46. पौलुस किरिस्‍तुन विस्वासम कींतोर

साऊल पोरोलतोर वरोर मनकल मत्‍तोर, ओर येसुन विस्वासम कीसि मनाहिल्‍लोर. ओना लेय्यातनमते, स्‍टिपनुन हव्‍काना लोकुल्‍कुना कपडिंकु ओर कावेल मत्‍तोर. पजा ओर विस्वासुल्‍कुन तिप्‍पल्‍क कियुंदुर. येरुसलेमते ओर लोन-लोन होंचि मुरतळ-मांडसा इनाका इव्‍वुर्कुनगुडा दोर्कापीसि जेलने वाटतोर. अस्‍के पेद्‍दा पेर्मल साऊलुन दमिस्‍क सहर होनालय वेहतोर. अगा होंचि अगाटा विस्वासुल्‍कुन दोर्कापीसि ओर्कुन येरुसलेम वापस पीसि वा इंचि पेर्मल साऊलुंक वेहतोर.

अय्ते साऊल दमिस्‍क होनालय पेय्‍सतोर. ओर दमिस्‍क एव्‍वका मुन्‍नेन गिचचो लक्‍कु मननेंके अचानक ओना सुट्‍टु मब्‍बुनाल तेल्‍लगा वेलगु आता, ओर बूमिपोर्रो कूलाबडतोर. अस्‍के बोरो, “ए साऊल, ए साऊल निमे नाकुन बारि तकलीप कीसंतिन?” इंचि इनानद साऊल केंजतोर. अस्‍के साऊल, “ए सामि, निमे बोन आंदिन?” इंचि पूसकीतोर. अस्‍के येसु, “नना येसुन आंदुन, निमे नाकुन तकलिप कीसंतिन,” इंचि इत्‍तोर.

पजा साऊल तेदसि निलतोर अय्ते ओनकु कळ्‍कु दिसाकोंटा आतां. ओना दंटातोर ओन दमिस्‍क पीसि ओतुर. मूड रोजकुनदाका साऊल बतले तिनाहिल्‍लोर, उनाहिल्‍लोर.

दमिस्‍कते हन्‍यना पोरोलतोर वरोर सिस्युड मत्‍तोर. पेन ओन, “निमे साऊल मनना लोते होंचि ओन इट्‍टा, अस्‍के ओर मर्रा हूळापर्रांतोर,” इंचि वेहता. गानि हन्‍यनाल मात्रम, “सामि, ओर विस्वासुल्‍कुन वेल्‍लेन तिप्‍पल्‍क कीतोर इंचि नना केंजतन,” इत्‍तोर. अस्‍के जवाबुने पेन, “निमे होन! यहुदिल्‍क आनि वेरे जातिता लोकुल्‍कुना नड्‍डुम ओन नना नावा पोरोलतुन वेहालय पेरतन. नावा पोरोलतुन वेहालय ओर वेल्‍लेन कस्‍टाल्‍क अर्रंतोर,” इंचि इत्‍ता.

अय्ते हन्‍यनाल साऊलनगा होत्‍तोर, होंचि साऊलुन पोर्रो ओना कय इरसि, “निमे इग्‍गे वायनेंके नीकु हर्दे दिसता येसु, नीकुन मर्रा हूळानालायक कियालय आनि निमे पवित्र आत्माते निंडालय, नाकुन निहगा लोहतोर,” इंचि इत्‍तोर. अस्‍केटद अस्‍केन साऊल हूळा परतोर आनि हन्‍यनाल ओनकु बापतिस्मा हीतोर. पजा साऊल गाटो तिंचि मर्रा हुसार आतोर.

अस्‍केटाल, दमिस्‍कते मनना यहुदिल्‍कुंक साऊल येसुना बारेमते वेहामळ सुरुव कीतोर. “येसे पेनदा मर्रि आंदुर,” इंचि ओर वेहुंदुर. इद केंजसि यहुदिल्‍कुंक इचंत्रम आयुंदु, बारित्‍ते, साऊल विस्वासुल्‍कुन हव्‍कालय हूळुंदुर, गानि इंदके ओर येसुन विस्वासम कीतोर. ओर यहुदिल्‍कुनतोनि वळ्‍किसि-वळ्‍किसि, येसे किरिस्‍तु आंदुर इंचि रुजुव कीसि हुपिस्‍तोर.

वेल्‍लेन रोजकु आसोत्‍तस्‍के, यहुदिल्‍क साऊलुन हव्‍काना पिलान कीतुर. ओनपोर्रो नदर वाटसि, ओन हव्‍कानाहाटीं यहुदिल्‍क सहरता गेटुनगा लोकुल्‍कुन लोहतुर. गानि ओरा पिलानता बारेमते साऊलुंकु तेळियसि ओर ओना दंटातोरा सहायमतोनि अगाटाल तप्‍पिच्‍कुंचि पेय्‍सि होत्‍तोर. उंदि नर्का ओना दंटातोर, ओन तट्‍टाते उपिच्‍चि गूरे पोर्रोटाल हब्‍बेरा रेहतुर. दमिस्‍कताल तप्‍पिच्‍कुंचि पेय्‍सि होत्‍तस्‍के, साऊल येसुना बारेमते वेहामळ सुरुवे इरतोर.

साऊल प्रेरितुल्‍कुंक कलियालय येरुसलेम होत्‍तोर, गानि प्रेरितुल्‍क मात्रम ओनकु वेरियुंदुर. अय्‍ते बरनाबास पोरोलतोर वरोर विस्वासि, साऊलुन प्रेरितुल्‍कुनगा ओतोर. साऊल बच्‍चोनो गट्‍टि दैरनेमते दमिस्‍कते येसुना बारेमते वेहतोर इंचि बरनाबास प्रेरितुल्‍कुंक वेहतोर. अस्‍के प्रेरितुल्‍क ओन ओप्‍कुत्‍तुर.

तिप्पल्‍कुंक आगा पर्रका, येरुसलेमताल इच्‍चुर विस्वासुल्‍क अंताकिया इनना सहरते पेय्‍सि विततुर. अगा ओर येसुना बारेमते वेहासेके मत्‍तुर. अंताकियाता लोकुल्‍कु वेल्‍ले मंदि यहुदिल्‍क आयुर. गानि ओरव्टेटाल वेल्‍ले मंदि पूनें-पूनें येसुन नम्मिसि विस्वासुल्‍क आतुर. आ पूना विस्वासुल्‍कुंक येसुना बारेमते इंका बेस कराहचि अगाटा कलिसियातुन विस्वासमते गट्‍टि पळसानाहाटीं बरनाबास आनि साऊल अगा होत्‍तुर. येसुन विस्वासम कियानोर्कुन मोट्‍टा मोदाला अंताकियातेन ‘किरिस्‍तुनोर’ इंचि केयमळ जर्गता.

उंदि रोज, अंताकियाता विस्वासुल्‍क ओक्‍कापोद्‍दु इरसि पारतना कीसेके मत्‍तुर. अस्‍के पवित्र आत्मा ओर्कुन, “बरनाबास आनि साऊलुन बद कबळ कियालय अय्ते नना केया वेहतानो, अद कबळ कियानाहाटीं ओर्कुन मिहागटाल वेरे कीम्टु,” इंचि वेहता. अदुनहाटीं अंताकियाता कलिसियातोर बरनाबास आनि साऊलुनपोर्रो कय इरसि पारतना कीतुर. पजा ओर्कुन वेरे वेल्‍लेन जेगाने येसुना बारेमते बेसता कबुर वेहालय लोहचीतुर. अस्‍के बरनाबास आनि साऊल वेरे-वेरे जातिना लोकुल्‍कुंक येसुना बारेमते कराहतुर आनि बच्‍चुरो लोकुल्‍क ओरा पोल्‍लेन नम्मिसि येसुनपोर्रो विस्वासम इरतुर.