48. हीता पोल्ले परकारम वाता किरिस्तु येसे आंदुर
यह कहानी सुनें ऑडियो फ़ाइल · 5.9 MB
इस रिकॉर्डिंग के शब्द नीचे Aheri Gondi में दिए गए हैं।
पेन इद दुनियातुन कीतास्के अन्नि बेसे मत्ता, बतले पापम मनाहिल्ले. आदम, हव्वाल वरोंक-वरोर पावरम कीयुंदुर, इंका पेनदुन पावरम कियुंदुर. बतले बिमारि, हामुर मनाहिल्ले. पेनदा इच्चागुडा अल्हे मत्ता.
हव्वांक दोका हिय्याना उद्देसमते देय्यम तरासुनाहेंदाल तोटाते होळियता. अस्के हव्वाल आनि आदम पेनदा विरोदमते पापम कीतुर. ओर पापम कीताहाटींगे बूमिपोर्रो मनकालोर हासंतुर.
ओर पापम कीताहेंका इंका वेल्लेन तप्पु जर्गता. आदम, हव्वाल पापम कीताहाटीं ओर पेनदा पगातोरगुडा आतुर. ओर पापम कीताहाटींगे, अस्केटाल हरेक मनकल पापम कीसंतोर. हरेक मनकल पुटतस्केटाल पेनदा पगातोर आसि पुट्संतोर. पेन आनि लोकुल्कुना नड्डुम सांति मनाहिल्ले. गानि पेन मात्रम सांति तर्राना आसेते मत्ता.
हव्वाना उंदि वंसमतोर देय्यमता तल्लातुन जारानुर इंचि पेन पोल्ले हीता. आनि देय्यम दाना कादुन कसकार इंचिगुडा पेन वेहता. दीना अर्तम बतल इत्ते, देय्यम किरिस्तुन हव्कंता, गानि पेन ओन मर्रा जीवाते तेहंता. अद आता पजा, किरिस्तु हमेसाताहाटीं देय्यमता ताकततुन कतम कींतोर. बच्चुंगो वर्साना पजा, पेन ओर किरिस्तु आंदुर इंचि हुपिस्ता.
पेन अद पीसि वायाना दाना परिवारतुन कम्मुडताल कापाळता. पेन नोहान उंदि डोंगा तयार कीम इंचि वेहाचि, दानपोर्रो विस्वासम कियानोर्कुन कम्मुडताल कापाळता. गानि कळमातोर अंटोरगुडा पापम कीसि पेनदाहेंदाल हामुरलायक आसि मत्तुर, गानि ओर्कुन कापाळनाहाटीं पेन येसुन लोहचि, ओनपोर्रो विस्वासम कियानोर्कुन अंटोर्कुन कापाळता.
बच्चुंगों वर्सनदाका पेर्मालोर पेनदाहाटीं मोक्कुल्क हीसेके मत्तुर. दीना अर्तम बतल इत्ते, लोकुल्कु पापम कीसि, पेनदाहेंदाल ओर्कु सिक्सा दोर्कानालायक ओर आसि मत्तुर. गानि ओर हिय्याना मोक्कुल्कु ओरा पापाल्कुन मापि किया पर्राहिल्लें. येसु अंटोर्कन्ना पेद्दा पेर्मल आंदुर. इदवेरदाका बोरे किया पर्रुवदुन ओर कीतोर. अंटोरा पापाल्कु मापि कियागोटनसोंटा उंदे-उंदि मोक्कुताहाटीं येसु कुद्दु मोक्कु आयालय तयार आसि वातोर. अंटोरा पापाल्कुन पोळागोटनाहाटीं पेन ओनकु सिक्सा हिय्यिकांटी इंचि ओर ओप्कुत्तोर. इदुनाहाटींगे ओर अंटोर्कन्ना पेद्दा पेर्मल आतोर.
“नना नीवा वंसमताहेंदाल दुनियाता अन्नि कुलमतोर्कुन आसिर्वाद हींतन,” इंचि पेन अब्राहामुंक वेहचि मत्ता. येसु ई अब्राहामुना वंसमताले मत्तोर. अब्राहामुनाहेंदाल पेन अन्नि कुलमतोर्कु आसिर्वाद हींता, बारित्ते, बोरय्ते येसुन पोर्रो विस्वासम कींतोर पेन ओर अंटोर्कुन पापमताल पिसागोटंता. लोकुल्कु बस्के अय्ते येसुन विस्वासम कींतुर, अस्के पेन ओर्कुन अब्राहामुना वंसमतोर इंचि इंता.
पेन अब्राहामुन, ओना सतता मर्रिन दानाहाटीं मोक्कु हीम इंचि मत्ता. गानि पेन मर्रा इसाहाकुना जेगाते मोक्कु हिय्यानाहाटीं उंदि गोर्रेतुन हीता. मनम अंटोरमगुडा मनम कीता पापाल्कुनहेंका हामुर सिक्सातालायक मत्तोम. गानि मनम हायाना जेगाते पेन येसुन मोक्कु आयालय हीसीता. इदुनाहाटींगे मनम येसुन पेनदा गोर्रे पोरि वेहांतोम.
इजिप्त देसेमपोर्रो पेन आकिरता गत्तरा लोहतस्के, अद इस्राएलतोर्कुंक, ओर उंदि दोसेम हिलुवा गोर्रेतुन मोक्कु हिय्याना इंचि वेहता. मोक्कु हीसि दाना नेत्तुरतुन ओरा गलमाना दारसाकांकु होकाना मत्ता. पेन आ नेत्तुरतुन हूळतस्के, अद ओरा लोह्कुन दाटसि मुन्नेळ्क होत्ता आनि ओरा तोल्सूर मर्कुन हव्काहिल्ले. इदंता आसोत्तस्के, पेन इदुन दाटसि होनना पंडुगु इत्ता.
येसु आ दाटसि होनना पंडुगुना गोर्रतालेसीं मंतोर. ओर बस्केने पापम कियाहिल्लोर, ओनालोप्पो बतले तप्पु मनाहिल्ले. ओरगुडा दाटसि होनना पंडुगुना वेलातेन हासोत्तोर. बस्के अय्ते वरोर मनकल येसुनपोर्रो विस्वासम इर्रांतोर, अस्के येसुना नेत्तुर आ मनकाना पापमता बाकि नेम्हंता. अद बल्हा इत्ते, पेन आ मनकाना दग्गेटाल मुन्नेळ्क पेय्सि होत्ता, बारित्ते पेनदुक आ मनकंक सिक्सा हिय्याना हिल्ले.
इस्राएल लोकुल्कुन पेन दाना लोकुल्क आयालय पेरसि मत्ताहाटीं अद ओरतोनि उंदि करार कीसि मत्ता. गानि इंदके पेन दुनियाता अंटोराहाटीं उंदि करार कीता. दुनियाता बोरे मनकल आयिर, ओर ई करारतुन स्वीकार कियानय्ते ओर पेनदा लोकुल्कुने कलियंतोर. ओर येसुन पोर्रो विस्वासम इरमळताहेंदाल अल्हा आंतोर.
पेनदा पोल्लेतुन वेल्लेन ताकततोनि अंटोर्क वेहता, पेनदा कबुरतोर इत्ते मूसाल आंदुर. गानि येसु अंटोर पेनदा कबुरतोर्कुंकन्ना पेद्दोड आंदुर. ओर कुद्दु पेन आंदुर, अदुनहाटीं ओर बतल किय्यिना, वेहिना अद पेनदा पोल्लेताहाटींगे मत्ता. अदुनाहाटींगे दर्मसास्त्रम येसुन ‘पेनदा पोल्ले’ इंचि वेहंता.
पेन दाऊद राजांक उंदि पोल्ले हीसि मत्ता गदा, ओना वंसमताल वरोर राजाना रूपमते, पेनदा लोकुल्कुनपोर्रो बस्केळ्ताहाटीं राज्येम कींतोर इंचि. येसु पेनदा मर्रि, किरिस्तु आनि दाऊद राजाना वंसमते पुटतोर आंदुर, अदुनहाटीं ओर बस्केळ्ताहाटीं राज्येम कींतोर.
दाऊद अय्ते सिराप इस्राएल देसेमता राजाल मत्तोर, गानि येसु अय्ते पूरा दुनियाता राजाल आंदुर. ओर मर्रा वायाना मंता. वासि बस्केळ्ताहाटीं सांतिते ओना लोकुल्कुनपोर्रो राज्येम कियानुर.
उत्पत्ति 1-3, 6, 14, 22; निर्गमन 12, 20; 2 शमूएल 7; इब्रानियों 3:1-6, 4:14-5:10, 7:1-8:13, 9:11-10:18; प्रकाशितवाक्य 21 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।