47. पिलिपि सहरते पौलुस आनि सिलास
यह कहानी सुनें ऑडियो फ़ाइल · 4.6 MB
इस रिकॉर्डिंग के शब्द नीचे Aheri Gondi में दिए गए हैं।
रोम सरकार बच्चोन एरियाते राज्येम कींतानो, अद पूरा एरियंता साऊल पय्नेम कीतोर, अस्के ओर ओना “पौलुस” इनना रोमि पोरोल दोसकुत्तोर. उंदि रोज, पौलुस आनि ओना दंटाता सिलास ईर इव्वुर पिलिपि सहरते येसुना बारेमता बेसता कबुर वेहालय होत्तुर. सहरता पलाते बेरेड ओड्डुनगा, उंदि जेगाते पारतनाहाटीं लोकुल्क जमा आसि मत्तुर, अगा ओर इव्वुर होत्तुर. अगा ओर लुदिया पोरोलता उंदि व्यापारम कियाना मुरतळ्कु कलियतुर. अद पेनदुन पावरम कियुंदु, पेनदा आरादना कियुंदु.
पेन आ लुदियान, येसुना बारेमता बेसता कबुरतुन विस्वासम कियालय दानकु सहायम कीता. पौलुस आनि सिलास, लुदियांक आनि दाना परिवारतोर्क बापतिस्मा हीतुर. पजा पौलुस आनि सिलासुन, अद दाना लोन आगालय विनंति कीता अय्ते ओर अग्गेन आगतुर.
पौलुस आनि सिलास एक्कोते-एक्को यहुदिल्क पारतना कियाना जेगातेन लोकुल्कुंक कलियुंदुर. दररोज ओर अगा बस्के अय्ते होनंदुर अस्के, देय्यमता कय्दा हिळु मत्ता उंदि दासि पोरि ओरा पज्जो-पज्जो होनुंदु. आ देय्यमता सहायमतोनि अद लोकुल्कुंक बविस्यवानि वेहुंदु, इल्हा अद उंदि बविस्य वेहाना मुरतळ आसि, दाना मालकुल्कुनाहाटीं वेल्लेन कमय कीसि हिय्युंदु.
ओर होननेंके आ दासि पोरि, “ई मनकालोर अन्निटकन्ना पेद्दा पेनदा सेवाकुल्क आंदुर. ईर मीकु मुक्तिता हर्दा बारेमते वेहचंतुर,” इंचि दररोज मोत्कुनुंदु, अदुनहाटीं पौलुस नाराज आसि मत्तोर.
आकिरते, उंदि रोज आ दासि पोरि मोत्कुनालय दल्गतस्के, पौलुस आ पोरिनाहेके तिरियसि, दानालोप्पो मत्ता देय्यमतुन, “येसुना पोरोलते निमे दाना लोप्पोटाल पेय्सि होन,” इंचि इत्तोर. अल्हा इत्ता इनुडे आ देय्यम आ पोरिन होळसि होत्ता.
अस्के आ दासि पोरिना मालकुल्कुंक इरगा होंग वाता. आ देय्यमता सहायम हिलाकोंटा आ दासि पोरि बविस्यवानि वेहापर्रो इंचि ओर्कु तेळियसोत्ता. इंदके लोकुल्कु ओरा बारेमते बविस्यवानि वेहालय आ पोरिना मालकुल्कुंक कोत्तां हिय्युर.
अदुनहाटीं आ दासि पोरिना मालकुल्क, पौलुस आनि सिलासुन रोम सरकारता अदिकारिल्कुनगा ओतुर. ओर पौलुस आनि सिलासुन इरगा तंचि ओर्कुन जेलने वाटतुर.
जेलने बगा अय्ते एक्को सिपाइल्क कावेल कीसेके मनंतुरो, अगा ओर पौलुस आनि सिलासुन इरतुर. अचोने आयाका ओरा काल्कुंक कट्टेता बल्ला कळाहतुर. अयना पौलुस आनि सिलास नडजाम नर्का आतस्के, पेनदा स्तुति कियाना पाटां पारसेके मत्तुर.
अस्के अचानक उंदि पेद्दा बूकंप आता. जेलनव अन्नि तल्पुक पेय्सतां, जेलने मत्तोरा अंटोरा बेडीं नेम्सि हिळ अरतां.
अस्के दरोगाल निद्राताल तेदसि हूळते जेलनव अन्नि तल्पुक पेय्सि मंतां. अय्ते अंटोर कैदिर्क जेलनाल पेय्सि विततुर, ओर पेय्सि वितुताहाटीं रोम सरकारता अदिकारिल्क नाकुन हव्कांतुर इंचि आ दरोगाल इनकुत्तोर. अदुनहाटीं ओनद ओरे हव्ककुनालय तयार आतोर. गानि पौलुस, “आगा, अल्हा नुकसान कीकुनमा! मोमोट अंटोरम इग्गेन मंतोम,” इंचि इत्तोर.
आ दरोगाल इरगा वनकुसेके पौलुस, सिलासुनगा वासि, मुक्ति दोर्किच्कुनालय नना बतल कीकन?” इंचि पूसकीतोर. अस्के ओर, “सामि येसुनपोर्रो विस्वासम कीम, निमे, नीवा परिवारतोर्क मुक्ति दोर्कंता,” इंचि जवाब हीतोर. अस्के आ दरोगाल, पौलुस, सिलासुन ओना लोन ओसि, ओरा पुनकुनंता नोर्सि साप कीतोर. पौलुसगुडा दरोगाना लोतोर अंटोर्क येसुना बारेमता बेस कबुर वेहतोर.
अस्के दरोगाल आनि ओना लोतोर अंटोर येसुनपोर्रो विस्वासम इरताहाटीं पौलुस, सिलास ओर्कु बापतिस्मा हीतुर. पजा पौलुस, सिलास दरोगाना लोने गाटो तित्तुर, इल्हा अंटोर कलियसि कूस आतुर.
इंकुंदि रोजु, अद सहरता नेतालोर पौलुस, सिलासुन जेलनाल होळसीतुर आनि पिलिपिताल पेय्सि होंटु इंचि वेहतुर. पजा पौलुस आनि सिलास, लुदियांक आनि इंकिच्चुर दंटातोर्क कलियसि अगाटाल पेय्सि होत्तुर. येसुना बारेमता बेसता कबुर पैलांच्सेके होत्ता, कलिसियांगुडा बेर्सेके होत्तां.
पौलुस आनि वेरे विस्वासि नेतालोर कलियसि बच्चुंगो सहरकुने होत्तुर. होंचि अगाटा लोकुल्कुंक येसुना बारेमता बेसता कबुर वेहतुर. कलिसिया आनि अगाटा विस्वासुल्क विस्वासमते गट्टि पडानाहाटीं आनि ओर्कु पेनदा पोल्लें कराहनाहाटीं ओर बच्चुंगो सिट्टिंगुडा रासि लोहतुर. ओरा सिट्टिनाल कोन्नि सिट्टिं बाइबलते पुस्तकाल्क आतां.
प्रेरितों के काम 16:11-40 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।