23. येसुना पुटमळ
यह कहानी सुनें ऑडियो फ़ाइल · 4.4 MB
इस रिकॉर्डिंग के शब्द नीचे Aheri Gondi में दिए गए हैं।
योसेप इनना वरोर नीतिमंतुनतोनि मरियमुना एर्राबोट्टु आसि मत्ता. मरियम नेला तप्सि मंता इंचि ओन्कु तेळियता, पीटे मनना पिंडेम ओनद आयो इंचि ओन्कु एर्के मत्ता. गानि ओर मरियमुन बदनाम कियालय हूळा हिल्लोर. दानपोर्रो दया हुपिच्चि बोर्के तेळियाकोंटा दानकु सोडसिट्टि हिय्याना विचारमते मत्तोर. ओर अल्हा कियाका मुन्नेन पेनदा उंदि दूता ओना कलाते वासि ओनतोनि वळ्कता.
आ दूता इल्हा इत्ता, “ए योसेप, मरियमुन नीवा मुत्तो इंचि तरकुनालय निमे वेरियमा. दाना पीटे मनना पेडल पवित्र आत्माताहेंदाल वातोर आंद. अद वरोर मर्रिन कनंता, निमे ओना पोरोल येसु इंचि इर्रा. (ई पोरोलकु अर्तम, यहोवा पेन पिसागोटंता), बारित्ते ओर, लोकुल्कुन ओरा पापाल्कुनाल पिसागोटंतोर,” इत्ता.
इल्हा योसेप मरियमुनतोनि मरमिं आसि दान ओनगा पीसि वातोर, गानि अद मर्रिन कननदाका ओर दानतोनि मींडा हिल्लोर.
मरियमुना एरपूराना रोजकु दग्गेर एव्तस्के, मरियम आनि योसेप वेल्लेन लक्कु मनना बेतलहेम सहर होत्तुर. ओर्क अगा होनानदे मत्ता, बारित्ते इस्राएल देसेमते मनना अंटोर लोकुल्कुना लेक्का रोम सरकारुंक कियाना मत्ता. अदुनहाटीं आ लोकुल्कुना पेद्दाल्क बगा मत्तुरो अग्गेन ओर्कुन होनालय रोम सरकार वेहता. दाऊद राजाल बेतलहेम सहरतेन पुटतोर, अग्गेन मरियम आनि योसेपुना पेद्दाल्क मत्तुर.
मरियम आनि योसेप बेतलहेम अय्ते होत्तुर, गानि ओर्कु अगा मनालय गोळ्कुना कोळका तप्पा इंका वेरे बदे जेगा दोर्काहिल्ले. मरियम आ कोळकातेन पेडन कंता. अगा आ पेडन मींडिच्चालय वेरे जेगा हिलुवाहेंका अद आ पेडन कोंदां मेयाना जेगाते इरता. ओर आ पेडन पोरोल येसु इंचि इरतुर.
अद नर्का दग्गेटा नेलिने इच्चुर गोर्रें मेहानोर ओरा गोर्रेना कावेल कीसेके मत्तुर. अचानक पेनदा उंदि दूता ओरगा जग्गरा आसि ओर्कु दिसता, ओर इरगा वेरियतुर. अस्के आ पेनदा दूता, “वेरियमट, मीकु वेहनाहाटीं नहगा उंदि बेसता कबुर मंता, अद बतल इत्ते, बेतलहेमते किरिस्तु, सामि पुटतोर.
होंचि आ पेडन पहकटु, मीकु ओर उंदि कप्पिड गंडाते हुट्टिसि, कोंदां मेयाना जेगाते मींडसि दोर्कंतोर,” इंचि वेहता. अचानक मब्बु पुरागा पेनदा दूतानतोनि निंडिसि होत्ता. “स्वर्गमते मनना पेनदुके पूरा महिमा दोर्किकांटि, बूमिते मनना बा लोकुल्कुना चिंता पेन कींतानो, आ लोकुल्कुंक सांति दोर्किकांटि,” इल्हा इंचेके आ दूतां पेनदा स्तुति कीसेके मत्तां.
पजा पेनदा दूतां अगाटाल होत्तां. आ गोर्रें मेहानोर ओरा गोर्रेन अग्गेन होळसिसि पेडन पह्कालय होत्तुर. ओर बिरानेन येसु मत्ता जेगाते होत्तुर. अगा होत्तस्के, ओर्कु पेनदा दूता बल्हा अय्ते वेहतानो अल्हेन, येसु कोंदां मेयाना जेगाते मींडसि मत्तद दिसतोर. ओर वेल्लेन कुसिते मत्तुर. पजा ओर ओरा गोर्रें मत्ता जेगाते मल्सि होत्तुर. ओर बतल अय्ते हूळतुर, केंजतुर, अदुन पीसि ओर पेनदा स्तुति कीसेके मत्तुर.
पोळ्द पेय्साना दिक्कुनेके लक्कु उंदि देसेमते इच्चुर मांडसा मत्तुर. ओर वेल्लेन तेल्विगल्लोर्क मत्तुर, सुक्काना बारेमते ओर बेस करियसि मत्तुर. मब्बुने ओर उंदि स्पेसल सुक्कातुन हूळतुर. हूळसि, यहुदिल्कुनाहाटीं वरोर पूना राजाल पुटतोर इंचि, ओर आ सुक्काता अर्तम कीकुत्तुर. अदुनहाटीं ओर आ पेडन हूळाना इन्कुंचि ओरा देसेमताल पय्नेम पेय्साना निरनायम कीतुर. वेल्लेन रोजकु पय्नेम कीसि बेतलहेम इनना सहरते एव्तुर. अगा बगा अय्ते येसु आनि ओना यावल-बाबाल मत्तुर, अद लोतुन ओर दोर्किच्कुत्तुर.
आ मांडसा, येसुन ओना यावानगा हूळतस्के ओर ओरा टोंगरां ऊनसि आ पेडाना आरादना कीतुर. एक्को दराता वस्तुकु ओर येसुंक हीतुर. पजा ओर ओरा लोह्कुने मल्सि होत्तुर.
मत्ती अध्याय 1; लूका 2 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।