45. स्टिपन आनि पिलिप
यह कहानी सुनें ऑडियो फ़ाइल · 5.4 MB
इस रिकॉर्डिंग के शब्द नीचे Aheri Gondi में दिए गए हैं।
मोट्टा मोदाटा विस्वासी नेतालोरा लोप्पो स्टिपन इनानोर वरोर मनकल मत्तोर. अंटोर ओन्कु बेस कदर हिय्युंदुर. पवित्र आत्मा ओनकु बेस बुद्दि आनि ताकत हीसि मत्ता. स्टिपन वेल्लेन चमत्काराल्क कीसि मत्तोर. येसुन नम्मना बारेमते ओर लोकुल्कुंक कराहतस्के, वेल्लेन लोकुल्कु ओन नमतुर.
उंदि रोजु, स्टिपन येसुना बारेमते लोकुल्कुंक कराहसेके मत्तोर. अगा येसुन नम्मुवा इच्चुर यहुदिल्क वासि ओनतोनि लोल्लि कियालय दल्गतुर. ओर इरगा होंगुक वातुर. अस्के ओर ओरा नेतालोरगा होंचि, “मना पेन आनि मूसाना बारेमते स्टिपन तप्पुड पोल्लें वळ्कानेंके मोमोट केंजतोम,” इंचि ओना बारेमते आबद्दम वेहतुर. अदुनहाटीं ओरा नेतालोर स्टिपनुन दोर्कापीसि ओन पेद्दा पेर्मल आनि कळमाता ओरा यहुदि नेतालोरा मुन्ने पीसि ओतुर. बचटूरो आबद्दम वळ्काना गवाइदार्क वातुर, वासि स्टिपनुना बारेमते आबद्दम वळ्कतुर.
पजा पेद्दा पेर्मल स्टिपनुन, “नीवा बारेमते ई लोकुल्क वेहानद निजमे ना?” इंचि पूसकीतोर. पेद्दा पेर्मांक जवाब हिय्याना उद्देसमते स्टिपन वेल्लेन पोल्लें वेहालय सुरुव कीतोर. ओर इत्तोर, ‘अब्राहामुना कालमताल अय्ते येसुना कालमदाका पेन इस्राएल लोकुल्कुनाहाटीं बच्चुंगो अद्बूतमाता कबाह्क कीता. गानि लोकुल्क मात्रम पेनदा पोल्ले पोर्रो ताकाहिल्लुर.’ पजा स्टिपन इल्हा इत्तोर, “मिमेट पेनदा विरोदमते गडसुतनम कीसि, बदनाम कियानोर आंदिर. मावा एनकटा पेद्दाल्क बल्हा पवित्र आत्मा वेहतदुन बस्केन ओप्कुनाकोंटा पेनदा कबुरतोर्कुन हव्कतुर, मिमेटगुडा ओरालेसींगे पवित्र आत्मा वेहतदुन बस्केने ओप्कुना हिल्लिर. गानि ओर कीतादुंकन्ना मिमेट ओरकन्ना एक्को तप्पु कीतिर, मिमेट किरिस्तुन हव्कतिर!” इत्तोर.
ओना इसोंटा पोल्लें केंजसि आ नेतालोर इच्चोन होंगुक वातुर गदा, ओर ओरा केव्कुन मुच्कुंचि बतले केंजाकोंटा इरगा मोत्कुत्तुर. स्टिपनुन इग्गिसेके सहरता पलाते ओतुर, ओसि ओन हव्कालय ओन बंडाने तंतुर.
स्टिपन जीवा होळसानेंके, “ए येसु, ना आत्मातुन निमे स्वीकार कीम,” इंचि केयतोर. पजा टोंगरन पोर्रो कूलाबडसि मर्रुंदि मल्का, “हे सामि, ई पापम ओरापोर्रो मोपमा,” इंचि जीवा होळ्सतोर.
अद रोजनाल, येरुसलेमते मनना वेल्लेन मंदि लोकुल्कु येसुन विस्वासम कीतोर्कुन तिप्पल्क कियमळ सुरुव कीतुर, अदुनहाटीं विस्वासुल्क अगटाल वेरे जेगाने पेय्सोत्तुर. अयनागानि ओर बगा होत्ते अगा, अगाटा लोकुल्कुंक येसुना बारेमते वेहतुर.
पिलिप पोरोलतोर वरोर विस्वासि मत्तोर. अंटोर विस्वासुल्क येरुसलेम होळसि होत्ताप ओरगुडा येरुसलेमताल पेय्सि होत्तोर. ओर सामरिया इनना एरियाते होत्तोर. अगा ओर येसुना बारेमते लोकुल्कुंक वेहतोर. वेल्लेन लोकुल्कु ओर वेहतदुन विस्वासम कीसि, मुक्ति दोर्किच्कुत्तुर. उंदि रोज, पेनदा उंदि दूता पिलिपुनगा वासि, ओन केडाते होंचि उंदि हर्रिपीसि ताकालय वेहता. अस्के ओर अगा होत्तोर. ओर आ हर्रिपीसि होंचेके मननेंके वरोर मनकल ओना रतमते उद्दिसि होननेंके पिलिपुंक दिसतोर. आ मनकल कूस इनना देसेमते पेद्दा अदिकारि मत्तोर. ओनगा होंचि ओनतोनि कलियसि ताका इंचि पवित्र आत्मा पिलिपुंक वेहता.
अदुनहाटीं पिलिप रतमता दग्गेरा होत्तोर. अस्के आ मनकल कूस देसेमता पेनदा पोल्लें हद्वानद ओर केंजतोर. यसायाह इनना वरोर पेनदा कबुरतोर रासता पोल्लें ओर हद्वुसेके मत्तोर. अव पोल्लें इल्हा मत्तां, “ओर ओन बलि हियालय ओयाना गोर्रेतुन ओताप ओतुर. गोर्रे बल्हा सांत मनंता, अल्हेन ओरगुडा बतले वळ्काकोंटा चुपचाप मत्तोर. ओर लोकुल्कु ओनतोनि तप्पुड व्यवहार कीतुर, ओना कदर इर्राहिल्लुर, ओन हव्कतुर.”
अस्के पिलिप आ कूस देसेमता मनकन, “निमे हद्वाना पोल्लें नीकु अर्तम आतांगा?” इंचि पूसकीतोर. अस्के, “हिल्ले. बोरन्ना नाकु इवुना अर्तम तेळियागोटसि वेहाकोंटे नाकु इवुना अर्तम तेळियो, कुरपा कीसि नहगा वासि उद्दा. उद्सि, यसायाहल सतता बारेमते वेहचंतोरा मरि वेरे बोना बारेमते अय्ना वेहचंतोरा नाकु वेहा,” इंचि आ मनकल इत्तोर.
पिलिप रतमते एक्किसि उदतोर. आनि यसायाहल येसुना बारेमते रासता पोल्लें ओनकु वेहतोर. पेनदा वेरे वेल्लेन पोल्लेंगुडा पिलिप आ मनकंक वेहतोर. इल्हा पिलिप आ कूस देसेमता मनकंक येसुना बारेमता बेसता कबुर वेहतोर.
पिलिप आनि आ मनकल इव्वुरगुडा ताकसेके एतागा एव्तुर. अस्के आ कूसी मनकल, “हुळा! अगा एर मंता, इंदके नना बापतिस्मा येतावच्चा? इंचि इत्तोर. आनि रतम ताकसानोन रतम आपा वेहतोर.
पजा ओर इव्वुर एते होत्तुर, पिलिप आ कूसी मनकंक अगा बापतिस्मा हीतोर. ओर एताल बल्हा अय्ते पलाते पेय्सतुर, अल्हेन पवित्र आत्मा पिलिपुन बदो वेरे जेगाते तेहकुंचि ओता. पिलिप अगागुडा लोकुल्कुंक येसुना बारेमते वेहामळ सुरुवे इरतोर.
आ कूसी मनकलगुडा ओना लोताहेके होनालय मुन्नेळ्क पेय्सतोर. ओर येसुन एरपाट कीताहाटीं वेल्लेन कूस मत्तोर.
प्रेरितों के काम 6:8-8:5; 8:26-40 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।