3. बाढ़ा री कहाणी

बहुत समय बाद, संसारा बिचे बहुत सारे लोक रया करो थे। स्यो बहुत जादा दुष्ट बणिगे थे। तेस समय रे लोक इतने बुरे काम करने लगिगे थे कि स्यो केसरा बी डर नी मानो थे। इना लोका रे बुरे काम देखिके परमात्मा ने एक फैंसला किता कि मै ये पूरा संसार बाढ़ा साथे नष्ट करी देणा।

पर परमात्मा नूहा ते बहुत खुश था। नूह एक तर्मी आदमी था, जो दुष्ट लोका बिचे रओ था। इजिखातर परमात्मा ने तेस बाढ़ा रे बारे चे नुहा खे बताया कि मै एक बहुत बड़ी बाढ़ पेजिके ये पूरा संसार नष्ट करी देणा। इजिखातर तिने नूहा खे एक बहुत बड़ी किश्ती बणाणे खातर बोल्या।

फेर परमात्मा ने नूहा खे बोल्या, कि तूं एस नापा रे अनुसार लकड़िया री एक बहुत बड़ी किश्ती बणा, ओर तिजिरी लम्बाई 140 मीटर, चौड़ाई 23 मीटर, ओर ऊंचाई 13.5 मीटर हुणी चइयो, ओर तूं तिजी बिचे एक खिड़की एक दरवाजा छत ओर तिजिरे आदरें 3 कमरे बणा। तेस किश्तिया ने तेरी, तेरे परिवारा री ओर जमीना पादें रौणे वाले हर तरह रे जानवरा री तेस बाढा ते रक्षा करनी।

नूहा ने परमात्मा रा आदेश मान्या। नूहा ने ओर तेसरे तीनो पुता ने बिलकुल तेड़ी किश्ती बणाई जेड़ी परमात्मा ने तिनाखे बताई थी। क्योंकि से किश्ती बहुत बड़ी थी, इजिखातर तिजी बणाणे खे कई साल लगे। नूहा ने लोकाखे आउणे वाली बाढ़ा रे बारे चे चेतावनी देइके बोल्या कि परमात्मा पादें परोसा करो, पर लोका ने नूहा री गल्ला रा परोसा नी किता।

परमात्मा ने नूहा खे आदेश दिता कि तूं आपी खातर, आपणे परिवारा खातर ओर जानवरा खातर पूरा खाणा कट्ठा करिले। जेबे सब कुछ तैयार हुइगा, तो परमात्मा ने नुहा खे बोल्या कि तेरा, तेरी करवालिया रा, तेरे तीनो पुता रा ओर तेरी तीनो बउआ रा आदंरे किश्तिया बिचे जाणे रा समय हुइगादाए। स्यो कुल आठ लोक थे।

परमात्मा ने हर तरह रे नर-मादा जानवर ओर हर तरह रे नर-मादा पंछी नूहा गे पेजे ताकि स्यो किश्तिया बिचे जाई सको ओर बाढ़ा ते बचाए जाई सको। परमात्मा ने सात एड़े नर-मादा जानवर पेजे जो बली चढ़ाणे खातर उपयोग किते जाई सको। जेबे स्यो सब किश्तिया बिचे चढ़िगे तो परमात्मा ने आपी किश्तिया रा दरवाजा बंद करता।

तेबे बरखा लगणी शुरू हुइगी, ओर बरखा बिना रुके चाली दिन ओर चाली रात तक लगातार हुंदी रई। तरती रे आंदरा ते बी पाणी फूटी-फुटिके निकलने लगया। सारे संसारा री हर चीज पाणी बिचे डूबिगी, बल्कि ऊचे ते ऊचे पाड़ बी पाणी बिचे डूबिगे।

सुक्की जमीना पादें रौणे वाली हर एक चीज मरिगी, पर जो लोक ओर जानवर किश्तिया बिचे थे स्यो बचिगे। से किश्ती पाणी पादें तैरदी रई ओर किश्तिया रे आंदरे हर एक चीज परमात्मा ने डूबणे ते बचाइली।

बरखा बंद हुणे ते बाद, से किश्ती पाँज महीने तक पाणी पादें तैरदी रई, ओर तेस समय पाणी बी थोड़ा कम हुणे लगिरा था। तेबे एक दिन से किश्ती एक पाड़िया पादें जाइके ठैरिगी, पर तरती पादें एबु बी बहुत सारा पाणी था। तीन महीने बाद, थोड़ी-थोड़िया पाड़िया दिखणे लगिया थिया।

फेर ओर चाली दिन बाद, नूहा ने एक काव ये देखणे खातर बारे पेज्या कि पाणी सुक्या या नई। से काव सुक्की जमीन टोलदा हुआ ओरे-पोरे उड़दा रया, पर तेसके केथी बी सुक्की जमीन नी मिली।

फेर नूहा ने एक कबूतरी बारे पेजी। पर तेस कबुतरिया खे बी केथी सुक्की जमीन नी मिली, इजिखातर से कबूतरी नूहा गे वापस आइगी। एक हप्ते बाद नूहा ने से कबूतरी फेर बारे पेजी, ओर से कबूतरी सँझ के समय आपणी चुंजा बिचे जैतुना रा एक नया पता लेइके वापस आई। पाणी कम हुणे लगिरा था, ओर डाल-बूट फेर उगणे लगिरे थे।

नूहा ने एक हप्ता ओर इन्तजार किता ओर तीजी बार से कबूतरी बारे पेजी। ओर एस बार तेस कबुतरिया खे ठैरने खातर सुक्की जमीन मिलिगी थी ओर से वापस नी आई। पाणी सुकणे लगिरा था।

दो महीने बाद परमात्मा ने नूहा खे बोल्या, “एबे तूं तेरा परिवार ओर सारे जानवर किश्तिया बिचे ते बारे आई जाओ। परमात्मा ने तिनाखे आशीष दिती कि बहुत सारे बाल-बच्चे पैदा करो ओर पुरी तरती पादें फैली जाओ।” तेबे नूह, तेसरा परिवार ओर सारे जानवर किश्तिया बिचे ते निकलिके बारे आए।

नूहा रे बारे आउणे ते बाद, सबी ते पैले तिने एक वेदी बणाई ओर बली खातर उपयोग किते जाणे वाले जानवरा बिचे ते कुछ जानवर लेइके परमात्मा खे बली चढ़ाई ओर तेसरी आराधना किती। परमात्मा तेस बली ते बहुत खुश हुआ ओर तिने नूह ओर तेसरे परिवारा खे आशीष दिती।

परमात्मा ने बोल्या, “हाउं वादा करूंए, हालांकि आदमी आपणे बचपणा तेई पापी ए, मै कदी बी आदमिया रे जरिए किते जाणे वाले बुरे कामा रे कारण जमीना खे श्राप नी देणा, ओर ना मै से बाढ़ा साथे नष्ट करनी। आदमी आपणे बचपणा तेई पापी ए।”

फेर परमात्मा ने आपणी वाचा रा नसाण मेघधनुष बणाया। जेबे कदी बी आसमाणा बिचे मेघधनुष दिखाई देयोआ, तो परमात्मा याद करोआ कि मै क्या वादा किता था ओर तियांई तेसरे लोक बी याद करो कि परमात्मा ने क्या वादा किता था।