42. येसु स्वर्गमते मल्सि दांतोर
यह कहानी सुनें ऑडियो फ़ाइल · 5.5 MB
इस रिकॉर्डिंग के शब्द नीचे Aheri Gondi में दिए गए हैं।
पेन येसुन हातोरव्टेटाल मर्रा जीवाते तेहता रोजु, ओना इव्वुर सिस्युल्कु दग्गेटा उंदि नार होंचेके मत्तुर. ताकसि होननेंके येसुनतोनि बल्हा बतल आता इत्ता बारेमते वळ्कसेके होंचंतुर. येसुए किरिस्तु आंदुर इंचि ओर्कु आसे मत्ता, अयनागानि ओन हव्कमळ जर्गता. अव्टेने आ मुरताह्क येसु मर्रा जीवाते तेदतोर इंचि वेहचंतां. इसोंटस्के बद पोल्लेतुन नमते बेस इत्तद ओर्कु तेळिया हिल्ले.
येसु ओरा दग्गेरा वासि ओरतोनि कलियसि ताकालय दल्गतोर, गानि ओर येसुन एरपाट किया हिल्लुर. बदुना बारेमते वळ्कसंतिर इंचि येसु ओर्कुन पूसकीतोर. कोन्नि रोजकु मुन्ने येसुनतोनि जर्गता अन्नि गटनना बारेमते ओर येसुंक वेहतुर. ईर बोरो पराय देसेमता मनकल आंद, येरुसलेमते जर्गतद ईनकु बतले तेळियो इंचि ओर इनकुत्तुर.
अस्के येसु ओर्कु, किरिस्तुना बारेमते पेनदा पोल्ले बतल वेहंता इत्तद बेस तेळियागोटसि वेहतोर: ‘पापि लोकुल्कु किरिस्तुन बदनाम कीसि ओन हव्कंतुर. गानि ओर हासि मूड रोजकुने मर्रा जीवाते तेदंतोर’ इंचि पेनदा कबुरतोर एनकटा बस्केनो वेहचि मत्तुर.
ओर इव्वुर बद नाटे अय्ते आगाना मत्तुरो, अद नाटे ओर एव्तुर, अद वेलाक पोळ्द अर्रालय आता. अदुनहाटीं ओर येसुनगुडा ओरतोनि आगालय वेहतुर, अस्के येसु ओरतोनि अद लोते होत्तोर. नर्कटा गाटो तिनालय ओर अंटोर उदतुर. येसु उंदि हारि पीतोर आनि पेनदुक दन्यवाद वेहचि उराहतोर. अस्के अचानक ईर येसु आंदुर इंचि ओर्क तेळियता. गानि अस्केटद अस्केन येसु ओरा कळ्कुंक दिस्साकोंटा आतोर.
अस्के ओर इव्वुर, “ओर येसे आंदुर! अदुनहाटींगे मरि, ओर मनाकु पेनदा पोल्ले वेहानेंके मनम इरगा आनंदमते मत्तोम,” इंचि वरोंक-वरोर वेहकुत्तुर. ओर बिरानेन अगाटाल मल्सि येरुसलेम होत्तुर. ओर अगा एव्सि, “येसु जीवातेन मंतोर, मोमोट ओन हूळतोम,” इंचि सिस्युल्कुंक वेहतुर.
ओर वळ्कसेकेन मत्तुर, अचानक अद अर्राते येसु ओरगा दिसतोर. दिस्सि, “मीक अंटोर्क सांति दोर्कि!” इंचि इत्तोर. इद बदो बूतम आंद इंचि सिस्युल्क इनकुत्तुर. गानि येसु, “अरे मिमेट वेरियंतिर बारि? नना निजमते येसुने आंदुन इंचि मिमेट बारि विचारम किय्यिर? इद हुळाट, नावा काल्क, कय्क! ना मेंदुल मत्ताप बूताल्कुंक मेंदुल मन्नो,” इंचि इत्तोर. ओर बूतम आयोर इंचि ओर्कु वेहालय, तिनालय बतलन्ना हीम्टु इंचि ओर्कुन तल्कतोर, अस्के ओर जिम्माता उंदि तुकडा हीते, अदुन येसु तित्तोर.
पजा येसु, “ना बारेमते पेनदा पोल्ले बतल अय्ते वेहंता अद जर्गंता. इल्हा जर्गमळ अवसरम मंता इंचि नना मीकु वेहचि मत्तन,” इंचि इत्तोर. अस्के येसु ओर्कु पेनदा पोल्ले बेस तेळियागोटसि वेहतोर, “एनकटा बस्केनो, ‘नना, किरिस्तुंक वेल्लेन तिप्पल्क अर्रापींता, नाकु हायापींता आनि हासि मर्रा जीवाते तेदापींता, इंचि पेनदा कबुरतोर रासि मत्तुर.”
“अचोने आयाका ना सिस्युल्कु पेनदा पोल्लेना प्रचार कींतुर इंचिगुडा आ पेनदा कबुरतोर रासि मत्तुर. ओर हरेक मनकंक मनसु मार्सकुनालय वेहांतुर. ओक्कला लोकुल्कु अल्हा कियानय्ते पेन ओरा पापाल्कुन मापि कींता. ना सिस्युल्कु ई कबुरतुन प्रचार येरुसलेमताल सुरुव कींतुर, ओर अन्नि जेगाने अन्नि जातिनोरा लोप्पो दांतुर. नना कीता हरेक कबळ, नना वळ्कता हरेक पोल्लेकु आनि नातोनि जर्गतादानकु मिमेट गवाइतोर आकिट.”
मुन्ने इंका नल्पै रोजकुनदाका येसु ओना सिस्युल्कुंक बच्चुंगो मल्कां दिसतोर. उंदि मल्का अय्ते हेय्युं नुह्कुंकन्ना(500) एक्को मंदिकु दिस्सि मत्तोर. ओर जीवातेन मंतोर इंचि बच्चुंगो मल्कां येसु ओना सिस्युल्कुंक रुजुव कीसि हुपिस्तोर. पेनदा राज्येमता बारेमते येसु ओर्कु बेस कराहतोर.
येसु ओना सिस्युल्कुंक वेहतोर गदा, “स्वर्गम आनि बूमिपोर्रोटा अन्निटपोर्रो अदिकार ताकसाना अदिकारम पेन नाकु हीता. अदुनहाटीं नना मीकु वेहचंतन, होंटु, होंचि दुनियाते मनना अन्नि जातिनोर्कुन सिस्युल्क कीम्टु. ओर्कु बाबाल, मर्रि, पवित्र आत्माता पोरोलते बापतिस्मा हीम्टु. नना मीकु बव पोल्लें कियालय अय्ते आदेस हीतानो, अव पोल्लेन परकारम ताकालय मिमेट ओर्क कराहटु. उंदि पोल्ले मिमेट मति इर्राट, नना बस्केळ्क मीकु तोळ मनंतन.”
येसु हातोरव्टेटाल मर्रा जीवाते तेदसि नल्पै(40) रोजकु आसोत्तस्के, येसु ओना सिस्युल्कुन, “नावा बाबाल मीकु ताकत हिय्यनदाका मिमेट येरुसलेमतेन आगिसि मंटु. ओर मीपोर्रो पवित्र आत्मातुन लोहचि मीकु ताकत हींतोर,” इंचि वेहतोर. अस्के उंदि मब्बु तेर्पे ओनपोर्रो वासि नीडा कीतस्के, येसु स्वर्गमते मल्सि होत्तोर. अन्नि वस्तुकुनपोर्रो अदिकारम ताकसानाहाटीं येसु स्वर्गमते होंचि पेनदा तिना बाजुंक उदतोर.
मत्ती 28:16-20; मरकुस 16:12-20; लूका 24:13-53; यूहन्ना 20:19-23; Acts 1:1-11 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।