13. इस्राएलतोरतोनि पेनदा करार
यह कहानी सुनें ऑडियो फ़ाइल · 7.1 MB
इस रिकॉर्डिंग के शब्द नीचे Aheri Gondi में दिए गए हैं।
इस्राएल लोकुल्कुन पेन एर्रा समुद्रम दाटिस्ता पजा, अद ओर्कुन केडा हर्रिपीसि सिनाइ इनना गुट्टाहेके ओता. मूसाल बद गुट्टापोर्रो अय्ते पोत्ताना पोदातुन हूळतोरो, अद इदे गुट्टा आंद. आ लोकुल्कु अद गुट्टा हिळु ओरा डेरां निल्हातुर.
पजा मूसल आनि इस्राएल लोकुल्कुन पेन इल्हा इत्ता, “मिमेट बस्केळ्क नना वेहता पोल्लेनपोर्रो ताकाना आनि नना मीतोनि कियाना करारतुन हमेसा पीसि मनागोम. ओक्कला मिमेट नना वेहताप कियानय्ते, मिमेट नाहाटीं इनामते हियाना विलुवाता दनम, पेर्मालोरा राज्येम आनि उंदि पवित्र जातितोर आकिर,” इत्ता.
पेनदाहेंदाल ओरा दग्गेरा वायालय इस्राएल लोकुल्कु मूड रोजकुनदाका सतातुन तयार कीतुर. अस्के पेन सिनाइ गुट्टाता कोस्सा कोड्डिपोर्रो हिळु रेय्ता. अद रेय्तस्के, बूकंपाल्क आतां, जगाजगा मेर्समळ जर्गता, इरगा पोयां पेय्सतां आनि वेल्लेन पेद्दा आवाजते तूरिलाता लेंग केंजावाता. अस्के मूसाल कुद्दु आ गुट्टापोर्रो एक्किसि होत्तोर.
अस्के पेन लोकुल्कुनतोनि उंदि करार कीता. अद इत्ता, “नना मीवा पेन, यहोवान आंदुन. ननाने मीकुन इजिप्तता गुलामगिरिताल पेचाहतन. मिमेट वेरे बदे पेनदुन मोळमटु.”
“बोम्मां कियमटु आनि अवुन मोळ्कमटु, बारित्ते, नना यहोवान, ननाने मीवा पेनदुन आंदुन. तप्पुड तरिकाते मिमेट नावा पोरोलता उपयोग कियमट. नोमकेम रोजुन पवित्र इर्रालय मति मर्गमटु. इत्ते, हारूं रोजकु मिमेट मीवा अन्नि कबाह्क कीम्टु, एडुंगो रोजु आराम कियानद आनि नावा मति कियाना रोजु आंदु.”
“मिमेट मीवा तल्लुर-बाबोना कदर कीम्टु. बोर्कुन हव्कमटु. व्यबिचारम कियमटु, दोंगातनम कियमटु, मीवा पक्का लोतोना मुत्तो आयि, ओना लोन आयि हिलाकोंटे इंका बदे सामान आयि, येतकुनालय आसे पडमटु.”
ई पदि आदेसकुन पेन उंदि बंडापोर्रो रोंड बाजकुने रासि मूसांक हीता. लोकुल्कु पीसि ताकानाहाटीं पेन इंका वेरे वेल्लेन नियमाल्क ओर्क हीता. ओक्कला लोकुल्कु पेन हीता आ नियमाल्कुन बरोबर पीसि ताकानय्ते अद ओर्क आसिर्वाद हीसि, ओर्कु बतले आयाकोंटा कापाळंतन इंचि पेन ओर्कु पोल्ले हीता. गानि ओक्कला ओर नना वेहताप ताकाकोंटे ओर्कु नना सिक्सा हींतन, इंचि वेहता.
इस्राएल लोकुल्कुन उंदि पेद्दा डेरा निल्हाट इंचि पेन वेहता, दान कलियाना डेरा इंतुर. आ डेरातुन बल्हा निल्हाना? अदुनालोप्पो बव वस्तुकुन इर्राना? इल्हा अन्नि पोल्लें पेन ओर्कु बरोबर वेहता. आ डेरातुन रोंड अर्रां कियालय उंदि पेद्दा परदा तयार कियानाहाटींगुडा पेन ओर्क वेहता. पेन आ डेराता पज्जोटा परदाते वासि अगा मनंता. बगाय्ते पेन वासि मनंता, अगा सिराप पेद्दा पेर्माले होना परांतोर.
ओर लोकुल्कुंक आ कलियाना डेराता मुन्ने उंदि गद्दे तयार कियापींता. पेनदा अपमानम कियानोर बोरे आयिर, ओर उंदि जिवरासितुन आ गद्देतगा पीसि वायगोम. अस्के पेर्मल अदुन बलि हीसि आ गद्दे पोर्रो पेनदुक बलि इंचि अदुन बोळ्सानुर. आ जिवरासिता नेत्तुर आ मनकना पापाल्कुन मुच्चंता इंचि पेन वेहता. इल्हा, पेन मर्रा आ पापमतुन हूळो. अस्के आ मनकल पेनदा नदरते “सुद्द” इनमळ जर्गंता. मूसाना दादाल हारूनुन आनि ओना वंसमतोर्कुन पेन दाना पेर्मल आयानाहाटीं पेरकुत्ता.
पेन आ लोकुल्कुंक हीता नियमकुना पालन कियालय ओर ओप्कुत्तुर. ओर सिराप पेनदा लोकुल्के आसि मननाहाटीं आनि दानदे आरादना कियानाहाटीं तयार आतुर.
बच्चुंगो रोजकुनदाका मूसाल सिनाइ गुट्टापोर्रेन मत्तोर. ओर पेनतोनि वळ्कसेके मत्तोर. गानि लोकुल्कु मात्रम मूसाना एदुर हूळसि-हूळसि लंडुंक हेळतुर. अदुनहाटीं ओर हारूननगा बंगारम पीसि वासि उंदि बोम्मा किया वेहतुर. बारित्ते बोम्मा तयार आतास्के ओर्क अंटोर्क पेनदुन होळसि आ बोम्मातुन मोळ्काना मत्ता. इल्हा ओर लोकुल्कु पेनदा विरोदमते पेद्दा पापम कीतुर.
हारून बंगारमतोनि कुर्रा रूपमते उंदि बोम्मा तयार कीतोर. लोकुल्क आ बोम्माकु मोळ्कमळ सुरुव कीतुर. दाना मुन्ने बलिं हियमळ सुरुव कीतुर. ओर पापम कीताहाटीं पेन ओरपोर्रो वेल्लेन होंगुक वाता. पेन ओर्कुन नासडेम कियाना विचारम कीता. गानि मूसाल ओर्कुन हव्कामनि इंचि पेनदुक विनंति कीतोर. पेन ओना विनंतितुन केंजसि ओर्कुन नासडेम कियाहिल्ले.
आकिरते मूसाल सिनाइ गुट्टापोर्रोटाल हिळु रेय्सि वातोर. पेन बव बंडाना पाटिनपोर्रो अय्ते पदि आदेसकु रासता आ बंडाना पाटिन पीकुंचि ओर वातोर. पजा ओर आ बोम्मातुन हूळतोर. हूळसि ओन्कु इरगा होंग वाता. आ होंगुने ओर तत्ता आ पाटिन पय्हाचि तुकडां-तुकडां कीतोर.
पजा आ बोम्मातुन पय्हाचि दुब्बा कीतोर आनि आ दुब्बातुन एते कल्पिसी आ एतुन आ लोकुल्कुंक उहातोर. पेन ओरपोर्रो उंदि गत्तरा लोहता, दानहेंदाल ओराव्टेटाल वेल्लेन लोकुल्क हातुर.
बव पाटिन अय्ते मूसाल पय्हातोरो अवुना जेगाते आ पदि आदेस रासि मत्ता बंडाना पाटिनसोंटवे पाटिं तयार कीतोर. पजा ओर मर्रा गुट्टापोर्रो एकतोर. अगा होंचि पेन ओर्कुन मापि किय्यिकांटी इंचि पेनदुक पारतना कितोर. पेन मूसाना पारतना केंजसि ओर्कुन मापि कीता. पूना पाटिनपोर्रो पदि आदेस रासकुंचि मूसाल गुट्टापोर्रोटाल हिळु रेय्सि वातोर. अस्के सिनाइ गुट्टातगटाल अय्ते पेन हींतन इत्ता देसेमदाका होनालय पेन इस्राएल लोकुल्कुना मुन्ने ताकता.
निर्गमन अध्याय 19-34 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।