20. गुलामगिरिते अरमळ आनि पेय्समळ
यह कहानी सुनें ऑडियो फ़ाइल · 6.1 MB
इस रिकॉर्डिंग के शब्द नीचे Aheri Gondi में दिए गए हैं।
इस्राएल राज्येमतोर आनि यहुदा राज्येमतोर इव्वुरगुडा पेनदा विरोदमते पापम कीतुर. सिनाइ गुट्टापोर्रो पेन ओरतोनि कीता करारतुन ओर नेम्हातुर. कीता पापाल्कुनाल मनसु मार्सकुननाहाटीं आनि मर्रा पेनदा आरादना कियानाहाटीं ओर्कु वेर्रे वेहालय पेन दाना कबुरतोर्कुन ओरगा लोहता, गानि ओर मात्रम कबुरतोर वेहता पेनदा पोल्लेन परकारम ताकालय ओप्कुना हिल्लुर.
इल्हा पेन ओर्कुन नासडेम कियालय ओरा पगातोर्कुन गट्टिगा कीसि ओर्कु सिक्सा हीता. अस्सुर इनना उंदि देसेम मत्ता, अद वेल्लेन ताकतवार आसि मत्ता. वेरे देसेल्कुनपोर्रो आ देसेमतोर असले दया हुप्साकोंदुर. ओर वासि इस्राएल राज्येमतुन नासडेम कीतुर. अस्सुर लोकुल्कु वासि इस्राएल राज्येमतोर्कुन वेल्लेन मंदितुन हव्कतुर, ओरा मनसुंक वातवुन दोसकुत्तुर, देसेमता कोन्नि एरियान बोळ्सतुर.
अस्सुर लोकुल्कु इस्राएलता अंटोर नेतालोर्कुन, सिरमंत लोकुल्कुन आनि वेल्लेन दरातां आनि विलुवाता वस्तुक कियाना लोकुल्कुन उंदगा जमा कीसि ओरा अस्सुर देसेमते पीसि ओतुर. इस्राएलते सिराप इच्चुर गरीब लोकुल्के मिगिल्सि मत्तुर.
अस्सुर लोकुल्कु मर्रा अद देसेमते मनालय वेरे देसेमतोर्कुन पीसि वातुर. आ वेरे देसेमता लोकुल्कु कूलसोत्ता सहरकुन मर्रा निल्हातुर. अगा मिगिल्सि मत्ता इस्राएलतोरतोनि आ लोकुल्कु मरमिं आतुर. आ लोकुल्कुन सामरि लोकुल्कु इंचि इत्तुर.
इस्राएल लोकुल्कु पेनपोर्रो विस्वासम कियाकोंटा, अद वेहता पोल्ले परकारम ताकवाहेंका इस्राएल राज्येमता लोकुल्कुंक पेन बल्हा सिक्सा हीता अदुन यहुदा राज्येमता लोकुल्कु हूळतुर. अल्हा हूळसिगुडा ओर लोकुल्कु कनानि लोकुल्कुना पेनकुना बोम्मांकु मोळ्कतुर. ओर्कु वेर्रे वेहालय पेन दाना कबुरतोर्कुन लोहता, गानि ओर केंजालय ओप्कुना हिल्लुर.
दग्गेर-दग्गेरा नूर (100) वर्सां आतस्के अस्सुर लोकुल्कु इस्राएल राज्येमतुन नासडेम कीतुर. बेबिलोनता राजाल नबुकदनेस्सर इनानोन पेन यहुदा राज्येमपोर्रो लडाइ कियालय लोहता. बेबिलोन उंदि पेद्दा ताकतवार देसेम मत्ता. नबुकदनेस्सर राजाना गुलाम आयालय आनि एडादि-एडादिक ओन्कु वेल्लेन दनम हियालय यहुदाता राजाल ओप्कुत्तोर.
गानि कोन्नि वर्सां आतस्के, यहुदाता राजाल बेबिलोनता राजाना विरोदमते तिरियतोर. अस्के बेबिलोनता लोकुल्कु वासि यहुदा राज्येमपोर्रो लडाइ कीतुर. ओर यरुसलेम सहरपोर्रो कब्जा कीतुर. गुळितुन नासडेम कीतुर, सहरता आनि गुळिता कजानातुन दोसकुत्तुर.
यहुदाता राजाल विरोदमते तिरियताहाटीं ओन्कु सिक्सा हियालय नबुकदनेस्सर राजाना सिपाइल्क यहुदाता राजाना मर्रिन ओना मुन्नेन हव्कतुर आनि ओन बारे गुड्डोड कीतुर. पजा आ राजान बेबिलोनता जेलने वाटसि ओर अग्गेन हायगोम इंचि ओन पीसि ओतुर.
नबुकदनेस्सर आनि ओना सिपाइल्क यहुदा राज्येमता अंटोर लोकुल्कुन बेबिलोनते ओतुर, गानि नेलि कियानाहाटीं बोर अय्ते इरगा गरीब मत्तुरो, सिराप ओर्कुने अगा होळ्सतुर. इद कालमतुन गुलामगिरिता कालम इत्तुर. इद कालमते पेनदा लोकुल्कुन ओर्कु हींतन इत्ता देसेमताल पेय्सि होनालय ओर्कुन परेसान कियमळ जर्गता.
पेन दाना लोकुल्कु पापम कीताहाटीं ओर्कु सिक्सा कियानाहाटीं ओर्कुन गुलामगिरिते लोहता. अयना अद ओर्कु हीता दाना पोल्लेन मात्रम मति मर्गाहिल्ले. पेन दाना लोकुल्कुनपोर्रो नदर वाटसि ओर्कुन कापाळसेकेन मत्ता. दाना कबुरतोर्कुन ओरगा लोहचेके ओरतोनि वळ्सेके मनुंदु. डेब्बै वर्सां आतस्के, अद मर्रा ओर्कुन अद हींतन इत्ता देसेमते ओंतन इंचि मर्रा पोल्ले हीता.
दग्गेर-दग्गेरा डेब्बै वर्सां आतस्के, पारस देसेमता कुस्रु इनना राजाल बेबिलोन देसेमतुन ओळागोटतोर. अदुनहेंदाल बेबिलोन देसेमता राजांकन्ना पारस देसेमता राजाले वेल्ले देसेल्कुनपोर्रो राज्येम कीतोर. इस्राएल देसेमता लोकुल्कु इंदके यहुदि लोकुल्कु आतुर. ओराव्टेटाल वेल्ले मंदि लोकुल्कु ओरा पूरा पिस्वर बेबिलोनतेन पिस्तुर. सिराप इच्चुरे मातिर यहुदिल्कुंक यहुदा देसेमता मति मत्ता.
पारस देसेमता लोकुल्कु वेल्लेन ताकतवार मत्तुर, गानि ओर गेल्सकुंचि तत्ता लोकुल्कुनपोर्रो ओर दया कीतुर. कुस्रु इनानोर पारस देसेमता राजाल आता कोन्नि रोजकुंक, आ राजाल, बोरे यहुदि आयिर ओर ओक्कला पारस देसेम होळसि मर्रा यहुदा देसेमते दांतन इनकुननाय्ते ओर होना पर्रांतोर, इंचि हुकुम पेच्हातोर. अचोने आयाका मर्रा गुळि दोहानाहाटीं आ राजाल ओर्कु कोत्तांगुडा हीतोर. इल्हा गुलामगिरिता डेब्बै वर्सां पुरागा आतस्के, यहुदिल्कुना उंदि सिन्ना गुंपु यहुदा देसेमता येरुसलेम सहरते वापस होत्तुर.
ओर येरुसलेम एवतस्के, अगाटा गुळि आनि सहरता सुट्टु मत्ता गूरेतुन मर्रा दोहतुर. पारस देसेमता लोकुल्कु अदवेरदाकागुडा ओरपोर्रो राज्येम कीसेकेन मत्तुर, गानि यहुदिल्क मात्रम मरुंदि मल्का ओर्कु पेन हींतन इत्ता देसेमते मंचेके अगाटा गुळिते आरादना कीसेके मनुंदुर.
2 राजा अध्याय 17; 24-25; 2 इतिहास 36; एज़्रा 1-10; नहेम्याह 1-13 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।