18. वेरे कीता राज्येल्क
यह कहानी सुनें ऑडियो फ़ाइल · 4.9 MB
इस रिकॉर्डिंग के शब्द नीचे Aheri Gondi में दिए गए हैं।
दाऊद राजाल नल्पै (40) वर्सनदाका राज्येम कीतोर. पजा ओर हासोत्तस्के ओना मर्रि सुलेमान राज्येम कियालय दल्गतोर. “नना नीहाटीं बतल कियाना इंचि नीवा मनसु मंता,” इंचि पेन सुलेमानुन पूसकीता. अस्के ओर पेन ओनु वेल्लेन बुद्दिमंतुड किय्यि इंचि ओर कोरतोर. सुलेमानुना ई पोल्ले पेनदुन कूस कीता, अदुनहाटीं पेन ओन इद दुनियाते अंटोर्कुंकन्ना एक्को बुद्दिमंतुड कीता. ओर वेल्लेन पोल्लें करियसि वरोर बेस बुद्दिमान राजाल आतोर. पेन ओनकु वेल्लेन दनम हीसि ओन पेद्दा सिरमंत कीता.
येरुसलेमते ओना बाबाल बद गुळि दोहाना बारेमते अय्ते पिलान कीसि मत्तोरो, अद गुळितुन सुलेमान दोहातोर, अन्नि सामानगुडा जमा कीतोर. इंदके लोकुल्क, कलियाना डेरातुन होळसिसि गुळिते पेनदा आरादना कियमळ, पेनदुक मोक्कुल्क हियमळ सुरुव कीतुर. पेन आ गुळिते वासि, दाना लोकुल्कुनतोनि कलियसि मनुंदु.
गानि सुलेमान वेरे देसेमता मुरताह्कुनतोनि सुटिर्कोम कीतोर. ओर दग्गेर-दग्गेरा वेय (1000) मुरताह्कुनतोनि मरमिं आसि पेनदा पोल्लेतुन नेम्हातोर. आ मुरताह्कुनाल वेल्ले मुरताह्क वेरे देसेमताल वातव मत्तां, अव वायनेंके अवुना पेनकुनगुडा पीकुंचि वासि, अवुना पूजेंगुडा कीसेक मत्तां. सुलेमान मातरल आतस्के ओरगुडा आ पेनकुने मोळ्कालय दल्गतोर.
अदुनाहाटीं पेन सुलेमानुनपोर्रो इरगा होंग आता. इस्राएल देसेमतुन रोंडु राज्येल्कुने वेरे-वेरे कीसि ओनकु सिक्सा हियाना इंचि पेन इत्ता. अद सुलेमान हासोत्तस्के अल्हा किय्यार.
सुलेमान हासोत्तस्के ओना जेगाते रहोबाम राजाल आतोर. इस्राएल देसेमता अंटोर लोकुल्कु रहोबामुन ओरा राजाल इंचि ओप्कुननाहाटीं उंदासि जमा आतुर. सुलेमान ओराहेंदाल इरगा कस्टमाता कबाह्क किया वेहतोर आनि ओराहेंदाल वेल्लेन कर वसूल कीतोर इंचि इस्राएल लोकुल्कु रहोबामुनगा वेहतुर. रहोबाम ओराहेंदाल तक्को कबळ किया वेहिर इंचि इस्राएल लोकुल्कु रहोबामुंकु विनंति कीतुर.
गानि रहोबाम मुर्कल हियानसोंटा जवाब ओर्कु हीतोर, “नावा बाबाल सुलेमान मीकुन इरगा कस्टम किया वेहतोर इंचि मिमेट वेहचंतिर, गानि ओर किया वेहतादानकन्ना एक्को कस्टम मीकुन नना किया वेहंतन, ओनकन्ना एक्को मीकुन नना परेसान कींतन,” इत्तोर.
ओर इल्हा इनानद केंजतस्के, आ लोकुल्कुनाल वेल्लेटुर लोकुल्कु ओना विरोदमते तिरियतुर. पदि गोत्राल्कुनोर ओन होळसीतुर, ओनतोनि सिराप रोंडे गोत्राल्कुनोर मत्तुर. आ रोंडु गोत्राल्कुनोर ओरद ओर मोमोट यहुदा राज्येमतोरम इंचि वेहकुत्तुर.
मय्ता पदि गोत्राल्कुनोर यारोबाम इनना वरोर मनकन ओरा राजाल कीतुर. ई गोत्राल्कुनोर देसेमता पोळ्द पेय्सना बाजू आनि उत्तेरा बाजुनेके मत्तुर. ओर सतातुन इस्राएल राज्येमतोरम इंचि वेहकुत्तुर.
गानि यारोबाम मात्रम पेनदा विरोदमते तेदतोर, तेदसि लोकुल्कुनाहेंदाल पापि कबाह्क किया वेहतोर. लोकुल्कुन मोळ्का वेहालय ओर रोंडु बोम्मां किया वेहतोर. अस्के ओर लोकुल्कु पेनदा आरादना कियालय यहुदा राज्येमता येरुसलेमते मनना पेनदा गुळिते होना हिल्लुर.
यहुदा आनि इस्राएल राज्येल्क वरोंक-वरोर पगातोर आतुर. अस्के-अस्के ओर्क ओर्के लडाइंगुडा आयुंदु.
इस्राएलता पूना राज्येमते मनना अंटोर राजालोर बदमास मत्तुर. ओराव्टेटाल बचटूरो ओरा जेगाते राजाल आयालय कोरसि वेरे इस्राएल लोकुल्कुनाहेंदाल हासोत्तुर.
इस्राएल राज्येमता अंटोर राजालोर आनि वेल्लेन मंदि लोकुल्कु बोम्मांके मोळ्कुंदुर. ओर बच्चुंगो मल्कां बोगमोताह्कुनतोनि मीळुंदुर, अचोने आयाका बोम्माना मुन्ने पिलाल्कुना बलिंगुडा हिय्युंदुर.
यहुदा राज्येमता राजालोर दाऊदना वंसमताल मत्तुर. ओराव्टेटाल इच्चुर राजालोर इमानदार मत्तुर, ओर बेस न्यायमते राज्येम कीतुर आनि पेनदा आरादनागुडा कीतुर. गानि वेल्लेटूर राजालोर बदमास मत्तुर. ओर बदमास कबाह्क कीसेके राज्येम किय्युंदुर, बोम्मांकु मोळ्कुंदुर. अचोने आयाका ओराव्टेटाल बचटूरो राजालोर अय्ते आबद्दम पेनकुना मुन्ने ओरा पिलाल्कुनगुडा बलि हीतुर. यहुदा राज्येमता वेल्लेटूर लोकुल्कगुडा पेनदा विरोदमते तेदतुर आनि वेरे-वेरे पेनकुन मोळ्कतुर.
1 राजा अध्याय 1-6; 11-12 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।