44. पत्रु आनि योहान कलियसि वरोर बिच्‍चागान बेस कींतुर

उंदि रोजु, पत्रु आनि योहान गुळितगा होत्‍तुर. अगा वरोर ताका पर्रुवा मनकल बिच्‍चोम तल्‍कालय गलमातगा उद्‍दिसि मत्‍तोर.

पत्रु आ कुंटि मनकन हूळसि, “नीकु हियालय नहगा अय्ते कोत्‍तां हिल्‍लें, गानि नहगा बतल अय्ते मंता अद नना नीकु हींतन, येसुना पोरोलते निमे तेदसि ताका!” इंचि इत्‍तोर.

अस्‍केटद अस्‍केन पेन आ कुंटि मनकन बेस कीता. अय्ते ओर हीके-हेके ताकुड, दुनकुड आनि पेनदुन तल्‍सकुनमळ सुरुव कीतोर. अद वेलाते गुळिते मत्‍ता लोकुल्‍क अंटोर इचंत्रम आतुर.

बिरानेन लोकुल्‍कुना उंदि पेद्‍दा मंदा आ बेस आता मनकन हूळालय अगा वातुर. अस्‍के पत्रु ओर्कुन इल्‍हा इत्‍तोर, “ई मनकल बेस मंतोर इंचि मिमेट इचंत्रम आयमटु. मोमोट ई मनकन मावा ताकततोनि बेस कीतोमो, हिलाकोंटे मोमोट पेनदा कदर कींतोम इंचो ईर बेस आयाहिल्‍लोर. कुद्‍दु येसु ओना ताकततोनि ई मनकन बेस कीतोर. बारित्‍ते मोमोट येसुनपोर्रो बरोसा कींतोम.”

“येसुन हव्‍का इंचि रोम सरकारता राज्यपालनगा वेहतोर मिमेटे आंदिर. अंटोर्कु पिस्वर हिय्यानोन मिमेट हव्‍कतिर. गानि पेन ओन हातोरव्टेटाल मर्रा जीवाते तेहता. मिमेट बतल कीसेके मत्‍तिरो अद मीकु तेळियाहिल्‍ले, गानि मिमेट अव कबाह्‍क कियनेंके मात्रम पेनदा कबुरतोर बस्‍केनो वेहता पोल्‍लें पुरागा आतां. किरिस्‍तुंकु तिप्‍पल्‍क वासि, ओर हायानुर इंचि ओर वेहचि मत्‍तुर, अदुनहाटीं पेन इल्‍हा जर्गा हीता. अदुनहाटीं इंदके मिमेट मनसु मार्सकुंचि पेनदाहेके तिरियट, अस्‍के पेन मीवा पापाल्‍कुन नोर्सि मीकुन साप कींता.”

पत्रु आनि योहान वेहता पोल्‍लें आ गुळिता नेतालोर केंजसि इरगा वेरियकुत्‍तुर. अदुनहाटीं ओर पत्रुन आनि योहानुन दोर्कापीसि जेलने वाटतुर. गानि पत्रु वेहता पोल्‍लेन केंजतोर वेल्‍लेन मंदि विस्वासम कीतुर. येसुनपोर्रो विस्वासम कियाना लोकुल्‍कु बेरसि ओर दग्‍गेर-दग्‍गेरा हेय्युं वेय्‍क(5000) आतुर.

इंकुंदि रोजु, आ यहुदि नेतालोर, पत्रु आनि योहानुन पेद्‍दा पेर्मल आनि इंका वेरे नीतिमंतुल्‍कुना मुन्‍ने पीसि ओतुर. आ काल्‍क वायवा मनकनगुडा अगा ओतुर. अगा ओर पत्रु आनि योहानुन, “बद अदिकारते मिमेट आ कुंटि मनकन बेस कीतिर?” इंचि पूसकीतुर.

अस्‍के, “मी मुन्‍ने निल्‍सि मनना ई मनकन येसु किरिस्‍तुना ताकतहेंदाल बेस कियमळ जर्गता. मिमेट येसुन क्रुसुनपोर्रो वेलाड वाटतिर, गानि पेन ओन मर्रा जीवाते तेहाता! मिमेट ओन ओप्‍कुनाहिल्‍लिर, गानि मुक्‍ति दोर्कालय येसुना ताकत तप्‍पा वेरे बद्‍दे हर्रि हिल्‍ले,” इंचि पत्रु जवाब हीतोर.

पत्रु आनि योहान वेल्‍लेन दैरनेमते वळ्‍कतुर इंचि आ नेतालोर परेसान आतुर. ओर अय्ते मामुल मनकालोरे, सदवुगुडा करियसि मनाहिल्‍लुर, इंचि नेतालोर्क तेळियसि मत्‍ता. गानि पज्‍जो ओर्कु मति वाता गदा, ओर ई मनकालोर येसुनतोनि मत्‍तुर इंचि. अदुनहाटीं ओर, “ओक्‍कला मिमेट येसुना बारेमते लोकुल्‍कुंक वेहानय्ते, मोमोट मीकु इरगा सिक्‍सा हींतोम,” इंचि वेराहतुर. इल्‍हा वेल्‍लेन पोल्‍लें पत्रु आनि योहानुन वेहचि, ओर्कुन होळसीतुर.