेनदापोर्रो विस्वासम इरतोर, दाना हरेक पोल्ले परकारम ताकतोर, अदुनहाटीं बेस नेताल आतोर.
निर्गमन अध्याय 16-17; गिनती 10-14; 20; 27; व्यवस्थाविवरण 34 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।