43. कलिसियाता सुरुवात
यह कहानी सुनें ऑडियो फ़ाइल · 4.5 MB
इस रिकॉर्डिंग के शब्द नीचे Aheri Gondi में दिए गए हैं।
येसु स्वर्गमते मल्सि होत्तस्के, ओना सिस्युल्कुंक ओर हीता आदेस परकारम ओर येरुसलेमतेन आगिसि मत्तुर. अगाटा विस्वासुल्कु बस्केळ्क पारतना कियालय अंटोर उंदगा जमा आयुंदुर.
दाटसि होनना पंडुगुना एबै रोजकु आसोत्तस्के, एटा-एटा यहुदि लोकुल्कु पेंतेकोस्तु इनना उंदि मुक्केमाता रोजुन नोमुंदुर. ई पेंतेकोस्तु रोजु, यहुदि लोकुल्कु गोह्कु कोय्याना वेलाते वायुंदु. ई पेंतेकोस्तु रोजुन कलियसि नोमानाहाटीं यहुदि लोकुल्कु दुनियाते बगा मनिनागानि येरुसलेमते वायुंदुर. ई वर्सा मात्रम पेंतेकोस्तु नोमाना रोजु, येसु स्वर्गमते होत्ता उंदि वारम रोजकुंक वाता.
अद वेलाते विस्वासुल्क बा लोते अय्ते जमा आसि मत्तुरो, अद लोते अचानक उंदि पेद्दा वळिता आवाज निंडसोत्ता. तळमिता पेद्दा-पेद्दा मिनगुल्कुनसोंटव बतांगो अंटोर विस्वासुल्कुना तल्लनपोर्रो वासि दिसतां. अस्के विस्वासुल्क अंटोर पवित्र आत्माते निंडसोत्तुर आनि वेरे-वेरे बासाने पेनदा स्तुति कियालय दल्गतुर. आ अन्नि बासान वळ्कालय विस्वासुल्कुंक पवित्र आत्मा ताकत हीता.
विस्वासुल्क लोल्लि कियानद येरुसलेमते मत्ता वेरे लोकुल्कु केंजसि, बतल जर्गसंता इंचि हूळालय अंटोर अगा जमा आतुर. पेन कीता पेद्दा-पेद्दा कबाह्कुना बारेमते विस्वासुल्क वेहानेंके आ लोकुल्कु केंजतुर. विस्वासुल्क वेहना कबाह्कुन आ लोकुल्कु ओरा बासातेन केंजतुर इंचि, ओर पेद्दा इचंत्रमते अरतुर.
आ लोकुल्कुना लोप्पोटाल इच्चुर लोकुल्कु अय्ते, ‘ई सिस्युल्कु रिम्मा आतुर’ इंचि इत्तुर. गानि पत्रु नित्सि इल्हा इत्तोर, “नना वेहानद केंजट! ई लोकुल्कु रिम्मा आयाहिल्लुर! मिमेट बतल अय्ते हूळसंतिरो, अदुना बारेमते योएल इनना वरोर पेनदा कबुरतोर अस्के वेहचि मत्तोर अदे जर्गसंता. ओर वेहतोर गदा, ‘पेन वेहता, आकिरता रोजकुने नना नावा आत्मा कुम्मरिच्चंतन.’’’
“ए इस्राएल लोकुरिटा, येसु इसोंटा मनकल मत्तोर गदा, ओर बोर आंदुर इंचि रुजुव कियानाहाटीं वेल्लेन अद्बूतमाता कबाह्क कीसि हुपिस्तोर. ओर पेनदा सहायमतोनि वेल्लेन अद्बूतमाता कबाह्क कीतोर. अव कबाह्कुन मिमेट हूळतिर, मीकु एर्केगुडा. गानि मिमेट ओन क्रुसुनपोर्रो वेलाड वाटतिर.”
“येसु हासोत्तोर गानि पेन ओन हातोरव्टेटाल मर्रा जीवाते तेहता. ‘निमे नीवा पवित्र मनकन बोंदाते मुर्गाहिय्यिन,’ इंचि पेनदा वरोर कबुरतोर रासता पोल्लेतुन येसु पुरागा कीसि हुपिस्तोर. पेन येसुन मर्रा जीवाते तेहता इनना पोल्लेकु मोमोटे गवाइ मंतोम.”
“पेनबाबाल इंदके येसुन ओना तिना बाजुंक उप्पिचि ओनकु कदर हीतोर. आनि येसु मनाहाटीं पवित्र आत्मातुन लोहंतन इंचि पोल्ले हीता परकारम ओर पवित्र आत्मातुन लोहतोर. मिमेट हूळानव आनि केंजानव ई अन्नि कबाह्क अंता पवित्र आत्माहेंदाले जर्गसंतां.”
“मिमेट आ मनकन इत्ते, येसुन क्रुसुनपोर्रो वेलाड वाटतिर. गानि पेन येसुन अन्नि वस्तुकुनपोर्रो सामि आनि किरिस्तु इंचि अदिकारम हीसि निल्हाता, इद मिमेट तेल्पिच्कुंटु.”
पत्रु वेहता पोल्लें केंजतोर लोकुल्कु अंटोर अदुल्कुत्तुर. अदुनहाटीं ओर पत्रु आनि सिस्युल्कुन, “अय्ते मोमोट बतल कीते बेस वेहट दादा?” इंचि पूसकीतुर.
पत्रु ओर्कु इल्हा जवाब हीतोर, “मिमेट अंटोर मीवा पापाल्कुनाल मनसु मार्सकुंटु, अस्के पेन मीवा पापाल्कुन मापि कींता, पजा मिमेट येसु किरिस्तुना पोरोलते बापतिस्मा येतुते पेन मीकु पवित्र आत्माता वरम हींता.”
पत्रुना वेहतद केंजसि दग्गेर-दग्गेरा मूड वेय्कुना(3000) मंदि विस्वासम कीतुर आनि येसुना सिस्युल्क आतुर. ओर बापतिस्मा येतसि येरुसलेमता कलिसियाता मेंबर्क आतुर.
प्रेरितुल्क ओर्कु पेनदा पोल्लें कराहतस्के ओर बेस मनसु दोस्सि केंजतुर. ओर बस्केळ्क अंटोर कलियसि गाटों तिनुंदुर, वरोनाहाटीं वरोर पारतनां किय्युंदर. अंटोर कलियसि पेनदुक दन्यवाद वेहुंदुर आनि ओरगा बतल मनिना दान वरोनद वरोंक हीकुनुंदुर. सहरता अंटोर लोकुल्कगुडा विस्वासुल्कुना बारेमते बच्चोनो बेस विचारम कियुंदुर. दररोज बच्चुरो मंदि पेनदुन विस्वासम कियुंदुर.
प्रेरितों के काम 2 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।