41. हातोर लोप्पोटाल पेन येसुन जीवाते तेहंता
यह कहानी सुनें ऑडियो फ़ाइल · 3.1 MB
इस रिकॉर्डिंग के शब्द नीचे Aheri Gondi में दिए गए हैं।
सिपाइल्क येसुन क्रुसुन पोर्रो वेलाड वाटता पजा, यहुदि नेतालोर पिलातुसनगा वासि, “हासि मूड रोजकुने मर्रा जीवाते तेदांतन इंचि, आ आबद्दम येसु वेहचि मत्तोर. ओना मेंदुलतुन दोंगातनमते ओयालय ओना सिस्युल्क वाया पर्रंतुर, अदुन नदर वाटालय बोंदातगा कावेल इर्रागोम. ओक्कला ओर अल्हा कियानय्ते, अद हुळा येसु जीवाते तेदसि होत्तोर इंचि इना पर्रांतुर,” इंचि इत्तुर.
अस्के, “इच्चुर सिपाइल्कुन ओसि मीकु बल्हा अनपिस्ते अल्हा बोंदातगा कावेल इर्राट,” इंचि पिलातुस वेहतोर. अदुनहाटीं आ बोंदा सोर्रेता हर्दुक अड्डम मत्ता बंडाक उंदि सिक्का तंतुर. अदुन हूळसि अगा सिपाइल्कगुडा कावेल कीसेके मंतुर इनकुंचि बोरे येसुना मेंदुलतुन ओयुर इंचि हुप्सालय अल्हा कीतुर.
येसुना हामुरता इंकुंदि रोजु नोमकेम रोजु मत्ता. नोमकेम रोजुने बोरे बतले कबळ किया पर्रुर, अदुनहाटीं येसुनोर बोरे दंटागाह्क बोंदातगा वायाहिल्लुर. गानि नोमकेमता पलविसि रोजु, हक्केरेन, मुसा-मुसा मननेंकेन इच्चुं मुरताह्क येसुना बोंदातगा होनालय तयार आतां. अव येसुना मेंदुलकु इंकिच्चो वस्तुकु होकाना विचारमते मत्तां.
अव मुरताह्क अगा एव्वाका मुन्ने, बोंदातगा उंदि पेद्दा बुकंप आता. स्वर्गमताल पेनदा उंदि दूता वासि बोंदा हर्दुक अड्डम मत्ता बंडातुन पक्काक दोब्सि दानपोर्रो उदता. आ पेनदा दूता वेलगुनालेसीं मेरसेके मत्ता. बोंदातगा मत्ता सिपाइल्क अदुन हूळतूर. हूळसि ओर इच्चोन वेरियतुर गदा, हातोरलेसीं आसि बूमिपोर्रो ओर अड्डम अरतुर.
आ मुरताह्क बोंदातगा एव्तस्के, आ पेनदा दूता अवुन इल्हा इत्ता, “वेरियमट, येसु इग्गे हिल्लोर. हासि मर्रा जीवाते तेदांतन इंचि ओर मुन्ने वेहताप, ओर हातोरव्टेटाल जीवाते तेदतोर. बोंदातुन मिमेटे बेस हूळट,” इत्ता. अस्के अव मुरताह्क बोंदा लोप्पो होंचि येसुना मेंदुलतुन इरता जेगाते हूळते अगा ओना मेंदुल हिल्ले.
अस्के आ पेनदा दूता अवुन, “होंटु, होंचि ओना सिस्युल्कुंक वेहाट, येसु हातोरव्टेटाल मर्रा जीवाते तेदतोर इंचि! ओर मी मुन्ने-मुन्ने गालिलते दांतोर,” इंचि इत्ता.
आ मुरताह्कुंक इरगा इचंत्रम आता, अव वेल्लेन कूस आतां. ई बेसता कबुर सिस्युल्कुंक वेहालय अव वित्तालय दल्गतां.
ई बेसता कबुर सिस्युल्कुंक वेहालय आ मुरताह्क वितसेके मननेंकेन, हर्दे अवुंक येसु दिसतोर. अव ओना काल्कुनपोर्रो अरतां. अस्के येसु, “वेरियमट, होंचि ना सिस्युल्कुन गालिल होंटु इंचि वेहाट, अगा ओर नाकुन हूळानुर,” इत्तोर.
मत्ती 27:62-28:15; मरकुस 16:1-11; लूका 24:1-12; यूहन्ना 20:1-18 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।