21. किरिस्तुन हींतन इंचि पेन पोल्ले हींता
यह कहानी सुनें ऑडियो फ़ाइल · 7.4 MB
इस रिकॉर्डिंग के शब्द नीचे Aheri Gondi में दिए गए हैं।
पेन बस्के अय्ते ई दुनियातुन कीता, अस्के दानकु तेळियसे मत्ता, बस्के अयना बस्के इद दुनियाते किरिस्तुन लोहापींता इंचि. इतद कींतन इंचि पेन आदम आनि हव्वांक पोल्ले हीसि मत्ता. हव्वानाहेंदाल उंदि वंसम पुट्टंता, ओर तरासुना तल्लातुन पिच्चि-पिच्चि कींतोर. हव्वांकु दोका कीता तरास देय्यम आंद, इव्टे बतलेनमानम हिल्ले. पेन वेहता पोल्लेना अर्तम बतल इत्ते किरिस्तु देय्यमतुन पुरागा ओळिचंतोर.
अब्राहामुनाहेंदाल दुनियाता अन्नि जातिनोर्कु आसिर्वाद दोर्कार इंचि पेन ओनकु पोल्ले हीसि मत्ता. अवसरमाता वेलाते पेन किरिस्तुन लोहचि अद हीता पोल्लेतुन पुरागा कींता. आ किरिस्तु दुनियाता अंटोर लोकुल्कुन ओरा पापमताल पिसागोटंतोर.
वायाना रोजकुने मूसानसंटोन वरोन वेरे कबुरतोन लोहंतन इंचि पेन मूसांकु पोल्ले हीसि मत्ता. आ कबुरतोर इत्तेने किरिस्तु आंदुर. इल्हा पेन मरुंदि मल्का किरिस्तुन लोहंतन इंचि पोल्ले हीता.
दाऊद राजाना वंसमताल वरोर किरिस्तु वायानुर इंचि पेन ओनकु पोल्ले हीसि मत्ता. आ किरिस्तु राजाल आसि पेनदा लोकुल्कुन पोर्रो बस्केळ्ताहाटीं राज्येम कियानुर.
यिर्मयाह इनना कबुरतोनतोनि पेन वळ्किसि, उंदि रोजु उंदि पूना करार कींतन इंचि ओनकु वेहचि मत्ता. आ पूना करार इस्राएल देसेमता सिनाइ गुट्टापोर्रो जर्गता पडाना करारलेसीं मन्नो. पेन बस्के अय्ते दाना लोकुल्कुनतोनि पूना करार किय्यार अस्के अद कुद्दु दाना लोकुल्कुंक दिस्सार. हरेक मनकल दान पावरम कियानुर आनि दाना नियमाल्कुना परकारम ताकालय तयार आयानुर. दाना नियमाल्कु दाना लोकुल्कुना गुंडे पोर्रो रासताप मनानुं इंचि पेन वेहचि मत्ता. ओर लोकुल्कु दानोर्क आयानुर आनि पेन ओरा पापाल्कुन मापि किय्यार. ओरतोनि आ करार कियानोर इत्ते किरिस्तु आंदुर.
वायाना किरिस्तुगुडा पेनदा कबुरतोरे मनांतोर इंचि पेनदा कबुरतोरगुडा वेहचि मत्तुर. वरोर पेनदा कुबरतोर बतल कींतोर इत्ते, ओर पेनदा पोल्लेन मुन्ने केंजांतोर, केंजसि आ पोल्लेन लोकुल्कुंक वेहांतोर. पेन लोहना कबुरतोर ओर वरोर अन्निटते पुरागा आसि मत्ता कबुरतोर मनांतोर. इत्ते आ किरिस्तु पेनदा पोल्लेन बेस केंजसि अवुन लोकुल्कुंक बेस तेळियानाल तेल्पिच्चि वेहानुर.
इस्राएलता पेर्मालोर लोकुल्कुनाहाटीं पेनदा मुन्ने मोक्कुल्कु हीसेकेन मत्तुर. आ मोक्कुल्कु लोकुल्कुना पापाल्कुनाहाटीं ओर्कु सिक्सा हियाना जेगाते ओर हीसेके मत्तुर. लोकुल्कुनाहाटीं पेर्मालोर पारतनागुडा कीतुर. गानि आ किरिस्तु अन्निटते पुरागा आसि मत्ता पेद्दा पेर्मल आसि पेनदुक मोक्कु आयानालायक मनना बलिलेसीं ओर पेनदाहाटीं ओनद ओरे मोक्कु आयानुर. इत्ते ओर बस्केने पापम किय्योर. आनि ओर बस्के अय्ते ओनद ओर मोक्कु आयानुर, अस्के दुनियाता बदे बलिता अवसरम मन्नो.
लोकुल्कुना मंदानपोर्रो राजाल आनि पेद्दा मनकालोर राज्येम कींतुर, ओरगुडा बस्के-बस्केनो तप्पुल्क कींतुर. दाऊद राजाल अय्ते सिराप इस्राएल लोकुल्कुना पोर्रो राज्येम कीतोर, गानि दाऊद राजाना वंसमते पुट्टाना किरिस्तु मात्रम पूरा दुनियापोर्रो राज्येम कियानुर. अचोने आयका ओर बस्केळ्क न्यायमतेन राज्येम कींतोर, बस्केळ्क बेसता निरनायाल्क येतंतोर.
पेनदा कबुरतोर किरिस्तुना बारेमते वेल्लेन पोल्लें वेहतुर. उदाहरनते, मलाकि, “किरिस्तु वायाका मुन्ने वरोर वेरे कबुरतोर वायानुर. ओना वायमळकु वेल्लेन महत्त्व मनंता,” इंचि वेहतोर. इच्चोने आयाका, यसायाह इनना कबुरतोर, “उंदि मरमिं आयवा लेय्यडकु किरिस्तु पुट्टंतोर,” इंचि रासतोर. मीका इनना कबुरतोर, “किरिस्तु बेतलहेम इनना सहरते पुट्टंतोर,” इंचि वेहतोर.
यसायाह इनना कबुरतोर, “किरिस्तु गालिल एरियाते मनांतोर, इरगा दुक्कमते मनना लोकुल्कुंक ओर सांति हींतोर. जेलने बंद कीसि मत्तोर्कुन ओर होळसंतोर. बिमार मत्तोर्कुन, सेव्टोर्कुन, गुड्डोर्कुन, मूकालोर्कुन अल्हेने कुंटोर्कुन ओर बेस कियानुर,” इंचि वेहतोर.
अचोने आयका, “लोकुल्कु किरिस्तुन हय्सुर, ओन ओप्कुन्नुर,” इंचिगुडा यसायाह इनना कबुरतोर वेहतोर. इंका वेरे कबुरतोर, “किरिस्तुना वरोर दंटातोर ओना विरोदमते तेदानुर,” इंचि वेहतोर. जकर्याह इनना कबुरतोर, “किरिस्तुना विरोदमते तेदाना ओना दंटातोर, ओनकु दोका कियालय वेरेतोरागटाल मुप्पै एंडि कलदार्क येतंतोर,” इंचि वेहतोर. इंका इच्चुर कबुरतोर अय्ते, “लोकुल्कु किरिस्तुन हव्किसि ओना कपडिन सिट्टिं वाटसि पंचकुंतुर,” इंचि वेहतुर.
अचोने आयका, किरिस्तुंक हामुर बल्हा वांता? इदगुडा पेनदा कबुरतोर वेहतुर. किरिस्तु बतले तप्पु कियाकोन्ना गानि, लोकुल्कु किरिस्तुन पोर्रो उस्कानुर, ओन कारेडाल्क कियानुर, ओन तनानुर, ओन कोह्कानुर. ओन इरगा तकलिप्क वासि ओर जीवा होळ्सानुर, इंचि वेहातुर.
किरिस्तु बस्केन पापम किय्योर, ओर अन्निटते पुरागा आसि मनांतोर. गानि लोकुल्कुना पापाल्कुनाहाटीं पेन ओनकु सिक्सा हींता, ओना हामुरताहेंदाल लोकुल्कु पेनतोनि कलियानालायक आंतुर, इदुनाहाटींगे किरिस्तु हायागोम इंचि पेनदा इच्चा मंता. इल्हागुडा पेनदा कबुरतोर वेहतुर.
इंका पेन किरिस्तुन हातोराव्टेटाल मर्रा जीवाते तेहंता. दीनहेंदाल पेन पूना करार कियानाहाटीं उंदि पिलान कीता इंचि तेळियंता. इल्हा बोर अय्ते दाना विरोदमते पापम कीतुर ओर्कुन अद पिसागोटंता.
किरिस्तुना बारेमते पेन दाना कबुरतोर्कु वेल्लेन पोल्लेन हुपिस्ता, गानि किरिस्तु मात्रम आ कबुरतोर्कु पिस्सि मत्तास्के वायाहिल्लोर. ई कबुरतोर वेहता पोल्लेना नालूं नुह्कुना (400) वर्साना पज्जो पेन निरनायम कीता वेलाक अद किरिस्तुन इद दुनियाते लोहंता.
उत्पत्ति 3:15; 12:1-3; व्यवस्थाविवरण 18:15; 2 शमूएल 7; यिर्मयाह 31; यशायाह 59:16; दानिय्येल 7; मलाकी 4:5; यशायाह 7:14; मीका 5:2; यशायाह 9:1-7; 35:3-5; 61; 53; भजन संहिता 22:18; 35:19; 69:4; 41:9; जकर्याह 11:12-13; यशायाह 50:6; भजन संहिता 16:10-11 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।