19. पेनदा कबुरतोर
यह कहानी सुनें ऑडियो फ़ाइल · 8.7 MB
इस रिकॉर्डिंग के शब्द नीचे Aheri Gondi में दिए गए हैं।
पेन हमेसा इस्राएल लोकुल्कुनगा दाना कबुरतोर्कुन लोहुंदु. पेनदा कबुरतोर पेनदा कबुह्कुन केंजुंदुर आनि वासि लोकुल्कुंक वेहुंदुर.
अहाब इनना राजाल इस्राएल राज्येमपोर्रो राज्येम कियनेंकेटा कालमते अगा एलियाह पोरोलतोर वरोर पेनदा कबुरतोर मत्तोर. अहाब बदमास मनकल मत्तोर. बाल इनना उंदि आबद्दम पेनदुन मोळ्काहाटीं ओर लोकुल्कुन जबरदस्ति कीसि मत्तोर. अदुनहाटीं पेन आ लोकुल्कुन सिक्सा कियाना मंता इंचि एलियाह इनना पेनदा कबुरतोर अहाबुंक वेहतोर. इंका एलियाहल, “मर्रा पिर्रु वायिकांटी इंचि नना बदवेरदाका अय्ते वेहोनो अदवेरदाका इस्राएल राज्येमते पिर्रु वायो, मच्चुगुडा अर्रो,” इंचि इत्तोर. ई पोल्लेहेंदाल अहाब इरगा होंगुंक वातोर. होंगुंक वासि ओर एलियाहन हव्काना निरनायम कीतोर.
अदुनहाटीं पेन एलियाहन, “अहाबुंक दोर्काकोंटा केडाते होंचि मक्का,” इंचि वेहता. पेन एलियाहंक केडाते बद ऊटातगा होन इंचि अय्ते वेहतानो, ओर अदे ऊटातगा होत्तोर. रोज हक्केरा, पोळ्द होंचि पिट्टें एलियाहनाहाटीं हारिं आनि हव्विं पीसि वायुंदुं. इद वेलाते नर्का-पल्हिं अहाब आनि ओना सिपाइल्क एलियाहन पह्कसेके मनुंदुर, गानि ओर एलियाहन दोर्का पिया पर्राहिल्लुर.
पिर्रु वायुवाहेंका कोन्नि रोजकु आतस्के आ ऊटा इनकिसि होत्ता. अदुनहाटीं एलियाहल दग्गेटा उंदि देसेमते होत्तोर. अद देसेमते उंदि मुंडामोस्ता गरीब मुरतळ मत्ता, दानकु वरोर मर्रि मत्तोर. बेस पंटा पेय्सुवाहेंका दानगा मत्ता तिंडिगुडा दग्गेर-दग्गेरा मारसे मत्ता. अयिनागानि आ मुरतळ एलियाह्न बेस हूळकुत्ता, अदुनहाटीं पेन आ मुरतळ आनि दाना मर्रिना अन्नि अवसराल्कुन पुरागा कीता, दाना पिंडिता डब्बा आनि नियदा कीसा बस्केन रिकम आयाहिल्ले. कर्वु अरसि मत्ता अन्नि रोजकुनेगुडा दानगा पिरनिंडा तिंडि मत्ता. एलियाहल कोन्नि वर्सनदाका अगा मत्तोर.
मूडुननर्रा वर्साना पज्जो, मर्रा पिर्रु वायागोटंतन इंचि पेन एलियाहनतोनि वेहता. मर्रा इस्राएल देसेम मल्सि होंचि अहाबुनतोनि वळ्का इंचि पेन एलियाहंक वेहता. अदुनहाटीं एलियाहल अहाबुनगा होत्तोर. अहाब एलियाहन हूळतस्के, “ओहो, तिप्पल्क पुटिच्चानोन निमेन गदा!” इंचि इत्तोर. अस्के एलियाहल, “तिप्पल्क पुटिच्चानोन निमे आंदिन, सत्तेम पेन यहोवा पेने आंद, दान होळसिसि निमे बाल इनना पेनदुन मोळ्संतिन. इंदके निमे इस्राएल राज्येमते मनना अंटोर लोकुल्कुन पीसि कार्मेल गुट्टापोर्रो होनापींता.” इंचि इत्तोर.
अय्ते अंटोर लोकुल्कु कार्मेल गुट्टापोर्रो होत्तुर. बाल इनना पेनदा कबुह्कुन मोमोट वेहांतोम इंचि वेहकुनना मांडसागुडा अगा वातुर. ओर बाल पेनदा कबुरतोर आंदुर. ओर अंटोर नालुं नुह्कुना एबै (450) मंदि मत्तुर. अस्के एलियाहल लोकुल्कुन, “इंका बदवेरदाका मिमेट मनसु तिरहाचि मनांतिर? ओक्कला यहोवाले पेन आते दाना आरादना कीम्टु, हिलाकोंटे ओक्कला बाल पेन आते दानके मोळ्काटु,” इंचि इत्तोर.
पजा एलियाहल बाल पेनदा कबुरतोर्कुन इल्हा इत्तोर, “उंदि कोंदातुन बलि हीसि दाना हव्विन मोक्कुहाटीं उंदि गद्देपोर्रो इर्राट, गानि तळमिते वाटमट. ननागुडा अल्हे कींतन, नना वेरे उंदि गद्देपोर्रो आ हव्विन इर्रांतन. अस्के आ गद्देपोर्रो ओक्कला पेन तळमि अराहनय्ते अद सत्तेम पेन इंचि मीकु तेळियार,” इत्तोर. अस्के आ बाल पेनदा कबुरतोर उंदि मोक्कु तयार कीतुर गानि तळमि अंटाबेट्टा हिल्लुर.
पजा ओर, “ए बाल पेनदुना, निमे मावा पोल्ले केंजा,” इंचि उंदि रोजमेड ओरा बाल पेनदुक पारतना कीतुर, मोत्कुत्तुर, अचोने आयाका ओरद ओरे कसेरतोनि कोयकुत्तुर. गानि ओरा बाल पेन मात्रम ओर्कु बतले जवाब हिया हिल्ले, तळमिगुडा अरहा हिल्ले.
बाल पेनदा कबुरतोर दग्गेर-दग्गेरा उंदि पूरा रोजमेड पारतना कीतुर. पजा ओर पारतना कियमळ आपतुर. अस्के, एलियाहल वेरे कोंदाता हव्विन पेनदा गद्देपोर्रो इरतोर. पजा आ मोक्कुनपोर्रो पेद्दा पेरपुकुने एर निह्चि आ गद्देपोर्रोटा हव्विं, कट्टें आनि गद्दे दग्गेटा बूमि पुरागा नांदनदाका एर वळियसेकेन मंटु इंचि लोकुल्कुंक वेहतोर.
अस्के एलियाहल इल्हा पारतना कीतोर, “ए यहोवा पेनदुना, अब्राहाम, इसाक, याकोबुना पेनदुना, नना नीवा दासुन आंदुन, निमे इस्राएलतोरा पेनदुन आंदिन इंचि निमे माकु हुपिच्चा. निमेने सत्तेम पेनदुन आंदिन इंचि ई लोकुल्कुंक तेळियानाहाटीं निमे नाकु जवाब हीम,” इत्तोर.
अल्हा इत्ता इनुडे मब्बुनाल तळमि अरता, अरसि हव्विन, कट्टेन, बंडान, तोळितुन आनि गद्देता दग्गेरा पकापीसि मत्ता एतुनगुडा बोळ्सि पोहता. अल्हा आतदुन लोकुल्कु हूळसि बूमिपोर्रो हिळ अरतुर, अरसि, “यहोवाले पेन आंद, यहोवाले पेन आंद,” इंचि इत्तुर.
अस्के एलियाहल, “बाल पेनदा वरोरगुडा कबुरतोर पिस्सि होनामन्नि,” इंचि इत्तोर. अदुनहाटीं लोकुल्क बाल पेनदा कबुरतोर्कुन दोर्का पीतुर आनि अगाटाल पकाक ओसि ओर्कुन हव्किसि पोहतुर.
अस्के एलियाहल, “निमे बिराना नीवा लोन होन, जेरासेप अय्ते पिर्रु वायनद मंता,” इंचि अहाब राजांक वेहतोर. बिरानेन इरगा मब्बु आसि, इरगा पिर्रु वायालय दल्गता. पदन हिलाकोंटा मत्तदुन पेन पदन कीसि समस्यातुन महता.
एलियाहल ओना कबळतुन महातस्के, एलिसा इनना वरोर मनकन पेन दानाहाटीं कबुरतोर आयानाहाटीं पेरता. एलिसानाहेंदाल पेन बच्चुंगो अद्बूताल्क कीता. उंदि अद्बूतम नामान इनानोना पिस्वरते जर्गता. ओर वरोर पगातोना सेनाते अदिकारि मत्तोर, गानि ओना मेंदुल्कु उंदि कराब बिमारि आसि मत्ता. ओर नामानुना पोरोल केंजसि मत्तोर, अदुनहाटीं ओर एलिसानागा वासि, ओन बेस कियानाहाटीं बतिमलाडतोर. अस्के एलिसाल ओन्कु योर्दन बेरेटे होंचि एडुं मल्का मुळगिसि तेदा इंचि वेहतोर.
नामानुंक इरगा होंग वाता. अल्हा कियमळ इत्ते पिसातनम आंद इंचि ओन्क अन्पिस्ता, अदुनहाटीं ओर अल्हा किय्योन इत्तोर. गानि पजा ओर मनसु मार्सकुंचि, योर्दन बेरेटा एते होंचि एडुं मल्कां मुळगिसि तेलतोर. ओर आकिर मल्काते मुळगिसि तेदतस्के पेन ओन बेस कीता.
पेन बचटूरो कबुरतोर्कुन इस्राएल लोकुल्कुनगा लोहता. ओर अंटोरगुडा लोकुल्कुन बोम्मांक मोळ्कमळ बंद कीम्टु इंचि वेहतुर. वरोनतोनि वरोर बेस न्यायमते कलियसि मंटु, वरोंक-वरोर दया कींकुटु, इंचि ओर वेहतुर. अचोने आयाका आ कबुरतोर, “मिमेट तप्पुड कबाह्क कियमळ होळसिसि पेनदा पोल्लेन परकारम ताकागोम. अल्हा कियाकोंटे पेन मीवा न्यायम कीसि मीकुन दोसिर्क कीसि मीकु सिक्सा हींता,” इंचि लोकुल्कुंक वेर्रे वेहतुर.
वेल्लेन मल्कां आ लोकुल्कु पेनदा आदेसकु मत्ताप ताकाकोंदुर. ओर पेनदा कबुरतोर्कुन वेल्लेन तकलिपगुडा कीतुर आनि बच्चुंगो मल्कां अय्ते ओर्कुन हव्कुतुरगुडा. उंदि मल्का अय्ते ओर लोकुल्कु यिर्मयाह इनना कबुरतोन एर हिलुवा कुहिते वाटसि, ओन अग्गेन हायालय होळसीतुर. कुहिता अळगुने मत्ता बुर्दाते ओर दिगाबळसोत्तोर. गानि राजांकु ओनपोर्रो दया वाताहाटीं, ओर हायाका मुन्नेन ओन कुहिताल पलाते तेंडालय राजाल ओना सिपाइल्कुंक आदेस हीतोर.
लोकुल्कु पेनदा कबुरतोर्कुन हय्साकोन्ना गानि ओर मात्रम पेनदा पोल्लें वेहचेकेन मत्तुर. “मिमेट ओक्कला मनसु मार्सकुनाकोंटे पेन मीकुन नासडेम कींता,” इल्हा ओर लोकुल्कुंक वेर्रे वेहुंदुर. पेन ओर्कुन पिसागोटनाहाटीं ओरगा वरोर पिसागोटनोन लोहंता इंचि पेन हीता पोल्लेतुनगुडा ओर लोकुल्कुंक मति कीसि वेहुंदुर.
1 राजा अध्याय 16-18; 2 राजा 5; यिर्मयाह 38 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।